KISAH PARA RASUL 17 - Allah Wene Fano Wene Hupla Inane

O Tesalonika nen inane hokhorogoat sagalhukwa wene

¹ At Paulus Silas emberek o andoma nen he, o Amfipolis nen Apolonia nen pikhit o kota Tesalonika wagaukwa. O Tesalonika andoma re, o afuni Yahudi mene samban ikhi lagaukwaba ekhe wurik welagaikhe.

² A'nogo wurik were'ma, at Paulus o samban agarek oba wurik werek halok kwikhi lagaikhe higithogo inoba kwisikhesik he, 3 minggu inenggi Sabat oba inom andogoti logolik wene Allah ane lisu palek a'nogoba inendawimo kagalogo heinok wogisigik iren onggo yagatik, ikhi lagaukwa.

³ Allah ane lisu palek a'nogoba furogo yagaisikhi logolik, mel yagaisikhi lagaikhe: ”At Kristus Allah nen lakfei wesigin iluk isukwa a'nogo re, yi enggin ti enggin hilik-hilik wa'lasimbigen, eluk asigin, iluk isukwa. It isukwa andi hagat, at Yesus hilingitikhe wene abok yagahisikhi lagi mene yi, hilingisu higithogoat hilingitikhemo. Allah nen lakfei wesigin iluk isukwa andi, ebe re, Yesus andi aro,” iluk yagaisasikhe.

⁴ A'nogo yagaisasikhemo re, it afuni fenakwe nen, ”Eberogoat,” iluk wene andi wanhukwasik, it Paulus Silas werekwe asi lagaukwa. Andi hagat, it afuni Yunani mene Allah ane wanhukwasik inebe Yahudi mene hangge welagaukwa mene hokhorogoat it werekwe asi lagik, hemi kaindek mene inebe hokhorogoat it werekwe asi lagik, isukwa.

⁵ Inebe hokhorogoat it Paulus Silas emberek werekwe a'nogo asi lagunem, it afuni Yahudi mene inendawimo inabiretfesukwama, it ap inobabut weak mene o silimo weat were'ma inebe woginafukwasik he, esa fologo afuni o kota Tesalonika andoma mene inendawimo kagalik lagaukwama, wene hokhoat wo'lagaikhe. A'nogo hilinglagaikhemo, at Paulus Silas emberek inenggi lisogo afuni hokhorogoat inoba woginarek louwogeluk, heraginabik esa fologo o ap Yason were'ma o lasi lagaukwa.

⁶ Lati logolik, Paulus lak inebe legen he, Yason inom, Allah againafuri fenakwe inom, inenggi lisogo ap kaindek pemerintah mene inoba woginarek wagaukwa. Woginarek wagaukwasik, inane hokhorogo mel yagaisasukwa: ”Ap o yi awi ti awi elokhonggen weaget arik nikharek mene omanogo yoma wagaikhama re,

⁷ at Yason yi nen woginafemo. It ap andi nen he, Ninoe Kain Enupogot hunogoat Yesus werego, iluk, ninoe kain Kaisar ane herakfisili'lagwi o,” iluk yagaisasukwa.

⁸ A'nogo yagaisasukwama, it ap kaindek pemerintah mene inom, afuni inebe hokhorogoat omanogo inom, ina'mage lagasukwa.

⁹ Ina'mage lagasukwama re, it ap kaindek pemerintah mene omanogo nen Yason lagen onggo wogisoageluk yagaisasukwama, wogisasukwama re, inebe inenggi hele fikhalogo wulakfisasukwa.

Paulus lak o Berea wagaukwasik hilingitukwa wene

¹⁰ A'nogo wulakfisasukwama, o hubagaikhemo re, it Allah againafuri nen Paulus Silas emberek o Berea lakfisa wagaukwa. Lakfisa wagaukwama wagaukwasik he, o afuni Yahudi mene samban ikhi lagaukwaba kwisukwa.

¹¹ It afuni Yahudi o Berea mene inobabut he, afuni o Tesalonika mene inendawimo puk welagaukwa andi hak he, lek. We, it he, wene anggilukhogo wanhi logolik, ”Wene ikhe andi eberogoara? Lega,” iluk, Allah ane lisu palogo fesukwa mene a'nogo hundik-handigat enu salogo furogo kumuthikhi lagaukwa.

¹² A'nogo kumuthiki logolik he, afuni Yunani mene inogogwi kaindek inom, hemi inom ap inom inebe hokhorogoat inendawinggen Yesus oba eberogoat himbiret fesukwa.

¹³ A'nogo himbiret fesukwama re, afuni nen inabok ikhi logolik, ”Paulus nen he, Allah ane o Berea yagaisili'logo,” iluk ugunem he, it afuni Yahudi mene o Tesalonika welagaukwa mene omanogo inesanggo holhukwasik he, wagaukwa. Wagaukwasik he, afuni hokhorogoat omanogo weak hilingisuageluk inendawimo kagalhik, nonghonget fisigik isukwa.

¹⁴ A'nogo isukwama, Silas Timotius emberek, o andoma kamo ugu kwelek, it Allah againafuri omanogo nen, Paulus enek, ”Weak-weak lanok,” iluk waluk i laut hokho yenggelek aik oba wagaukwa.

¹⁵ A'nogo wagaukwasik i agum ebene nen waluk o kota Atena wagaukwa. Wagaukwasik inambotkwe o Berea louwogeluk ugunem, at Paulus nen he, ”Silas Timotius emberek noba weak-weak wesuak,” iluk wene warogo lakfisasikhemo lagaukwa.

Paulus o Atena logolik hilingitikhe wene

¹⁶ At Paulus, Silas Timotius emberek faget nenangorogo o kota Atena andoma logolik he, o andoma tugwi kembu awi wurik mondok hokhorogo were'ma eilenggen hasikhesik, endawimo mondok weak agaikhe.

¹⁷ Endawimo weak agaikhesik he, hundik-handik o afuni Yahudi mene samban ikhi lagaukwaba kwisikhesik, it Yahudi mene inom, hunogo mene Allah ane wanhukwasik Yahudi mene hak welagaukwa mene inom, aren wene inendawimo kagalogo yagaisugunem, iren at onggo yagati lagaukwa. A'nogo ikhi logolik he, afuni pasar onggo wanharek oba laluk, afuni inom ambi a'luk, aren wene inendawimo kagalhunem, iren onggo yagatik ikhi lagaukwaat.

¹⁸ A'nogo ikhi logolik he, aren it afuni wene Epikuros wene fisogo logolik it ekhe yagaisikhi lagaukwa mene inom, wene Stoa wene fisogo logolik, it ekhe yagaisikhi lagaukwa mene inom, wene inendawimo kagalogo yagaisugunem, iren onggo yagatik, iren at yagatunem, aren onggo yagaisigik, ikhi lagaukwa. A'nogo ikhi lagaukwa mene ekhe nen he, at Paulus faget mel isukwa: ”Athe, wene elu nogo? Onggot. We, endebat elu logoligat he, ane nek mondok hokhorogo yaganisili'logo,” iluk isukwa. A'nogo isukwama, it ekhe nen he, at Paulus nen fano wene yagaisikhi logolik he, Yesus nen hilingitikhe wene yagaisigik, afuni wa'lagunem en Allah nen inelugerinaferek wene yagaisigik, ikhi lagaikhe andi nen, mel isukwa: ”Afuni hunogo mene inawesa wene faget yaganisili'logo he a,” iluk isukwa.

^19-21 A'nogo isukwasik, it afuni o Atena andoma inawiwerek mene mondogat inom, ap pok mene andoma welagaukwa mene inom, inobabut he, hunogo mene hilingiti'lek, we, wene kerat waluk wagunem inesanggo holhik, wene ebe pilingitik, ugu mondok logou inamolo welagaikharek andi nen, Paulus ebe waluk he, afuni o Areopagus wene elugun watarek oba andoma andogotunem inoba waluk lagaukwasik he, mel yagatukwa: ”Hat wene ket mene waluk wagendik yaganisikhi lagen andi re, nit ninesanggo holhi logolik, hunogoat mene anggikhi lago andi nen, nit wene andi ebe ninggi'nogo mene, iluk furogo ninelu asugun ninamoloat,” iluk yagatukwa.

²² A'nogo yagatukwama, at Paulus ebe ap kaindek o Areopagus andoma andogotukwa mene omanogo, inanggele'ma tulem menlagaikhesik he, mel yagaisasikhe: ”Ap Atena mene yi sani. Nogogwi nagaila'lak. Hit he, yi mene ti mene faget hilingisuogeluk he, tugwi kembu andiat hinendawinggen tulem were'ma hinobabut palhi lagi.

²³ An o hit hinawi sili yoma nikhi logolik, o wesa hilingiti lagepkwe neilenggen hilik nikhi logolik, tugwi kembu ekhe awi wuri'mo anggo warogo fisikhi lagep oba andoma lisu mel iluk oba palek were'ma neilenggen higi: Yi Walhasikhe mene ninonggot mene fagero, iluk lisu palek were'ma higi. Hit hinonggot logolik fogerati lagep andi, ebe re, an nen furogo yagahisak.

²⁴ Allah nenat he, o kweang yoma walhigik, yi mene ti mene mondogat walhigik, isikhesik he, pogot kweang eisewerek kain welagarek andi. Menere, tugwi kembu awi afuni inenggi nen wutarek mene andoma anggele'ma at Allah logogin elo'lego.

²⁵ Nit afuni mondogat he, arenat ninebe nineluget ninafik, nineleage wo'nisigik, yi mene ti mene wo'nisigik, ikherek andi nen, yi mene ti mene at elagaik iluk nit afuni nen wogosugun elo'lego.

²⁶ At Allah nenat, yi afuni ti afuni o inawi lombok logouwageluk, o hulithigik, Tahun yiba logombik, tiba lek asuak, iluk hulithigik, endawimo tak anggasikhesigen, yi afuni ti afuni inunggulenu lombok mondogat wialarik loageluk, eroba re, ap misigat ekhe elalhikhe.

²⁷ A'nogo elalhikhe andi re, afuni ineilenggen mum mene nen yi mene ti mene inenggifak heratarek andi hak, afuni ninunggulenu lombogen at Allah ebe heratik, ninelu agik, uageluk elalninafikhe andi. Mene re, at ebe yatma welagarek fuk. We, ninebe lombok ninera'lu horok yaat welagarego.

²⁸ It ekhe nen a'nogoat iluk mel isukwa: At Allah omameba ebe ninom hundik nineluk logolik, kwe lagik, yi mene ti mene hilingitik, ugu mondok welago, iluk isukwa. A'nogoat wuni ap hit mene nen mel iluk felalhukwaat: Nit mondogat he, at againafuri welago, iluk isukwa andi.

²⁹ Nit a'nogo at againafuri welago halok he, at ebe hangge nit afuni nen ninendawimo anggaluk, ninenggi nen tugwi kembu emas mene, perak mene, helep mene, hilingisogo wusugun lek higi, iluk futfogoin o.

^30-31 It attak Allah ebe inonggot logolik, inobabut weak hilingitu kwelegat he, aren afe morogo herakfisikhi lagaikhe. A'nogo meneat he, yogondak ya, aren he, yi afuni ti afuni mondogat yi sambul inanema waganogo wene inoba figik, kotik, higithogoat uageluk ap ekhe wenagaisogo fuluk ayonggo fikhemo werek andi nen, he nit afuni weak hilingiti lago mene herakfisaluk ninobabut hebelasuageluk yaganisili'logo andi. Halok, niren he, wene a'nogo hilingisigin andi eberogoat iluk, nit mondogat futfouwageluk, ap andi ebe wa'lagaikhesi'mo nen, eisena nen ambotkwe eluget fesikhemo werego,” iluk yagaisasikhe.

³² ”At wa'lagaikhesi'mo nen, eluget fesikhemo werego,” iluk yagaisugunem, inesanggo holhukwasik, it ekhe nen he, Paulus endo yatukwa. Nen, it ekhe nen he, ”Wene egen andi, nit ninesanggo hobuk holuageluk henggi ekhe sambul halok yaganisagain aro,” iluk yagatukwa.

³³ A'nogo yagatukwama, at Paulus it o andoma herakfisaluk wulifikhe.

³⁴ A'nogo herakfisaluk wulifikhe meneat he, it afuni ekhe at oba andogosi lagaukwasik he, ”Wene andi eberogoat,” iluk inendawinggen Yesus oba himbiret fesukwa. It andi ekhe enu Dionisius, it ap kaindek o Areopagus andi inom andogoti lagaukwa mene. Nen, he ekhe enu Damaris, nen, it ekhe inomat a'nogo inendawinggen Yesus oba himbiret fesukwa.