MAZMUR 107 - Allah Wene Fano Wene Hupla Inane

BUKU FUAP MENE: MAZMUR 107–150 Tuhan obabut fano nen hilinginaferek mene faget fogeratukwa wene

¹ Tuhan obabut fano andi nen, hai wati logouwogo o. Aren endawitninafu mondok welagarek andi nen, fogeratu mondok logouwogo.

² Yago, hit hinoba enggin-fenggin were'ma, Aren telhinafikhe mene andi nek hobugalep fogerati logoni o.

³ Hit hinebe ap pok higit afuni inaiba polikwe malikwe elikwe yikwe, were'ma andogorogo hinobagasikhemo welagep andi.

⁴ Afuni nit mene ekhe, it afuni ekhe inawi kota welagaikharek oba, kwe lagukwe inonggot mene o leikwe afuni le'ma andoma, leil warik ya lagik ta lagik nikhi lagaukwa.

⁵ It inamburu inagai nele nen, inobakheindok pala'luk, inendawinggen nong-hong ikhi lagaikhe.

⁶ It inoba enggin-fenggin hugu logolik, Tuhan nen telninabuageluk, inane hokhorogo ayonggo fugunem, Aren fikhalogo fisikhi lagaikhe.

⁷ Aren he ebekhe pikhithogo yago kwe nen woginarek laluk he, o kota afuni inebe werek oba omanogo fisa laga lagaikhe.

⁸ Aren it inobaget elalin mene hilingitik, endawi hundik hilinginafik, isikhe andi nen he, iren At Tuhan hai watik fogeratik u higit obaat ikhi logouwak.

⁹ It afuni inagai nele nen inoba yamukhogo noagaluk inom, nen it afuni inamburu nele mene inalabut ninghogo noagaluk inom, oba heilarogo wogisikhi lagaikhe andi nen he, fogerasugun obaat fogerasuak.

^10-11 Afuni andi it ekhe nen he, Allah awe a'ma logogun ninabit, iluk Tuhan Allah Lego Mondok werek mene a'nogo nen he, ”Yi'nogo hilingiti logoino,” isikhe mene a'nogo inendawimo serametfikhi lagaukwa andi nen inenggi posiemanggen heleba warogo fisasukwama heinet watu logolik hele warek o mum oba andoma welagaukwa.

¹² It yabu enggin mene hilingitunem inendawimo warikhi logouwageluk hilingfisikhi lagaikhe. A'nogo hilinginafu were'ma it inebe warugunem he, it ekhe nen leberisa elo'lek aga lagaikhe.

¹³ It a'nogo weak logolik, Allah nen telinabuagaluk, inane hokhorogo ayonggo fugunem, Aren enggin inoba werek mene korogo wokhikhi lagaikhe.

¹⁴ Aren he it inebe o mum oba omanogo nen inom posiemanggen meneba homago mene omanogoba nen inom, hele fikhalogo wulakfisa waga lagaikhe.

¹⁵ Aren it inobaget elalin mene hilingitik, endawi hundik hilinginafik, isikhe andi nen he, iren At Tuhan hai watik fogeratik ubaat ikhi logouwak.

¹⁶ Aren he kwe tembaga ba hilingik mene meisalogo lakfigik, nen kwe kelok posiemanggen meneba ninghogo yagarek mene tekhogo hurogo lakfisigik, ikherek andi nen he, At ebe hai wasu higit obaat, hai wati logouwak.

¹⁷ It ekhe inonggwarek inaweak hilingiti lagaukwa andiba re inobabut kembu logolik weak mondok hugu welagaukwa. Nen it inonggwarek weak oba re inoba enggin-fenggin fikhi lagaukwa.

¹⁸ Iren sumburu yi mene ti mene nunggu aple inendawimo hebak lekha wagunem logolik, it inebe wa'lasugun mene horogat agunem welagaukwa.

¹⁹ Iren wiik-weak a'nogo hikhi logolik, Tuhan nen it inebe telinabuageluk, inane hokhorogo ayonggo fugunem, Aren inebe telinafi lagaikhe.

²⁰ At Allah nen he, ”Fano ame,” ugunem, inebe fano aga lagaukwa. It inebe horogat wa'lasugun hangge were'ma, fano hilingisogo telinafi lagaikhe.

²¹ Aren it afuni inoba endawirinapluk inobaget yi wene ti wene elalin mene mondok hokhorogo hilingiti lagaikhe mene andoma re mondok elo'lek mene hilingiti lagaikhe hilingi'mo re, Iren at Tuhan oba hai watu aple andi re u higit obaat hai wati logouwak.

²² Iren he, yi mene ti mene At faget fisaluk waluk waga logolik, At hai wati logouwak. Nen At obabut hilingiti lagaikhe mene andoma it afuni ekhe fakhogo yagaisikhi logolik he wuni inanggilukhogo wati logouwak.

²³ It andi ekhe nen he, yi mene ti mene onggo saburouwogeluk, onggo wanhik hunitik nikharek mene, i laut hokho yenggele'ma andoma, e so warogo herarik laga lagaukwa.

²⁴ A'nogo laga logolik At Tuhan nen elalin mene i laut oba logouwageluk fesikhe mene andoma iren ineilenggen hikhi lagaukwa.

²⁵ Aren he yi'nogo hilinglasuak ugunem, sogoi aninirogo funha wagunem, i ha'labu hokhorogo hilingiti lagaikhe.

²⁶ A'nogo hilingiti logolik, it inebe e so inom hambokhogo, pogoroba higit liakfisalugen he, i agumo ma'lima wula'lak isa pugunem, it inailo'lek mene ogore inailo nek aga lagaukwa.

²⁷ It a'nogo hilingiti logolik, inendawinggen legagunem he, inobabut lugulugwi a'luk hilingitarek hangge hilingiti logolik, inoak elekwe leik legengge hilingiti lagaukwa.

²⁸ A'nogo hilingiti logolik, At Tuhan nen, it inebe telinabuagaluk, inane hokhorogo ayonggo fugunem, enggin-fenggin inoba werek mene omanogoba nen Aren telinafi lagaikhe.

²⁹ O sielu hokho mene waga logolik, i esinggen founalik wagunem, Aren habalok legame ugu halok he lek aga lagaikhe. I ha'labu hokho wati lagaikhe mene, Aren hambuget fikhi lagaikhe.

³⁰ A'nogo lek aga lagaikhe andi nen he, it inendawimo inagaiyek hikhi lagaukwa. It inebe kapal oba i agum ebene alelogo woginarek laluk, iren logoin anggikhi lagaukwaba omanogoat, At Allah nen andoma fisa laga lagaikhe.

³¹ Aren it afuni inoba endawirinapluk, it inobaget yi wine ti wine mondok elalin mene hilingiti lagaikhe mene andoma re, mondok elo'lek mene hilingiti lagaikhe hilingi'mo re, Iren At Tuhan oba hai wari'lagwi mene andi re u higit obaat hai wati logouwak.

³² Allah againafuri andoget fuluk, at enu esinet fikhi logouwak. It majelis inaluendek omanogo andoget fuluk At fogerati logouwak.

^33-34 Afuni o andoma welagaukwa mene re inobabut weak hilingiti lagaukwama, At Allah nen he, i elesi omanogo agaumhogo re kweang iringi'mo hilingfigik, i ebe lagarek mene omanogo agaumhogore o leimo hilingfigik, kweang muli fano omanogo agaumhogo re, o lei esi wea'ma hilingfigik, ikhi lagaikhe.

³⁵ A'nogo meneat he, o leik omanogo agaumhogo re, i fano yenggelogo fesikhe. Kweang puk mene omanogo agaumhogo re, i elesi wulibisogo fesikhe.

³⁶ Afuni inamburu nele mene re, o andoma fisikhi lagaikhe. Fisugunem inawi kota sili pumbukhogo wurogo kwikhi lagaukwa.

³⁷ It ineabu wokfakhaluk, awi feik lakfikhi lagaukwa. Anggur awi yakfakhaluk, enggen oba heilarogo palogo fakhikhi lagaukwa.

³⁸ At Tuhan nen, it inagainafuri hokhorogo wogisikhi lagaikhe. Inanggo lek agi'lek logouwageluk, eagwi sik-pikhogo wogisikhi lagaikhe.

³⁹ A'nogo meneat he, it ekhe nen weagarinafi logolik, yi enggin ti enggin hilinginafukwama, endebat enek ineluk were'ma,

⁴⁰ At Tuhan nen, it weagarinafi lagaukwa mene omanogo, inogogwi kaindek sebelogo fisasikhesik, o leimo afuni le'ma andoma, ebekwe mondok yago lekwe omanogo nikhi logouwageluk, yagaisasikhe.

⁴¹ A'nogo meneat he, it afuni inangge lek mene re, it weak were'ma telinafi lagaikhesik, inanggo sik-pikhogo wogisikhi lagaikhe hak, inebe ogo hokho pokhorogo hilingfisikhi lagaikhe.

⁴² It inobabut higithogo hilingitarek mene re, a'nogo hilingitunem ineilenggen isaluk, inendawimo inagaiyek agaikharek. A'nogo meneat he, it inobabut weak hilingitarek mene andi re, inambe to'morogo welagaikharek.

⁴³ Hit ekhe hinendawinggen kagalek mene re, wene mondogat andi oba ebesimbik, hineisena Tuhan nen, endawit hinaferek wene andi, mondogat futfikhi logoino o, iluk wuni watukwa.