MAZMUR 128 - Allah Wene Fano Wene Hupla Inane

Afuni inagainafuri inom inoba fanot fikherek wene

¹ Samban uogeluk wuni warik lagakhi lagaukwa mene. It afuni inendawinggenma nen eberogo anggigik Allah nen wene melalek yagaisikherek mene a'nogoba higithogo welagik, hilingitarek mene andoma re inagaiyek anggikhi logouwak.

² Hat he honggwaregen waganogo yakfakhugu mene enggen palek ninggi logogin, nen hebe fanorogo welagik, hangge yi mene ti mene mondogat were'ma welagik, hilingik logogin.

³ Hat hagwe re hailoba andoma e anggur mondok muli fano mene hak hilingik logogin. Nen hat hagainafuri re hangge meja haningisogo andoma e zaitun asimit hakhogo hilingik logogun.

⁴ Afuni inendawinggen eberogo anggogoin oba, Tuhan nen a'nogo fanot fisikhi logogin.

⁵ O Sion oba nen Tuhan nen hat hebe fanot hobagakhi logouwak. Hat heluk logogin huli andoma, haren Yerusalem oba yi mene ti mene mondogat were'ma nek heilenggen hikhi logogin logouwak!

⁶ Hat hebe umur uanhogo logolik, hat hombawi heilenggen isikhi logogin logouwak! Allah againafuri mene andoma inebeba mondogat he fanorogo nek logouwak!