MAZMUR 113 - Allah Wene Fano Wene Hupla Inane

Tuhan obabut fano andi nen fogerati logogun wene!

¹ Yago, hit Tuhan amingmingengge mene nen At Tuhan enu nek fogerati logoni!

² Yogondak inom hobuk logogun huli andoma inom mondok-mondok, At Tuhan enu nek fogeratu mondok logogun.

³ Mo ero lagai wagarek oba nen pikhit ubuk ikherek huli andoma nen he, At Tuhan enu nek fogeratu mondok logogun.

⁴ It afuni inunggulenu lombok welagaikharek mene andoma mondogat he At Tuhan omameba nek sebelinarek werek, At andungdang werek mene andi re pogot ambolkwe po'limaba hilingik.

⁵ Nit nineisena Tuhan Allah andi inom higit mene re sa ekhe werek anggegep? At ebere takhta ba obalik mondok legoma omanogo hurek logolik werek.

⁶ Oba nen he Aren pogot inom kweang inom pelakha wesigiluk he somarogo pelakha wagarek andi.

⁷ Afuni inenggi lek mene re fesimo wula'lakse'ma andoma nen legeisogo fisili'lago, nen afuni inebe mondogat lebelek a'luk werek mene re wul oba nen menfisili'lago

⁸ It a'nogo ap kaindek inenu werek omanogo inom higiret fisigik, nen it At againafuri mene re it ap inogogwi yandek kaindek welagaikharek mene omanogo inom higithogoat hutfisigik, ikherek.

⁹ Arenat he hemi ibili mene inoba inomalik we onggo lek wogisikherek, nen it hemi nen hilingitarek hagat hemi sogwe andi ineagwi inom inaiba andoma agaiyekhogo were'ma along anggaluk legeisogo fikhi logouwageluk hilingfikheregat. Allah hai wasuok!