KISAH PARA RASUL 7 - Allah Wene Fano Wene Hupla Inane

Wene at Stefanus nen onggo yagaisasikhe wene

¹ At Stefanus wene a'nogo oba fesukwama, ap Allah eisewerek mene inoe kain a'nogo nen he, ”Wene andi eberogoat ili'lagwi a? Ineranen ili'lagwi a,” iluk yagatikhe.

² Yagatikhemo, at Stefanus nen he, mel yagaisasikhe: Nogogwi, nagoromi, neisenalak hinalabok. Wene igin yi, hinesanggo fanorogo holini. Ninambu Abraham a'nogo o Haran tekhogo wagi'lek, o Mesopotamia were'ma, Allah fogeratorek mene a'nogo elokhoma menlagaikhe.

³ Elokhoma menlaga logolik he, o hat welagen oba yoma inom, hoe hagot andoma inom, herakfisaluk wulibi lan o. Wulibi lagen halok he, o an nen yagahesigin oba lano o,

⁴ Yagatikhemo re, o afuni Kasdim mene inaiba herakfisaluk, o Haran tekhogo wagaikhe. Wagaikhesik were'ma, eisena wa'lagaikhemo re, o andoma herakfisaluk Allah nen waganogo o hit yogondak welagep oba yoma fei wagaikhe andi.

⁵ A'nogo fei wagaikhe meneat he, aren he, o yoma eisewerek hat mene o, iluk yagati'legat. Nen, kweang endephogo ekhe yagati'legat logolik he, o yoma hobuk hat eisewerek agik, haren tagongge mene eisewerek agik, ugun o, iluk at amlogo takhigi'lek werek kwelegat wene waretikhe andi.

⁶ Wene a'nogo waretikhe meneat he, mel yagatikheat: Haren tagongge mene andi afuni inaiba laluk ap pok hak logogun. A'nogo were'ma afuni andoma mene nen inamingmingengge hangge hilingfisaluk, o mo lagagik pigik ugu kwelek 400 tahun set kwil-kwalhogo hilinginafi logogun.

⁷ Mene re, it afuni inawi weregen inawe a'ma fisaluk ferinarek logogun mene andi, an nen wene inoba fembik weagerinabigin o. Weagerinabumo, haren tagongge mene andi o andoma nen wulibi wesimbik he, o yoma logolik, an fogetnafi logogun o, iluk Allah nenat yagatikhe.

⁸ A'nogo yagatikhesik he, An wene warogo wokhinafi andi, enegat logouwageluk inagap inenggalimo mene palinafi logoino o, iluk yagatikhe. A'nogo yagatikhemo, Abraham en amlogo Ishak takhasikhesik he, enggi 7 hari welagaikhesik, enggi ekheba agap enggalimo mene a'nogo palhikhe. Nen, hobuk Ishak en amlogo Yakub takhasikhesik, a'nogoat agap enggalimo mene palhikheat. Nen, Yakub en he, it nit ninombalak inebe 12 nen omanogo taginafikhesik he, a'nogoat inagap inenggalimo mene palinafikheat.

⁹ Ninombalak omanogo inagot Yusuf oba wene palhi lagaukwasik he, ebe o Mesir waluk lagaukwasik inamingmingengge logouwageluk, ap ekhe oba onggo wanhukwa. Mene re, afuni ekhe nen at ebe hundik-handik weagetfouwogeluk ugunem he, Allah emberek hundik were'ma yi wene ti wene oba wagunem telhu mondok welagaikhe.

¹⁰ A'nogo telho were'ma, ap kain Firaun o Mesir mene inoe enupogot a'nogo nen he, ”Ap yi obabut fano. Endawinggen mondok kagalek,” iluk ebe oba liok isikhesik, mel yagatikhe: O Mesir yoma inom, an nawi inom, nagainafuri inom, haren ferinarek logolik, an mene yi mene ti mene yoma mondogat hat henggiba logoinok, iluk ebe gubernur logouwageluk menfesikhe.

¹¹ Menfesikhemo werek kwelek, o Mesir andoma inom, o Kanaan yoma inom, sumburu ouwak hokhoat agaikhemo nele welagaukwa. Nele logolik he, ninombalak omanogo sumburu koma mene herasu heat, weat welagaukwa.

¹² Weat were'ma re, afuni ekhe nen, ”O Mesir andoma nek he, sumburu gandum enggen werego,” iluk ugunem, at Yakub esanggo holhikhesik he, at againafuri nit ninombalak omanogo nen ekhe wanuageluk lakfisasikhe. Attak a'nogo lakfisasikhesik,

¹³ hobuk lakfisikhi lagaikhemo re, at Yusuf a'nogo nen, ”An a'nogo nebe yi aro,” iluk ogogwi omanogo yagaisasikhe. Yagaisugunem Firaun a'nogo nen, ”Yusuf agaila'lak inom tago mene yoma higi,” iluk elu agaikheat.

¹⁴ A'nogo yagaisasikhesik, at Yusuf en he, eisena Yakub inom, afuni at againafuri mene mondogat inebe 75 inom, inom wesuageluk wene warogo lakfisa wagaikhe.

¹⁵ Wene warogo lakfisa wagaikhemo re, it Yakub lak o foluk herakfisaluk o Mesir pisukwa. Andoma pisukwasik logolik he, at ebe inom, ninombalak inom, andomaat wa'larik lagaukwa.

¹⁶ Wa'larik lagaukwama re, attagat at Abraham o Sikhem logolik, oumola afuni Hemor mene inoba onggo palhikheba inebe warek inambotkwe woginarek wagaukwa.

¹⁷ Hobuk he, Allah nen fageat wene Abraham waretikhe mene a'nogo ebe asuak horogat agu kwelek he, afuni nit mene inebe o Mesir andoma hokhorogoat hilinglagaukwa.

¹⁸ A'nogo hokhorogoat hilinglagaukwama re, ap ekhe hunogoat, Yusuf ebe onggot mene, o Mesir andoma kain agaikhesik ferinarek welagaikhe.

¹⁹ Logolik he, afuni nit mene ninombalak omanogo lalinafik, yi enggin ti enggin hilinginafik, ikhi lagaikhe. A'nogo ikhi logolik inagainafuri ket tago mene ineluk logoinogo iluk, wa'lasuagen enda'ma wulakfisani, iluk ane ninghogo yagaisikhi lagaikhe.

²⁰ A'nogo hilinginafi lagaikhe andem sambul, at Musa ebe fano mondok ta'lagaikhemo re, tugi henagan eisena aiba fisogo welagaukwa.

²¹ Fisogo welagaukwasik, hobuk wulakfesukwama, at kain Firaun a'logo nen ebe wanhikhesik, at onggwarek eak hanggeat kulhikhe.

²² Kulhikhemo re, it afuni o Mesir mene yi wene ti wene inelu welagaukwa mene andi, aren mondogat yagatikhe. Yagatikhesik aren aneba fano nek igik, enggiba yi mene ti mene fano nek hilingitik, ikhi logolik, ebe kainat agaikhe.

²³ Kain agaikhesik, at Musa ebe umur mo lagagik, pigik, ugu kwelek 40 tahun hilinglagaikhe. Hilinglagaikhemo, aren he, ”Afuni Israel an palek mene omanogo ekhe isa lagain,” iluk endawimo anggasikhe.

²⁴ Endawimo anggasikhesik, inoba lagaikhe hak he, ap Mesir mene ekhe nen ap Israel mene ekhe yei watunem eilenggen hasikhe. Eilenggen hasikhesik he, at ebikhit agaikhesik elele waganogo, ap Mesir mene a'nogo ebe pinggi watikhe.

²⁵ Wati logolik, endawimo nen he, ”It afuni an palek mene inendawimo nen he, Allah nenat ayonggo fikhemo, aren wo'ninarek wulibigin,” iluk futnobagagun, iluk anggasikhe meneat he, iren a'nogo futfigi'lek welagaukwa.

²⁶ Futfigi'legat logolik he, ohealekwe ap inebe pire Israel mene ekhe emberek yei yafunem eilenggen isasikhesik lambulogo fisageluk, mel yagaisasikhe: ”Nagaila'lak. Hit he, hagot hemberek meneat he, nenahalok yei yafi lagep,” iluk yagaisasikhe.

²⁷ Mene re, at agot yei wati logolik, at Musa ebe filikhogo kwe esanggoma lakfikhi logolik he, mel yagatikhe: Hat nit ninoe kain logolik wene inoba figik, kotik, ikhi logouwageluk, sa nen menhobagaikhemo.

²⁸ Hobit hu'mokwe ap Mesir mene waten andi hak an noasigeluk ikhi lagen a, iluk yagatikhe.

²⁹ A'nogo yagati lagaikhemo, wene andi esanggo holhikhesik he, heise wulifikhesik o andi herakfisaluk o Midian andoma lagaikhesik welagaikhe. Logolik he, amlogomi inebe pire taginafikhe.

³⁰ Andoma mondok logolik, hobuk 40 tahun welagaikhe. Were'ma re, malaikat Allah nen yonggo pelakfisa wagarek mene omanogo ekhe Musa nen eilenggen hoageluk, tom Sinai a'ma afuni inebe le'ma andoma pi wagaikhesik he, e panggi hangge mene anggele'ma nen endu amuilogen wialhunem elokhoma menlagaikhemo eilenggen hasikhe.

³¹ Hasikhesik he, fogeratikhesik, eilenggen furogo hageluk ebe horokhogo lagunem he, nineisena Tuhan nen mel ugunem esanggo holhikhe:

³² Hat hombalak Abraham inom, Ishak inom, Yakub inom, ineisena Allah anaro, iluk yagatikhemo, at Musa nen ebe eilenggen furogo ha la ailo agaikhe.

³³ Ailo agaikhemo, nineisena Tuhan Allah a'nogo nen he, ekhe mel yagatikhe: Kweang hat hebe mendek welagenma arem, an nonggwarek nanggweang o. Halok, heisok sepatu yelik mene aroma nonggologo fein o.

³⁴ An nagainafuri afuni o Mesir mene nen yi enggin ti enggin hilinginafunem neilenggen isigik, inendawi ane ugunem nesanggo holhik, ikhi lagarik he, an nen telinabigeluk nebe pi wagi o. Halok, an nen hat yogondak o Mesir lakhobagaigen eme o, iluk yagatikhe.

³⁵ Fageat it afuni Israel mene nen he: Hat nit ninoe kain logolik wene inoba figik, kotik, ikhi logouwageluk, sa nen menhobagaikhemo. Ninabiro, iluk wenagetukwa a'nogo, at Musa aro. A'nogo wenagetukwa meneat he, malaikat Allah nen yonggo pelakfisa wagarek mene omanogo, at Musa eilenggen hoageluk ekhe pelakfei wagaikhemo re, e panggi hangge mene anggele'ma nen weinam agaikhemo eilenggen hasikhe mene a'nogoat, inoe kain logolik telinabuageluk ayonggo fuluk lakfesikhe andi.

³⁶ Ayonggo fuluk lakfesikhemo re, afuni Israel mene inebe woginarek wulibi wagaikhe andi, at Musa nen aro. Woginarek wulibi waga logolik he, o Mesir andoma inom, i yenggelek enu Laut Merah andi inom, o leimo afuni le'ma andoma, o mo lagagik pigik ugu kwelek 40 tahun logolik inom, it afuni nen wene futfouwageluk ekhe hilingisu lek mene elalinat hilingirik wagaikhe andi, at Musa nen aro.

³⁷ Nen, afuni Israel mene yagaisikhi logolik he: Allah nen ap at ane yagahisikhi logouwageluk, ap hit mene ekhe an mennobagasikhe andi hak, hobuk menfagain a'naga o, iluk yagaisasikhe andi, at Musa nen aro.

³⁸ Nen, ninombalak inom o leimo afuni le'ma andoma andogorek were'ma, tom Sinai andi a'ma malaikat Allah nen yonggo pelakfisa wagarek mene omanogo ekhe oba pi wagaikhesik he, emberek wene ane isukwa andi, at Musa aro. Ninombalak omanogo inomat were'ma, at Allah nen, wene nineluk logogun wene andi, nit yaganisoageluk yagatikhe andi, at Musa aro.

³⁹ A'nogo yagatikhe meneat he, ninombalak omanogo nen, at ane hologo logou inabit welagaukwa. A'nogo logolik he, ebe herakfisasukwasik, O Mesir andoma ninambotkwe la mene, iluk inendawinggen lakfesukwasik welagaukwa.

⁴⁰ Inendawinggen a'nogo lakfesukwasik logolik, at Harun mel yagatukwa: At Musa o Mesir nen wo'ninarek wulibi waga a'nogo, ninggi'nogo hilinglagama he. Nit ninonggot, andi nen, nit ninambotkwe wo'ninarek o Mesir loagen he, ”Allah ebe hangge obali'mo su kembu ekhe wu'nisano, iluk yagatukwa.

⁴¹ A'nogo yagatukwasik, o andi sambul wam sapi wam eak mene ilirenggerogo su kembu wutukwa. Wutfesukwasik he, anggo warogo fesukwasik, iren he, ”Ninenggi nen wurogo yi fano,” iluk, inendawimo inagaiyegeti lagaukwa.

⁴² A'nogo hilingiti lagaukwama re, at Allah nen ambot wogisasikhesik, ”Pogoroba mene mo inom, tugi inom, hesagal hokhorogoat inom, fogerati logonik he,” iluk inebe herakfisasikhe. A'nogo hilingitikhe andi, it ap Allah ane yagaisikhi lagaukwa mene nen mel isukwa hagat hilingitikhe: Allah nen he, Hit afuni Israel mene yi sani. Mo lagagik pigik ugu kwelek, 40 tahun o leimo afuni le'ma andoma logolik he, wam sapi watik, endumo nolhik, ikhi lagagip andi re, an faget nobagagik, wa'netik, ikhi lagagip nogo? Lego.

⁴³ Tugwi kembu su mene hineisena Molokh angge a'nogo inom, tugwi kembu hesagal hangge hineisena Reban mene a'nogo inom, ya figik ta figik, waluk nikhi lagagip andi. A'nogo waluk nikhi logolik, hit at awe a'ma kuogeluk ilirenggerogo wutigip andi nen, hinebe o Babel abel fenakwe lakhinobagagin o, iluk Allah nen isikhemo, lisu palogo fesukwa andi hak hilingitikhe andi.

⁴⁴ At Allah nen Musa yagati logolik he, An nebe ninom welago, iluk nawi o su mene yi'nogo wu'no, iluk ilirengge walethasikhemo, eilenggen hasikhesik, o ebe a'nogoat wutikhe. Wutikhemo ninombalak omanogo o su mene andiat fisogo logolik o leimo afuni le'ma nikhi logolik ya wutik, ta wutik, wurik nikhi lagaukwa.

⁴⁵ A'nogo wurik nikhi lagaukwasik, iren tagongge mene Yosua inomen o su mene wurik andi meisalogo waluk he, afuni nit ninaiba yoma were'ma Allah nen mugisogo wulakfisasikhemo inanggweang sebeli kwi wagaikhasik, o su mene andi wusi kwi wagaukwa. Wusi kwi wagaukwa andi sambul o su mene andiat wurik welagaikhesik he, huli Daud eluk welagaikhe andi huli wurik welagaikhe.

⁴⁶ Allah nen Daud obabut hilingiti lagaikhe mene andi Allah oba liok isikhemo, aren Allah mel yagatikhe: Yakub eisena Allah hararo. Hawi ekhe wurogo hobagagin, iluk yagatikhe.

⁴⁷ A'nogo yagatikhe meneat he, Allah awi ebe amlogo Salomo nen wurogo fisasikhe andi.

^48-50 A'nogo meneat he, at ap Allah ane yagaisikhi lagaikhe mene ekhe nen wene mel isikhe: Nineisena Tuhan Allah nen he, Pogot he an nebe hurek welagirek oba o, Nen, kweang he, neisok sebelek welagirek oba, Halok, hiren nawi ninggi'nogo mene ekhe wurogo nobagagun nogo. An nebe set walogo werek oba re, ninggini'mo ekhe wut nobagagun. Elo'lego. Yi mene ti mene mondogat andoma, an nenat walhasigi lek nogo? iluk Allah nen isikhemo, lisu palogo fesukwa andi nen, at Tuhan Allah esin lego welagarek mene andi, o afuni inenggi nen wutarek meneba logou lek hago.

⁵¹ Hit afuni yoma hinobabut mondok weak hinesanggo holhi'lek hinagap hinenggalimo mene palek logoligat he, hinendawinggen tegele'lek logolik komore'lek hilingiti lagep yi ri! Hinombalagen: Allah Areagun ane andi ninabit, iluk ikhi lagaukwa hagat, hit it inobabut waganogo ikhi lagep yoma ri!

⁵² It ap Allah ane yagaisikhi lagaukwa mene omanogo, hinombalagen inebe weagerinafi'lek ekhe welagaukwa nogo? Weagerinafi lagaukwa nek anggigi. It Allah Ane yagaisikhi lagaukwa mene nen he: Allah amingmingengge obabut higithogo hilingisigin mene andi hobuk wesigin o, iluk ebe wagi'lek werek kwelek, abok tak ikhi lagaukwa mene inebe hinombalagenat inoati lagaukwa andi. Hobuk, iren abok tak isukwa mene andi ebe wagaikhemo re, hirenat at ebe wasuageluk yonggo lagik, ebe watik, egep andi.

⁵³ Nen, it malaikat Allah nen yonggo pelakfisa wagarek mene omanogo nen wene Allah nen komotninafikhe wene andi, hirat wokhisasukwa meneat he, hinesanggo hologo hilingisu hinabirat welagep andi,” iluk yagaisasikhe.

Stefanus Saulus eilhanem helep oba watukwa wene

⁵⁴ At Stefanus nen wene a'nogo yagaisikhi lagaikhemo, it inesanggo holhukwasik, ina'mage lagasukwasik he, inaik himbirogo ebe wasuogeluk isukwa.

⁵⁵ Wasuogeluk ugu kwelegat he, at Stefanus Allah Areagun endawimo peterek logolik, eilenggen pogoroba liakhasikhe hak he, at Yesus Allah ebe fogeratarek mene a'nogo era'lu mendek emberek were'ma eilenggen liagisasikhe.

⁵⁶ Eilenggen liagisasikhesik aren he: ”Yethani! Pogot healagama re, at abat ta'lasi wagaikhe mene a'nogo, Allah era'lu emberek mendek were'ma neilenggen liagisigi o,” iluk yagaisasikhe.

⁵⁷ A'nogo yagaisasikhemo, it omanogo inane a'mit sup isukwasik he, inenggi inesanggo te'merogo, fungusek ambineat oba hop-hop kwisukwa.

⁵⁸ Oba hop-hop kwisukwasik, o kota nen leget endakwe hambokhogo wulakfesukwasik he, helep oba tamuk-tamakhogo watukwa. Ebe wasuogeluk he, irat ane ugunem inesanggo holhukwasik, wene oba fesukwa mene omanogo inasu endakwe mene nonggologo re, ap alage mene enu Saulus awe a'ma fesukwa.

⁵⁹ Fesukwasik he, ebe helep oba watu kwelek, at Stefanus a'nogo Yesus enu hombuk palhi logolik he, ”Yesus noe. Nareagun haren wo'nabime o,” iluk isikhe.

⁶⁰ A'nogo ikhi logolik, eindep awi yagaisogo hu'lagaikhe. Hu'lagaikhesik, ane hokhorogoat he, mel isikhe: ”Noe. Ap an weagetnafa mene yoma, wene inoba fugun o,” iluk yagatikhesik ebe arat wa'lagaikhe.