MAZMUR 100 - Allah Wene Fano Wene Hupla Inane

Wuniba Allah apne wanharek wene

¹ Yi mene ti mene Allah wogosuogeluk hai warogo apne wanhi logolik wuni watukwa wene. Hit afuni o kweangma yi awi ti awi welagep mene hineisena Tuhan hinane a'mit suphogo, hai watik, fogeratik, ikhi logoni o.

² At oba waga logolik he, wuni warik-warik waga logoino. Allah faget hilingiti logolik he, hinendawimo hinagaiyek oba hilingiti logoino.

³ At Tuhan andi ebere, Allah werek a'nogo hinendawimo ebe'no. Nit ninebe re Arenat elalninafikhemo re, At onggwarek meneat welago. Inanggo tegelharek andi hak, ninebe At againafuri mene welagoma, Arenat tegelninafu welagarek.

⁴ Hit hinebe nineisena awi ambe palek oba andoma kwikhi logolik he wuni hai watu awuniba ilik kwi waga logoino, At awi solombon ambe palogo wurik oba andoma kwikhi logolik he Wuni fogeratarek awuni warik kwikhi logoinoat. Hiren he At enek legeisogo fikhi logolik fogerati logoino.

⁵ Tuhan andi re mondok fano, nen Aren endawi hundik hilinginaferek mene andi re mondok-mondok logogin mene. Nen ninebe ta'larik lagu kwelek, At he ninoba lombokhogo logolik higithogo mondok hilingiterek, iluk wuni watukwa.