MAZMUR 109 - Allah Wene Fano Wene Hupla Inane

Yi enggin ti enggin ikhi logolik samban agarek wene

¹ Afuni nen wuni wulak fuluk inebe seberogo ugunem yanggulinafu mene faget. At Daud Awuni. Nineisena Allah, Hat he an nen hundik-handik fogethafi lagi mene o, Hat hebe re alokhogo logou fuk.

² It afuni ina'mage weak mene omanogo inom, ineranen wene lalinafarek mene omanogo inom, wene an hilingik welagi mene faget sagari'lagwi mene omanogo inomen he, an noasuogeluk sali weri'lagwinggere.

³ Iren he inane mondok inabsiriba li'norogo hilingnobagali'lagwi, nen wene ero lek kwelek oba nen he an noasuogeluk weri'lagwi.

⁴ An nen it faget nendawi hundik hilinginafi logolik inobaget samban ugu kwelek oba nen, iren an noba fu'mo hikhibet niili'lagwi.

⁵ An nen it inoba fanorogo hilingfisugu kwelek he iren onggo weak mene nek noba fili'lagwi o, nen an nen it inoba nendawi hundik hilinginafi lagi mene omanogo iren onggore inabit mene noba fili'lagwi.

⁶ At andi obaget awene katokhogo paluageluk, ap kwanirogo hilingiri'lago mene ekhe menfein o, at ebe it aselei mene andoma nen oba wene hikhip hoak.

⁷ At ebe awene heirogo palhunemen, at weak eberogo hilingite mene enek asuago, nen aren samban ili'lago mene andi re aweak iluk anggikhi logouwago.

⁸ At ebe eluk ogo weak-weak legasi loak, nen aren yabu fago logolik mendek werek mene andi ogo ap ekhe amu mene nen telogo heloagat.

⁹ It againafuri re suarek mene agik, at agwe re sogwe mene agik, hilinglakhoak.

¹⁰ It againafuri re inawi meisalogo lakfagarek mene a'nogoba nen mugusogo wulak fisugunem, kino kinongge a'luk leil warik nugu mene hilinglakhoak.

¹¹ At angge yi mene ti mene andoma re it palegengge werek mene nen onggo wo'nisani iluk kino ugu mene omanogo nen felelenghogo heligik, nen aren set kwil kwalhogo helikherek mene andoma re afuni nen teligik, uak.

¹² Afuni fena nen at oba fano mene ekhe hilingisugun hanogo, athe at againafuri lin isikhe mene andoma inelagaik isaluk hilingisugun hanogo.

¹³ Aren tagomangge mene andi re mondogat legasugun fano, at enu re it hobuk logogun mene andoma nen ogo ekhe ebethikhi logoinogo.

¹⁴ At ombawi nen weak hilingiti lagaukwa mene andoma At Tuhan nen endawi eberek logouwak, nen at agaisa nen weak hilingite mene andoma leget fegep hanogo.

¹⁵ It inaweak andoma At Tuhan nen he eberek mondok logouwak, it inobaget afuni kweangma yoma nen ekhe ebet isanogo.

¹⁶ Ap andi re aren afuni inelagaik isaluk inendawirinafu menere mondok onggot welaga. Aren he afuni inenggi lek mene inom inebe wiik-weakhogo werek mene omanogo inom, weak peakhogo fisikhi laga, nen afuni inobakheligik werek mene omanogo aren pinggi inoati laga.

¹⁷ At he afuni homan ikfisugu mene faget he mondok amolo welaga, at onggwaregat homan ugu logouwak! At he afuni inoba fanot fisugu mene mondogat onggot welaga, at onggwarek oba ogo re fano mene ekhe logoinogo!

¹⁸ Afuni homan ikfisugu mene faget he at endawimo re seramsek welaga, we su inebeba labetarek higit hilingik welaga. Aren homan iginafi laga andoma re i inebene kweisali wagarek hak aga logouwak, nen amusu hakhogo at oak ebene andoma yugulhi logoguwak.

¹⁹ Aren homan ikfisikhi laga mene andi re, su laberek hakhogo laberek logouwak, nen hundik-handik alinggin hakhogo puksek logouwak.

²⁰ Tuhan neisena, unggum andi it afuni an noba hikhibet niigik, nen iren an nobaget weak mene hilingitik, hilingiri'lagwi mene andoma inoba feino o.

²¹ Oba nen he Tuhan Allah neisena, an enek he Haren wene isigin hakhogo lebetnabin, Hat hendawi fano mene a'nogoba inom nen hendawi hundik hilingnafi lagen a'nogoba inom nagap telnabin.

²² An he nenggi lek logolik nelagaik mondok welagi, nen an nendawimo noumo nelonggoma mondok nilik kugunem ou hugu welagi.

²³ An nebe re afuni inafumak o hubet palogo lagarek a'nogo hak lega'leba nen, no pulue tarogo lagarek a'nogo hak lega'leba nen.

²⁴ An sumburu ninggi'lek were'ma nen enek he, noak elekwe talo talonggeri'lago, nen nebere mondok irigik weak hilinglagarik welagi.

²⁵ Afuni an ineil niili'lagwi mene nen he inambisang singgin watniikhi logolik pilip nabi'lagwi.

²⁶ Neisena Tuhan Allah, Haren lebetnabin o. Hat hendawi hundik hilingnafi lagen mene a'nogo higithogo Haren nagap telnabin.

²⁷ Andiba re it naselei mene omanogo nen futfikhi logolik he Haren hilingiten iluk inelu asugun, Hat Tuhan a'nogo nenat hilingiten anggogoin.

²⁸ Iren an homan nobagagun oba nen, Haren enek an fanot nobagakhi logogin o. It inebe weinama asi wesugun oba nen he inenggali asugun, oba nen he an hamingmingengge yi nek he nagaiyekhogo hilingnobagagin.

²⁹ It afuni an noba fu'mo hikhip niili'lagwi mene andoma re it inebe sebelfisagarek awene a'nogo nek inoba asi wesigin, nen su hokho mene jubah endakwe labetarek a'nogo hak he it inenggali mene inoba sebelinabi wesigin.

^30-31 Aren he ap inenggi lek mene omanogo, afuni nen inebe pinggi inoasugun iluk hilingitunem inebikhit agaresik, telinafarek. An nen nane mondok ayo palogo Tuhan fogerati logogin, it afuni hokhorogo andogore'ma omanogo nen at enu nek legeisogo fikhi logogin, iluk Allah hai watikhe.