MAZMUR 110 - Allah Wene Fano Wene Hupla Inane

Tuhan inom Raja Aren wenatikhe mene a'nogo inom

¹ Neisena Tuhan nen he an noe Enupogot yagati logolik, ”Afuni hat haselei mene heisogen alperelogo fisanogen he, An nen oan hawe a'ma fisa wagi'lek werek kwelek, An nera'lu nenggi ebekwe ya hurek logoino,” iluk yagatikhe.

² O Sion oba andoma nen he, o haren ferinarek welagen oba a'nogo At Tuhan nen esanggo esanggo wogologo langet fagain, a'nogo hilingfoumo, haren haselei mene henggiba ferinarek logogin.

³ Hat hebe Handom horek oba andoma homamerogo wagunem he, o hubet lilengge welagarek hak, hat hagoromi ap alage mene inendawinggen nenat yabugun iluk, esa hokhorogo logalugun.

⁴ Tuhan nen wene watheti logolik, ”Ap an eisewerek mene enu Melkisedek welagaikhe andi hak, hat hebe re, hetok mondok a'nogo logogin,” iluk wene wathetikhe mene andi re, ane oak wanigin lego.

⁵ At Tuhan hat henggi ebekwe were'ma, At a'mage lagagunem he it raja-raja omanogo mabenet fisikhi logogin.

⁶ Aren afuni inunggulenu lombok wene inoba fuluk inebe mondok inoatunem, inebe warek enek fitfat ikhi logogin. Aren he afuni kweangma mene inogogwi kaindek o yi awi ti awi welagaikharek mene inebe mondogat leget fisagain.

⁷ Inoe raja a'nogo nen he, kwe esanggoma i ekhe lagunem namo re, omame asimbik along asigin o, iluk wuni watikhe.