MAZMUR 13 - Allah Wene Fano Wene Hupla Inane

Afuni inoba enggin-fenggin were'ma samban yi'nogo agarek

¹ Afuni nen wuni wulak fuluk inebe seberogo ugu mene melalinafu mene faget. Daud awuni a'nogo.

² Tuhan neisena, Haren ki huliba an noba honggoret nobagaluk logogin nogo? Ki huliba Hat hebe an were'ma nen helokhe hinakfakhaluk logogin nogo?

³ Nen an nendawimo suk-sakhogo logolik, linggene inukhogo nendawinggen heiselhi logolik enek logombik he, ki huli legasigin nogo? Nen, it afuni an naselei mene nen sebelnarek werek kwelek enek he ki huli asigin?

⁴ Tuhan Allah neisena, an noba heil kwela'nealuk he, an nen samban ikhi lagi mene andi onggo yaganom o. An nebe wa'lasuageluk hera'nobagau fuk, an nomame mondok lek aga mene yi nobali'mo asuakhogo hilingnobagaino.

⁵ It naselei mene nen ikhi logolik, niren omame leget fogo, iluk yaganetik, nen an nalo-halo ugunem iren endo ya'nafik, uageluk herak nobagagun o, neisena.

⁶ An he Haren hendawi hundik hilingnafi lagen mene a'nogoba nek tipsek welagimo re, Haren an nagap telnafi lagen andiba re an nagaiyegeti logogin. At Tuhan nen an noba mondok fanorogo nek hilingitunem he andiba an nen At obaget awuni watu logogin.