MAZMUR 122 - Allah Wene Fano Wene Hupla Inane

O kota Yerusalem fogeratukwa awuni

¹ Wuni Daud en watikhe mene Allah awi wuri'mo lagakhi logolik fogerati lagaukwa awuni. It afuni ekhe nen he, nineisena Tuhan aiba lagauwogen eme! iluk yaganetunem nesanggo holhiresik he, an nendawimo hokhorogo nagaiyegeti lagi.

² Yogondak he nit o kota Yerusalem leget pa'leget wuri'mo kwe ambe pale'ma arat kwi wago.

³ O kota Yerusalem a'nogo ebe fano mondok logouwageluk, ele'lagat mondok pugun paganhogo sep hun-hun wutukwa.

⁴ Nineisena Tuhan nen he, ”Hit yi'nogo waga logoino,” iluk isikhe higithogo, At againafuri Aren wenaginafe mene inunggulenu lombok hai wati logouwogeluk o yoma waga logogun.

⁵ O yomaat At Daud en tagomangge mene inebe inenupogot menla'luk, afuni it mene ferinarek logolik, wene inoba figik, kotik ikhi logogun.

⁶ Afuni Yerusalem mene, fano liokhogo logouwagaluk, niren Allah ayonggo fikhi logouwok, ”It afuni o yiba inendawinggen hundik werek mene halok he, inawene legengge fano mondok logouwago.

⁷ O leget pa'leget waganogo kwelabek mene inawi elonggoma yoma re lioksek logouwago. Kaindek inaiba fano logouwak,” iluk Allah ayonggo fikhi logouwok.

⁸ Nerugwi nagaila'lak, nogogwi nagoromi, hit hinalisikhogo, ”Fano liokhogo logobagaigen iluk,” an nen yagahisikhi lagi.

⁹ Nit nineisena Tuhan Allah, awi wurik andi alisikhogo, Yerusalem fano mondok logouwageluk, Allah ayonggo fikhi lagi o, iluk wuni watikhe.