KISAH PARA RASUL 20 - Allah Wene Fano Wene Hupla Inane

Paulus o Makedonia wagaikhesik, pikhit o afuni Yunani mene inaiba wagaikhe wene

¹ O kota Efesus inane hokhorogo sagalhi lagaukwa a'nogo lek agaikhemo, at Paulus nen he, it afuni Yesus ane wanhukwa mene omanogo wolisasikhesik he komorinafikhe. Komorogo hai warinapluk he, ebe o propinsi Makedonia wagaikhe.

² O Makedonia andoma nikhi logolik he, wene hokhorogo yagaisikhi logolik, inendawinggen ago warinabik nikhi lagaikhesik, o afuni Yunani mene inaiba wagaikhe.

³ Wagaikhesik, tugi henagan andoma welagaikhe. Andoma welagaikhesigen, hobuk i agum ebene nen e soba o propinsi Siria lageluk fougetunem, afuni nen he, mel yagatukwa: ”It afuni Yahudi mene nen hoasuogeluk habok palhasik werego,” iluk yagatukwama esanggo holhikhesik, sugulogo re, o propinsi Makedonia kwe nen lageluk isikhe.

⁴ Lageluk ugunem, ap Sopater, Pirus amlogo, awi o Berea mene inom, Aristarkhus, Sekundus emberek inawi o Tesalonika mene inom, Gayus awi Derbe mene inom, Timotius inom, Tikhikus Trofimus emberek inawi o propinsi Asia mene inom, inom lagaukwa.

⁵ It tak lagaukwasik he, o Troas andoma yetninarek welagaukwa.

⁶ A'nogo yetninarek werek kwelek, afuni Yahudi mene Linggene Seni Roti Fiterek lek mene a'nogo nasukwama nen, nit o Filipi nen i agum ebene e soba o Troas laga logolik, nogo ninenggi 5 nen iluk, it o Troas were'ma isa lagagusik, andoma logolik nogo ninenggi 7 nen isugu.

Paulus wurep kobokhogo afuni o Troas mene isilik laga logolik hilingitikhe wene

⁷ Nit o andoma logolik, Allah faget weat welagagusik he, hubanggo sumburu roti mene ninerugwi ninagaila'lak ninom nuogeluk andoget fuluk, at Paulus nen wene yaganisikhi lagaikhe. Ohealekwe arat louwogeluk andi nen he, wene uanat yaganisikhi logolik, hubanggo hup tulemat yaganisugu mondok welagaikhe.

⁸ O henambo hokho wuri'mo andogetuguba andoma, esage lampu hokhorogoat ibilik welagaikhe.

⁹ A'nogo andogosugusik he, ap alage mene ekhe enu Eutikhus, jendela ambe pale'ma hurek welagaikhe. Hurek logolik he, Paulus wene uanat ikhi welagaikhe andi nen, nogo eil agaikhesik he, kunalek nogo isikhe. Nogo ugunem, o henambo silama henagan sep hun-hun wuri'mo ebe ponggwe andoma nenat tunghogo pile pi wagaikhe. Pile pi wagaikhemo, ineilenggen ha pi wagaukwasik hambokhogo wanhunem en he, ebe pinggi warek welagaikhe.

¹⁰ Warek were'ma, at Paulus ebe pi wagaikhesik he, warek a'nogoba lenggakhogo weing lagaikhesik enggi obakhe felikhogo fisogo logolik he, mel isikhe, ”Wa'laga iluk, hinendawimo weak agubo. Ebe eluk werek,” iluk yagaisasikhe.

¹¹ A'nogo yagaisaluk ambotkwe lagasikhesik he, sumburu roti mene kurogo nasukwasik wene uanat yagaisikhi lagaikhesik he, o wei isikhemo Paulus ebe o ale'ma lagaikhe.

¹² Lagaikhemo, ap alage wa'lagaikhe mene a'nogo eluk agaikhemo aiba fei lagik, eluk agaikhe mene andi faget inendawiggen yamuk isikhesik, inagaiyek agaukwa.

O Troas nen he, o Miletus lagaukwa wene

¹³ At Paulus nen he, ”Hit tak i soba o Asos lani o. An kweanggwe wesigin,” iluk wene wa'nisasikhemo, nit tak i soba o Asos andoma laluk, at ebe wilik ninom louwogeluk, nit tak o Asos lagagu.

¹⁴ Lagagusik he, o andoma nen at ebe ninom ambi a'luk, ninom i soba o Metilene lagagu.

¹⁵ O Metilene nen, i agum ebene e soba lagagusik he, ohealek hak he, i alonggenma o Khios andi herakfisaluk o age hak he, i alonggenma o Samos andi kwanirogo hebisaluk he, uage hak o Miletus lagagu.

¹⁶ At Paulus nen endawimo anggikhi logolik he, ”An o propinsi Asia yoma yingitu kwelek, Pesta Pentakosta faget mondogat namo lagi hanogo iluk, o kota Efesus kwigi'lek pikhit o Yerusalem elok lambigen nogogin halok he, fano,” iluk endawimo anggasikkhesik, weak-weak lageluk isikhe.

Paulus nen afuni o Efesus mene komorogo fisaluk lagaikhe wene

¹⁷ At Paulus ebe o Miletus andoma logolik he, it ap Allah againafuri o Efesus mene kwelaginarek welagaukwa mene inebe wesuageluk wene warogo lakfesikhe.

¹⁸ Wene warogo lakfesikhemo inebe wagaukwama re, at Paulus nen, mel yagaisasikhe: ”An attak o propinsi Asia wagagi andi huli nen, ninom mondok logolik hilingiti lagi mene hinelu o.

¹⁹ It afuni Yahudi mene nen nebe noasuogeluk nabok palhi logolik weak hilingnafu kwelek, nonggwaregen nendawinggen sebelogo fogerakhigi'legat, le hokhorogo aga logolik he, Tuhan Allah awe a'ma logolik at faget hilingiti lagi hineluaro.

²⁰ A'nogo hilingiti logolik he, wene hit yagahisagain mene kamo igi'lek afuni andogorek were'ma yagahisigik, hinawilokwe lombok yagahisigik, ikhi lagi a'nogo hineluaro.

²¹ An nen afuni Yahudi mene inom, Yunani mene inom, komothinafi logolik he, weak hilingiti lagep mene herakfisaluk, hinobabut hebelasimbik he, hinelokhe Allah wogo'ni o. Wogosimbik he, hinendawinggen Tuhan Yesus oba himbiret fuluk logobagaigeluk yagahisikhi lagi andi.

²² Mene re, yogondak Allah Areagun nenat nendawinggen kagalhemo, ane hologo, o Yerusalem lageluk ikhi lagi yi. Andoma lamo nen ninggi'nogo hilingnabugun he. An nonggoraro.

²³ A'nogo nonggot meneat he, an o kota ekhe nen ekhe lagik igirek andoma mondogat at Allah Areagun en he, henggi hele watik, yi enggin ti enggin hoba figik, ugun o, iluk yaganeterek andi nek nelu o.

²⁴ A'nogo meneat he, an nebe neluk logogin andiat esin iluk andi mene esinet fikhi lagi lek, we Tuhan Yesus nen nayonggo fikhi logolik, aren he, Allah obabut fano nen hilinginaferek wene fano wene andiat yagaisilik lano o, iluk nayonggo fesikhe andiat wurep oba kobokhogo hilingisigeluk esinet fikhi lagi o.

²⁵ An hit nerugwi nagaila'lak mondogat wene Allah awe a'ma kuluk logogun wene andi yagahisilik nikhi lagi andi re, huli yogondak yaba nen he, hiren hobuk nelokhonggen hineilenggen neogoin lego, iluk an nonggwarek nelu.

^26-27 A'nogo Allah endawimo anggasikhe wene andi, an nendawimo kamo igi'lek mondogat fakhogo yagahisigi andi nen, hit ekhe hobuk nongagep halok he, wene an noba lego, iluk yagahisigi.

²⁸ Wam domba wam kwalogo welagaikharek andi hak, hiren Allah againafuri kwelaginarek logouwageluk, at Areagun en hinayonggo fesikhemo, kwelaginarek logolik he, hinonggwarek hinebe hebelogo logoino o. A'nogo hinebe hebelogo logolik he, Allah againafuri yoma, at onggwarek amlogo amep oba woginafikhemo inebe at onggwarek againafuri werek, iluk fanorogo kwelaginarek logoino o.

²⁹ Mene re, mene olo mene aik anini weak mene nen wam herakfigi'lek mondok ninggerek andi hak, an nebe lamo nen, it ekhe nen Allah againafuri hiren kwelaginarek welagep mene andi weagerinabi kwi wesugun mene werego, iluk an nelu.

³⁰ A'nogo weagerinafu kwelek he, ap hit mene ekhe menla'luk he, afuni Yesus ane wanhukwa mene lisogo woginabuogeluk, wene weak wene yagaisikhi logogun aro.

³¹ Hinendawinggen wenggelogo logoino! An o mo lagagik pigik ugu kwelek 3 tahun ninom logolik he, kamo igi'lek linggene nen, hubanggo nen, le aga logolik, hinebe lombok komothinafi lagi a'nogo, hinendawimo eberek logoino o.

³² Wene Allah obabut fano nen wo'ninaferek wene andi hinenggi ninghogo fisogo logobagaigeluk, yagahisigi. Yogondak he, at Allah omame werek mene nen, wene andiba hinendawinggen wurigethinafik, yi mene ti mene at againafuri wogisageluk fisasikhe mene wokhisigik, elok hilingisigin mene enggiba hinobagagi o.

³³ An nendawimo nen, hit hinagarek uang emas mene inom, perak mene inom, hinasu inom, namolo e, iluk ekhe anggigi'lek.

³⁴ We, an inom, ap an nagoromi nombo'ne nikharek mene inom, yi mene ti mene legen, an nonggwarek nenggi nen heragaisogo helikhi lago andi hinelu o.

³⁵ Wene ninoe Tuhan Yesus onggwaregen mel yaganisasikhe andi: It afuni ekhe nen wokhisugunem helaluk hinendawimo agaiyek hakhogoin elo'lego. We, athe, hit hinonggwaregen it ekhe wogisikhi logolik hinendawimo agaiyek hakhogoin o, iluk yaganisasikhe andi ninendawimo eberek logolik he, an nen it ekhe inomame lek mene leberisikhi lagi andi, hiren futnobagambik an nobabut waganogo hinenggi omamerogo leberisikhi logobagaigeluk hinelurogo hilingiti lagi andi,” iluk yagaisasikhe.

³⁶ A'nogo yagaisasikhesik he, eindep awi yagaisogo nen, it mondogat inom logolik samban isikhe.

³⁷ Samban isikhemo re, it mondogat le aga logolik he, Paulus ebe obakhe felikhogo fakfesukwasik, inambe saluk hai wati logolik, hai warogo lakfesukwa.

³⁸ Samban oan igi'lek logolik, at Paulus nen he, ”Hiren an hobuk nelokhonggen hineilenggen neogoin mondok lego,” iluk yagaisasikhe mene a'nogo faget inendawimo ebetukwasik, inendawimo mondok weak agaukwasik he, ebe hai warogo waluk e so a'nogo were'ma lagaukwa.