KISAH PARA RASUL 24 - Allah Wene Fano Wene Hupla Inane

Ap Yahudi mene nen wene Paulus oba fesukwa wene

¹ A'nogo yagaisasikhesik, inenggi 5 nen welagaukwasik ekhe were'ma, it ap Allah eisewerek mene inoe kain Ananias inom, inaluendek omanogo ekhe inom, ap ekhe wene fano nek ikhi lagaikhe mene enu Tertulus inom o Kaisarea wagaukwa. Wagaukwasik he, ap kain gubernur Feliks a'nogoba kwisukwasik, wene Paulus oba fouwogeluk yagatukwa.

² A'nogo yagatukwasik, Paulus ebe wolhasukwasik he, Tertulus nen wene oba fouwageluk, yagatukwama, aren Feliks mel yagatikhe: ”Gubernur Feliks noe. Haren fetninarek werek kwelek he, nit yoma attagaren weim lek liolek welago. Afuni nit mene faget he, hendawimo kagalek logolik, higithogo hilingiti lagen andiba yi wene ti wene fano ari'logo.

³ Haren o yi awi ti awi hundik-handik fanorogo hilingiti lagen andi nen niren, fano, iluk hai mondok wathafi lago. Noe.

⁴ A'nogo mene re, an nen wene uan yagahetunem habit asinogo iluk, wene horogat yagahesigin yi, hobabut fano a'nogo re, hesanggo holinogen, wene ebe yagahesik.

⁵ Ap yi nen he, afuni weagerinabik nugunem, obabut palho. It afuni ap Nasaret mene a'nogo ombo'ne lili'lagwi mene inoe kain logolik he, afuni Yahudi mene o yi awi ti awi welagaikharek mene mondogat inendawimo kagalik nikho.

⁶ A'nogo inendawimo kagalik nikhi lagasik he, o Allah awi wurik weagetfeigeluk ugunem ebe fakfogo. [Fakfogosik he, wene nit afuni Yahudi mene hilingitorek meneba anema wanuogeluk ogo.

⁷ A'nogo meneat he, ap tentara mene inoe kain Lisias a'nogo wagasik he, ebe ninenggimo nen telogo waluk lagasik yoma lakfei waga andi.

⁸ A'nogo lakfei wagasik, wene ap yi oba fogo mene ninebe hat hoba wesuageluk yaganisikhemo wago yi.] Niren wene oba fogo mene andi, haren anema wanhi logolik, helu asigin aro,” iluk yagatikhe.

⁹ A'nogo yagatikhemo, it ap Yahudi mene fena omanogo nen ogo re, wene at oba fikhi logolik he, ”At Tertulus nen ikhe andi, eberogoat ikhe o,” iluk yagatukwa.

Paulus ebe elelerogo, at Feliks yagatikhe wene

¹⁰ Iren wene a'nogo isukwama re, at kain gubernur a'nogo nen wene Paulus nen ekhe uageluk enggi tum piling yagatikhe. Yagatikhemo, aren he, ”Noe. Afuni nit mene, yi wene ti wene inoba fugunem, attagaren yi tahun ti tahun haren inanema waganogo wene inoba figik, kotik, ikhi lagen andi an nelu o. Andi nen, wene an noba faga andi, le'maat, iluk, nebe elelerogo harat yagahesigin yi nen, nendawimo nagaiyek hikhi lagi.

¹¹ An Allah fogerasigeluk o Yerusalem kerat lagiri'mo nen, ninenggi 12 enek welago, ma re, haren, eberogo ara? lega, iluk it heinok wogisamo helu asigin aro.

¹² An o Allah awi wuri'mo kwigirik inom, o afuni Yahudi mene samban agarekwe kwigirik inom, o silimo ekhema wulibi lagarik inom, afuni ekhe ninom ninane sagalhik, nen, it ekhe inane hokhorogoat sagaluageluk inendawimo kagalhik, igi'lek. A'nogo hilingitunem it ap Yahudi mene nen ineilenggen niigi'legaro.

¹³ It ap yi nen wene noba fili'lagwi andi re, eberogoat hilingitemo, iluk nena mene inukheogoin. Inukheogoin legat asigin o.

¹⁴ Mene re, wene eberogoat hilingiti lagi mene ebe yi fakhogo yagahesik. Iren he, Afuni Yesus ombo'ne lili'lagwi andi weak, iluk agarek. Meneat he, an enek he, iren, weak agarek mene andi ane hologo, Allah nit ninombalak awe a'ma kwisukwasik welagaukwa mene andiat fogerati lagi andi nek he, eberogoat hilingiti lagi aro. Fogerati logolik, wene Allah nen komotninafikhe wene andi inom, ap at ane yagaisikhi lagaukwa mene inane inom, mondogat lisu palogo fesukwa mene werek andi, eberogoat iluk fisogo welagi.

¹⁵ It ap yi nen he, afuni fano hilingiri'lagwi mene inom, weak hilingiri'lagwi mene inom, inebe wa'lasimbik were'ma eberogoat Allah nen inelugerinabigin, iluk inendawinggen Allah oba himbirik werek andi hak, an a'nogoat welagi o.

¹⁶ A'nogo logolik, nendawimo nen he, weak ekhe hilingiti, iluk nendawimo engginhogo welagi hanogoluk he, Allah elokhoma inom, afuni inelokhoma inom horek logoigeluk nomamerogo hilingiti lagi o.

¹⁷ An mo lagagik, pigik, tahun hokhorogoat o Yerusalem lagi'lek welagarik he, nerugwi nagaila'lak ninebe misigat mene iluk, uang ekhe leberisigik, Allah faget ekhe fisigik, igeluk lagi.

¹⁸ Lagirik he, a'nogo hilingiti logolik, o Allah awi wuri'mo kuogeluk inebene horatarek andi hagat a'nogo horatirigen kwigi. A'nogo hilingiti andi, afuni hokhorogoat ninom kwigi'lek. It ekhe ninom ninane sagalhi'legat were'ma it Yahudi mene nen ineilenggen neaga aro.

¹⁹ We, it ap Yahudi mene ekhe o propinsi Asia nen lagaikhasik andoma welagaikha. A'nogo were'ma neilenggen isigimo re, irenat wene noba fogoin halok he, hat hoba ya wesimbigen wene noba fou mene.

²⁰ It inebe lek halok he, it ap yoma werek mene nen uago. Afuni nen it ap Yahudi mene Allah faget wene ero pilingitarek mene inoba nobagai lagaikhasik, andoma mendek werek kwelek wene ero herata. A'nogo heratunem, an weak hilingiti mene ekhe eberogoat inesanggo holha mene nenat uago.

²¹ An andoma mendek logolik, wene misigat yi nek nane hokhorogo yagaisigi andi: Afuni wa'lagaikharek mene Allah nen eberogoat inelugerinabigin, iluk futfikhi lagi andi nen, wene noba fikhi lagep yi, iluk yagaisugunem enek he, inesanggo holha andi,” iluk yagatikhe.

²² A'nogo yagatikhemo, at Feliks afuni Yesus ombo'ne lagaikharek wene andi elu andi nen he, Paulus mel yagatikhe: ”Yogondak wene arat ogo. Hobuk ap tentara inoe kain Lisias a'nogo ebe waga halogen, wene hoba faga mene andi, an nen wene ero heragaisogo elugun wasigin o,” iluk yagatikhe.

²³ A'nogo yagatikhesik, at agoromi tentara kain mene ekhe nen Paulus ebe kagalek logouwageluk mel yagatikhe: ”Haren Paulus fisogo logolik, serogo nikhi logouwageluk herakfisano. Nen, afuni at mene nen yi mene ti mene at amolo mene lebethouwogeluk ugu halok he, wenagisagun o. Herakfisikhi logoino,” iluk komoratikhe.

Paulus ebe ap Feliks inom, he Drusila inom, inoba waluk lagaukwama yagaisasikhe wene

²⁴ At Feliks nen a'nogo, ”Kagalek logoino,” iluk yagatikhesik, inenggi endebat welagaukwasigen, at agwe enu Drusila he ebe Yahudi mene. Waluk wagaikhesik he, agoromi nen Paulus wani loageluk yagaisasikhemo lagaukwasik ebe waluk wagaukwama re, at Paulus nen afuni inendawinggen Kristus Yesus oba himbirik welagaikharek wene andi yagaisugunem, Feliks esanggo holek welagaikhe.

²⁵ A'nogo holek werek kwelek, higithogo hilingiti logogun wene andi inom, inendawinggen sebelek logogun wene andi inom, hobuk Allah nen afuni inanema waganogo wene inoba figik, kotik, igin wene andi inom, yagaisugunem, Feliks ailo agaikhe. Ailo agaikhesik he, ”Yogondak wene arat egen o. Hobuk ugun mene higit aga halok he, wolheagain o,” iluk ambotkwe lakfesikhe.

²⁶ A'nogo lakfesikhesik, endawimo nen he, ”Paulus nen uang ekhe wo'nesigin he a,” iluk anggikhi logolik, hundik-handigat wolhaluk he, weneane emberek ikhi lagaukwa.

²⁷ A'nogo ugu werek kwelek, mo lagagik pigik 2 tahun welagaukwasigen, hobuk Feliks obali'mo ap ekhe enu Perkius Festus gubernur asuageluk menfesukwa. Menfouwogeluk ugunem, at Feliks nen he, ”It afuni Yahudi mene inendawimo fanorogo,” iluk Paulus enggi hele waregat herakfesikhe.