KISAH PARA RASUL 14 - Allah Wene Fano Wene Hupla Inane

Paulus Barnabas emberek o Ikonium logolik hilingiti lagaukwa wene

¹ It Paulus Barnabas emberek o Ikonium andoma logolik, o afuni Yahudi mene samban ikhi lagaukwaba kwisukwasik he, wene a'nogoat yagaisasukwama, inebe hokhorogoat, Yahudi mene inom, Yunani mene inom, wene andi eberogoat iluk wanhukwa.

² Wanhukwama, it afuni Yahudi mene fena nen, wene andi inesanggo holhukwasik, eberogoat iluk inendawimo anggigi'lek mene nen he, it afuni endakwe mene Allah againafuri inabit asuageluk inendawimo kagalhi lagaukwa.

³ Inendawimo a'nogo kagalhu kwelegat he, at Paulus Barnabas emberek inenggi hokhorogoat o andoma inailo lek hogoat logolik he, wene Tuhan Yesus nen hilingiti lagaikhe wene andi yagaisikhi lagaukwa. Yagaisikhi logolik, Allah obabut fano nen wo'nisikherek wene andi, ”Eberogoat,” iluk futfouwageluk yagaisugunem, iren hilingisu lek mene elalinat hilinginafi logouwageluk, Allah nen inomamerinafi lagaikhe.

⁴ A'nogo hilingiti lagaukwa meneat he, it afuni o kota andoma mene inebe hokhorogoat minggilogo re, it fena afuni Yahudi mene werekwe agik, it fena it ap Yesus nen inebe wenagaisogo inayonggo fuluk lakfisasikhe mene omanogo werekwe agik, isukwa.

⁵ A'nogo minggilhukwasik he, it afuni endakwe mene inom, Yahudi mene inogogwi kaindek inom agaukwasik he, ”Paulus lak yi enggin ti enggin hilinginabimbik, inebe helep oba fugethigik inoasuok,” iluk inabok palhukwa.

⁶ Inabok palhukwama, it inelu agaukwasik he, heise pugulogo, o Likaonia tonggwe andoma o Listra inom, Derbe inom, o era'lukwe andoma ekhe inom, pisukwa.

⁷ Pisukwasik wene fano wene yagaisikhi lagaukwaat.

Paulus Barnabas emberek o Listra logolik hilingitukwa wene

⁸ O Listra andoma ap ekhe agaisa alabutmo nen ta'laga logolik eisok wut warek ta'lagaikhesik eisok endawi legen kwe lagi'lek hurek mondogat welagaikhe.

⁹ Hurek logolik Paulus nen wene yagaisugunem esanggo hologo were'ma, at Paulus nen eilenggen oba lurogo hikhi logolik, endawimo nen he, ”Ap ari endawimo nen he, eberogoat fano hilingnabigin, iluk anggikhesik werek higi,” iluk endawimo anggasikhe.

¹⁰ A'nogo anggasikhesik, ane hokhorogoat yagati logolik he, ”Hebe higithogo menlame o,” iluk yagatikhemo re, siakhogo menlagaikhesik kwe lagik, wagik, isikhe.

¹¹ At Paulus nen a'nogo hilingitikhemo re, it afuni hokhorogo omanogo ineilenggen hasukwasik he, it afuni o Likaonia mene inaneba mel isukwa: ”It mungwat dewa afuni higit a'luk nisa pi wagaikha,” iluk a'mit hokhorogo sup isukwa.

¹² A'mit a'nogo sup isukwasik he, Barnabas enu Zeus salhik, nen, wene Paulus nen ikhi lagaikhe andi nen, at enu Hermes salhik, isukwa. A'nogo salinafukwa andi re, iren he, ”Nit mene walhasikhe,” iluk oba himbirik logolik fogerati lagaukwa mene inenu mene salinafukwa andi.

¹³ A'nogo salinafukwasik he, ap Zeus eisewerek asunggwan awi o kota andoma esanggoma wurik welagaikhe mene nen, wam sapi ai mene inom, e enggen elokhonggen fano mene inom, waluk, o kota andoma kwagarek oba kwe ambe palek oba wagaikhe. Wagaikhesik he, afuni hokhorogo omanogo inomen, Paulus Barnabas emberek warisouwogeluk isukwa.

¹⁴ Warisuogeluk ugunem, it Paulus Barnabas emberek Yesus nen inayonggo fuluk lakfisasikhe mene omanogo inesanggo holhukwasik he, kamo uageluk, inonggwaregen inasu endakwe mene tilip-talaphogo lakfisaluk he, afuni hokhorogo andogorek were'ma inoba fungusek lagaukwa. Lagaukwasik he, inane hokhorogoat yagaisikhi logolik,

¹⁵ ”Ap yi sani. Hit ninggi'nogo hilingiti lagep. Nerugwi nagaila'lak. Nit ninebe re, hit hangge afuni meneat. Mene re, hiren yi mene ti mene we tulemat hilingiti lagep mene andi herakfisaluk he, hinobabut hebelasimbik hinelokhe Allah eluk mondok welagarek mene andi wogosubagaigen iluk wene yagahisa wago mene o. At Allah andi re, pogot inom, kweang inom, i laut hokho yenggelek inom, yi mene ti mene pogoroba, kweangma, ima welagarek mene inom, walhasikhe mene o.

¹⁶ Omanggum ninambulagen pikhit nineisenalak ta'larik waga lagaukwa andem sambul he, Allah nen he, yi afuni ti afuni inunggul enu lombogen inawesa lombok oba himbirik logolik fogerakhikhi logonik he, iluk herakfisikhi lagaikhe.

¹⁷ A'nogo meneat he, it afuni nen at ebe futfouwageluk, yi mene ti mene ekhe elalhi'lek onggot agaikhemo welagarek fuk. We, at fano nek hilingiti logolik, ninamburu ninalabut ninghogo ninggik, ninendawimo agaiyek agik, ikhi logouwageluk, aren meiso pogoroba nen pelakfei wagik, nonggorek mene andi nogoin higit asi wagunem hokhorogoat wo'nisigik, ikherek andi,” iluk komorinafikhe.

¹⁸ A'nogo komorinafikhe meneat he, it afuni hokhorogo omanogo nen wam arat warisuogeluk isukwasi'mo andi nen he, inendawinggen ninggi'nogo sebelu heat hilinglagaikhe meneat he, wene Paulus lagen a'nogo isukwaba, warisigi'lek kamo isukwa.

¹⁹ A'nogo agaikhemo were'ma, it afuni Yahudi mene o Antiokhia nen, Ikonium en, laluk he, afuni hokhorogo omanogo wene andi herakfisaluk it werekwe asuageluk inendawimo kagalhukwa. Inendawimo kagalhukwama, it werekwe agaukwasik, Paulus a'nogo ebe helep oba watukwasigen, ebe mondogat wato iluk lisogo o kota leget abel endakwe wulakfesukwa.

²⁰ A'nogo wulakfesukwa meneat he, it afuni ekhe Yesus ane wanhukwasik welagaukwa mene wagaukwasik, era'lu walingisogo menlasi wagaukwama re, ebe menlagaikhesik o kota kwisikhe. Kwisikhesik nogo iluk, ohealekwe Barnabas emberek o Derbe pi lagaukwa.

Paulus Barnabas emberek inambotkwe o Antiokhia lagaukwa wene

²¹ O Derbe andoma wene fano wene yagaisikhoat logolik he, afuni inebe hokhorogoat woginafukwama Yesus ane wanhukwa. Wanhukwama fisaluk, it Paulus Barnabas emberek hobuk inambotkwe o Listra nen, Ikonium en, pikhit o Pisidia tonggwe o kota Antiokhia wulibi wagaukwa.

²² Attak kwi laga logolik, afuni Yesus ane yagaisilik kwi lagaukwama wanhukwa mene hobuk inoba fa'larik wulibi waga logolik, inendawinggen ago watfisigik, komorinafik, ilik wulibi waga logolik, mel yagaisasukwa: ”Wene eberogoat iluk hinendawinggen Yesus oba himbiret fesigip mene andi, ninghogoat himbirik logoino o. Nit hobuk Allah awe a'ma mondok logouwogeluk he, ninoba yi enggin ti enggin hikhi logombigenat kugun o,” iluk yagaisaluk wulibi wagaukwa.

²³ A'nogo yagaisaluk wulibi waga logolik he, o yi awi ti awi, Allah againafuri andogoti lagaukwa lombok, inogogwi ferinarek logouwageluk menfisaluk he, inenggi ekhe samban uogeluk sumburu ninggi'lek weat logolik samban yi'nogo ikhi lagaukwa: ”Tuhan Yesus ninoe. Hagainafuri inendawinggen hoba himbirik werek mene yi, ferinarek logoinogen iluk hat henggiba fogo o,” iluk samban ilik wulibi wagaukwa.

²⁴ Wulibi waga logolik, o Pisidia tonggwe nen pikhit he, o propinsi Pamfilia pisukwa.

²⁵ Pisukwasik, o Pamfilia andoma o kota Perga wene yagaisaluk he, o kota Atalia pi lagaukwa.

²⁶ O Atalia nen he, i agum ebene nen e so warogo o Antiokhia inambotkwe lagaukwa. Andoma nen, a'nogo hilingirik nikhi logouwageluk fageat it Allah againafuri nen lakfisa waga logolik he, ”Allah obabut fano a'nogo nen wokhinarek loago,” iluk lakfisa wagaukwama a'nogo hilingirik nikhi lagaukwasik he, arat hilingi'luk inambotkwe hobuk lagaukwa andi.

²⁷ O Antiokhia lagaukwasik, Allah againafuri andogerinafukwasik he, mel yagaisasukwa: ”Nit Allah ninomen yi'nogo hilingito, ti'nogo hilingito,” iluk wene pilingisogo yagaisikhi logolik mel yagaisasukwa: ”It afuni endakwe mene wene andi eberogoat iluk wanuageluk, Allah nen kwe huthikhemo elok wanugun werego,” iluk yagaisasukwa.

²⁸ A'nogo yagaisasukwasik, afuni Yesus ane wanhukwa mene omanogo inom inenggi hokhorogoat welagaukwa.