KISAH PARA RASUL 28 - Allah Wene Fano Wene Hupla Inane

At Paulus i alonggenma enu Malta logolik hilingiti lagaikhe wene

¹ Ninebe telogo i aik oba wulifugusik were'ma, it afuni andoma mene nen, ”O i alonggenma yi enu Malta,” iluk yaganisasukwa.

² Yaganisasukwasik, inendawimo inagaiyekhogo anggilukhogo wo'ninafukwasik, o meiso wagaikhemo re, sogoi en endu nonggwalogo sogoi sakhoageluk ninobagasukwa.

³ Endu nonggwalogo ninobagasukwama logolik, at Paulus nen hali sele hokhorogo andoget fesikhesik he, endumo nolfugunem kisu ekhe endu aigen wulibi wagaikhesik he, Paulus enggiba aigen hundugurek mondok kamo isikhe.

⁴ Enggiba hundik were'ma, afuni inawiwerek mene omanogo ineilenggen hasukwasik, it-it ikhi logolik he, ”Ap yi re, afuni inoare mene o. Ima nen telogo wulibi waga meneat he, tugwi kembu enu Unggum, afuni inebe inoaterek mene a'nogo nen, at ebe eluk logogin lek, iluk, wate yi,” iluk isukwa.

⁵ A'nogo ugu kwelek he, Paulus ebe weak agik, wa'lagik, igi'lek logolik, kisu a'nogo enggi nen filikhogo endumo kwelakfisasikhe.

⁶ A'nogo hilingitikhemo, it afuni omanogo nen he, ”Ebe fisigin he a? Athe, misigamat talorogo wa'lasigin he a,” iluk anggasukwasik, ineilenggen welagaukwa-welagaukwa, ebe a'nogo hilinglagi'legen he, ”Ebe hun kembu aru,” iluk isukwa.

⁷ A'nogo hilingituguba nen, o horok andoma, ap kain enu Publius anggweang eisewerek mene, nit ap pok mene oba lagagumo, aren he, ninebe fanorogo wo'ninafikhemo, ninenggi henagan at ninom welagagu.

⁸ O at were'ma andoma, at eisena oba aganhan agaikhesik, a'ma forok laga logolik he, wengik mondok welagaikhe. Wengik were'ma, at Paulus oba kwisikhesik he, enggi fakhasikhesik Allah ayonggo fesikhemo, oba fano agaikhe.

⁹ A'nogo fano agaikhemo, it afuni o i alonggenma andoma mene ou wanhi lagaukwa mene ekhe Paulus oba wagaukwama, higirinafunem inoba fano agaukwaat.

¹⁰ A'nogo higirinafi lagaikhemo, it afuni omanogo nen, agaukhogo hai warogo yi mene ti mene hokhorogo wo'nisasukwasik he, hobuk nit o andoma herakfisaluk wesuogeluk ugunem, yi mene ti mene kwe henengge wo'nisasukwaat.

At Paulus o Malta nen o Roma wagaikhe wene

¹¹ O andoma logolik, tugi henagan watugusik he, e so ekhe unggulkwe hun kembu hulipmio mene ilirenggerogo fesukwa mene, o Aleksandria nen attagat waluk wagaukwasik, o weak weregen i alonggenma andoma welagaukwasik, yoma wesuogeluk ugunem elonggoma kwisugu.

¹² Kwisugusik o andoma nen o Sirakusa wagagusik he, ninenggi henagan welagagu.

¹³ Welagagusik, o andoma nen, e soba i esanggokwe nen o kota enu Regium wagagu. Wagagusik were'ma, ohealekwe sogoi i laut higiren funha waga lagaikhemo re, o age hak, o kota enu Putioli wagagusik kweangma wulifugu.

¹⁴ O Putioli andoma Allah againafuri mene ekhe were'ma ninom ambi agagusik, iren he, ”Ninom logouwogo,” iluk ninayonggo fesukwama, ninenggi 7 nen ninom welagagu. Welagagusik o andoma nen o kota Roma wesuogeluk wagagu andi.

¹⁵ Wagunem, it afuni ekhe nen, ”It weri'lagwi,” iluk isukwama, Allah againafuri o Roma mene nen inesanggo holhukwasik, ninelokhoma, it ekhe Pasar Apius, lagu kwelek, ekhe o hotel ap pok mene we'luk nogo agarek oba o ebe henagan wuri'mo andoma lagaukwama, at Paulus eilenggen isasikhesik he, Allah hai watikhesik endawinggen yamuk isikhe.

At Paulus o Roma wagaikhesik logolik hilingitikhe wene

¹⁶ Andoma nen o kota Roma arat wagagumo, it ap kaindegen he, ”Paulus ale'ma logouwak. Werek kwelek, ap tentara mene misigaren kagalek logouwak,” iluk isukwa.

¹⁷ A'nogo isukwama, ninenggi henagan welagagusigen he, at Paulus nen, it afuni Yahudi mene inogogwi kaindek andogosi wesuageluk inayonggo fesikhe. Inayonggo fesikhemo, inebe arat andogosi wagaukwama, aren he, mel yagaisasikhe: ”Nagaila'lak. An nen, afuni nit mene weak ekhe hilinginafi'lek. Nen, niren ninombalak hilingiti lagaukwa andi hak hilingitorek andi mene herakfisaluk weak hilingiti'legat. A'nogo meneat he, o Yerusalem andoma nen nebe faknobagasukwasik, nenggi hele warogo, afuni Roma mene inenggiba nobagasukwa.

¹⁸ A'nogo nobagasukwama, it ap kaindegen wene ero herati logolik he, ap yi re, ebe wasu mene hak wene oba werek lego iluk, hele fikhalogo nobagauwogeluk isukwa.

¹⁹ A'nogo isukwa meneat he, it ap Yahudi mene nen he, lego, iluk inane ninghogoat isukwa andi nen, an nen he, wene noba faga mene yi, Kaisar en ero heragaisogo elugun wasuago, iluk yagaisasigi. A'nogo isigi andi re, an nen wene ekhe it nagaila'lak inoba feigeluk isigi lego.

²⁰ Nit afuni Israel mene nen he, ap ekhe wesigin o, iluk ninendawinggen at oba eberek welagorek a'nogo fagerat nenggi hele warogo nobagasukwama welagi yi. Andi nenat he, hit hinebe noba wagunem wene yagahisageluk hinayonggo figi andi o,” iluk yagaisasikhe.

²¹ A'nogo yagaisasikhemo, iren he, ”Afuni o Yudea andoma nen lisu hat faget ninoba lakfei wagi'lek. Nen, nit ninagaila'lak ekhe o andoma nen wagaikhasik, wene hat faget yaganisigik, habok weak igik, i wagi'legaro.

²² Mene re, wene hat wanhendik hilingiti lagen andi faget, afuni o yi awi ti awi mene nen, wene andi weak, ugunem enek he, ninesanggo holhi lago andi nen, wene haren eberogoat anggikhi lagen mene andi honggwaregen nit yaganisugunem ninesanggo holugun ninamolo o,” iluk yagatukwa.

²³ A'nogo yagatukwasik, ”Nit ninenggi yiba nen hobuk hoba wesugun o,” iluk wene waretukwa. Wene waretukwasik he, inenggi andiba inebe hokhorogo o Paulus welagaikheba ambit wagaukwa. Wagaukwama, ohealegen pikhit hubanggo wene Allah awe a'ma fisikherek wene a'nogo yagaisikhoat welagaikhe. Yagaisikhi logolik, iren Yesus hilingitikhe wene andi eberogoat iluk futfouwageluk, wene Allah nen komotninafikhe wene Musa nen lisu palogo fesikhe a'nogoba inom, ap ekhe Allah ane yagaisikhi lagaukwa mene nen lisu palogo fesukwa a'nogoba inom, komorinafi lagaikhe.

²⁴ A'nogo yagaisugunem he, it fena wene andi eberogoat iluk futfesukwa. Meneat he, it fena futfigi'lek.

²⁵ A'nogo hilingitukwasik, it-it inane hunogo tomok wene palik-palik puguluogeluk ugunem he, at Paulus nen wene misigat ekhe yi yagaisasikhe: ”Wene Allah Areagun en Yesaya nen ninombalak yagaisoageluk yagatikhemo, yagaisikhi lagaikhe andi, higirat higi:

²⁶ Allah nen he, Afuni andoma inoba laluk, wene yi yagaisugunem, Inesanggo holek logogun meneat he, furogo futfikhi logogun lego. Nen, ineilenggen yerogo logogun meneat he, furogo hikhi logogun legaro.

²⁷ It afuni yi, ineilenggen higik, inesanggo holhik, inendawimo ebetik, imbigen, inobabut hebelumo hobuk an nen fanorinabinogo iluk he, iren inendawimo puk agik, inesanggo tagum-tagum hilingitik, ineilenggen mum asuageluk ineranenat mumeratik, hilingitukwa o, iluk Allah Areagun en isikhemo, Yesaya nen lisu palhikhe andi,” iluk yagaisasikhe.

²⁸ A'nogo yagaisasikhesik, wene elugun warogo re, mel yagaisasikhe: ”A'nogo isikhe andi nen, wene yi hinelu asubagaigeluk yagahisak: Allah nen he, afuni ekhe nen, aren telinaferek wene andi, it afuni endakwe mene yagaisa loageluk inayonggo fikhemo yagaisili'lagwi. It a'nogo yagaisugunem, inesanggo hologo hilingisugun o, iluk hinelu asubagaigeluk yagahisigi andi o,” iluk Paulus nen yagaisasikhe.

²⁹ [A'nogo yagaisasikhemo, it ap Yahudi mene omanogo pugulhi logolik he, it-it wene hokhorogo palik pugulhukwa.]

³⁰ At Paulus o Roma andoma logolik, o ekhe elama faget logoigeluk onggo palhikhesik, 2 tahun andoma were'ma re, afuni hokhorogoat at houwogeluk oba waga lagaukwa. Wagunem, aren inebe mondogat fano woginafi lagaikhe.

³¹ A'nogo woginafunem, it ekhe nen wenageti'lek werek kwelek, at ailo lek fakhogoat wene Allah nen awe a'ma fisikherek wene a'nogo yagaisigik, Tuhan Yesus Kristus hilingiti lagaikhe wene a'nogo yagaisigik, ikhi lagaikhe.