MAZMUR 114 - Allah Wene Fano Wene Hupla Inane

It afuni Israel mene o Mesir en wulibi wagaukwasik oba nen elalin mene hilingitukwa wene

¹ Israel mene o Mesir en wulibi wagaukwasik, Nen Yakub en tagomangge mene o kweang ap pok mene inaiba herakfuluk wagaukwasik oba nen,

² Tuhan nen he o Yehuda ba andoma obalik mondok fano horek awi hilingisogo figik, nen Israel oba andoma re At along werek oba hilingisogo figik, isikhe.

³ I laut Gelagah a'nogo eilenggen hasikhesik he heise lagaikhe, i Yordan laga lagaikhe mene a'nogo repalfesikhe.

⁴ No kambing en hilingiterek hak o tom-tom omanogo nen mulugetik, domba eak en hilingiterek hak punu-punu omanogo holombokhogo lagagik pigik hilingiti lagaukwa.

⁵ Nena mene weregen hat i laut yi re heise laga lagen nogo? nen hat i Yordan yi re nenahalok lagi'lek kamo egen nogo?

⁶ Nenahalok hit tom-tom oma muluk mulugenggeti logolik welagep? Nen nena mene weregen hit punu-punu oma re holombokhogo lagagik pigik hilingiti lagep nogo?

^7-8 Hat kweang yi re, At Tuhan Yakub eisena Allah a'nogo nen, helep uk welagaikheba omanogo agaumhogo re i mogo yenggelfigik, nen helep tom eil silipnorek menere i elesi wulakfei wagik, isikhe mene a'nogo elokhoma andoma nen leik waririm esin o, iluk wuniba fogeratikhe.