KISAH PARA RASUL 1 - Allah Wene Fano Wene Hupla Inane

Yesus nen he, Allah Areagun hinoba pelakfei wesigin iluk wene warisasikhe wene

¹ Teofilus noe. An nen omanggum wene lisu palogo hoba lakfei wagagi andi, at Yesus nen yi mene ti mene hilingitik, yi wene ti wene yagaisigik, ikhi lagaikhe wene eroba huli nen,

² at eisena nen ebe pogoroba liakfesikhe andi huli, lisu palogo lakfei wagagi andi. At ebe pogoroba oan liakfigi'lek werek kwelek, at agoromi inebe wenagaisogo inayonggo fesikhesik lakfisageluk isikhe mene omanogo Allah Areagun omameba komorinafikhe.

³ Yesus ebe wa'lagaikhesigen eluk a'luk, enggi 40 hari inom logolik he, at ebe furogo futfouwageluk yi mene ti mene elalin mene hokhorogoat hilingiti lagaikhe. A'nogo hilingiti logolik, aren he, ”An nebe yi. Ineilenggen furogo neoago,” iluk hobugalep inelokhoma menla'luk inugisigik, Allah awe a'ma welagaikharek wene yagaisigik, ikhi lagaikhe.

^4-5 Inenggi ekhe sambul at agoromi inom misi'mo andogorek logolik he, mel yagaisasikhe: ”Yohanes nen ima pelaginafi lagaikhe meneat he, hit hinenggi hokhorogoat welagi'le'ma, Allah nen ima pelakhinabu hak, Areagun hinoba pelakfei wesigin andi re, hinebe o Yerusalem yoma nen pugulhubo. An neisena nen he, it wogisagain, iluk wene wathisasikhe mene andi, an nen attagat abok yagahisasigiat andi. Halok he, nenangorogo logoino,” iluk wene warisasikhe.

Yesus ebe Allah nen pogoroba liakfesikhe wene

⁶ At Yesus nen wene a'nogo yagaisasikhesik, at agoromi inom andogorek logolik he, agoromi nen at oba heinok mel iluk wanhukwa: ”Noe. Attagat yi afuni ti afuni nit Yahudi mene ninoe kain awe a'ma welagaukwa andi hak, hobuk a'nogo logogun mene, yogondak yabaat fisagain a? Oan a,” iluk yagatukwa.

⁷ Yagatukwama re, aren mel yagaisasikhe: ”Wene egep andi, an neisena eiseweregen anggasikhe higithogoat hilinglasigin andi nen he, hiren he, Huli ti huliba logombik hilinglasigin, iluk hinelurogo logogun elo'lego.

⁸ A'nogo meneat he, Allah Areagun hinoba pi waga halok, hinomame asigin. Hinomame asimbik he, o kota Yerusalem en, propinsi Yudea nen, Samaria nen, huli o yi awi ti awi esanggo-esanggo andomaat laga logolik, an yi mene ti mene hilingirik nugunem hineilenggen neegep mene a'nogo, an faget yagaisilik laga logoino o,” iluk yagaisasikhe.

⁹ Wene a'nogo arat yagaisasikhemo, Allah nen at ebe pogoroba liakfugunem, ineilenggen werek kwelegat ohena nen salhikhemo re, ineilenggen hobuk higi'lek.

¹⁰ Higi'lek logolik, at Yesus ebe liakfugu kwelek ineilenggen pogoroba higit liabek were'ma aremnogoat, ap inebe pire inasu kut mene laberek mene inera'lu menlasi pi wagaukwa.

¹¹ Menlasi pi wagaukwasik he, mel yagaisasukwa: ”Hit afuni o Galilea tonggwe mene yi sani. Hineilenggen pogoroba ligabek welagep andi nenahalok. At Yesus hit yoma hinobagaluk he, Allah nen pogoroba liakfugunem, hineilenggen werek kwelegat, lagaikhe andi hak, hobuk a'nogoat pi wesigin o,” iluk yagaisa pi wagaukwa.

Ap ekhe Yudas obali'mo menfesukwa wene

¹² A'nogo yagaisasukwama, punu Zaitun oba andoma nen pi wagaukwasik he, o kota Yerusalem yatmaat lek, we, horogat satu kilometer hangge kwi wagaukwa.

¹³ Kwi wagaukwasik, oloba andoma kwisukwasik he, o henambo welagaukwaba andomaat lagasukwasik welagaukwa. It andi inebe re, Petrus inom, Yohanes inom, Yakobus inom, Andreas inom, Pilipus Tomas emberek inom, Bartolomeus Matius emberek inom, Alfeus amlogo Yakobus andi inom, Simon, ”O yoma ninawiwerek mene nek logogun,” iluk ikhi lagaikhe mene andi inom, Yakobus amlogo Yudas andi inom, inom welagaukwa.

¹⁴ It inebe andem inom, Yesus agaisa Maria inom, hemi ekhe inom, Yesus agoromi ombo'ne mene inomat, inebe mondogat inendawinggen misigat logolik he, samban ugu mondok welagaukwa.

¹⁵ Andi sambul, Allah againafuri ekhe inom inebe 120 hangge andogorek logolik, at Petrus inanggele'ma menlagaikhesik he, wene mel yagaisasikhe:

^16-17 ”Nerugwi nagaila'lak. At Yudas a'nogo re, nit ninom yabu fano hilingiti logouwageluk Yesus nen ayonggo fesikhesik menfesikhemo, nit ninom fano welagosik meneat he, attagat wene Allah Areagun nen at Yudas faget isikhemo, at Daud en lisu palogo fesikhe mene were'ma, at Yudas nen aben Yesus ebe fakfouwageluk woginarek waga andi, hilinglasigin obaat hilinglaga o,” iluk yagaisasikhe.

¹⁸ (At Yudas weak hilingitikhe andi faget, onggo wogetukwama re, kweang onggo pali lagaikhe. Pali lagaikhesik andoma lagaikhesik elokhe sagaum warikhi logolik, alabut supukhogo wulifikhesik wa'lagaikhe.

¹⁹ A'nogo wa'lagaikhemo, afuni o Yerusalem welagaukwa mene inebe mondogat inesanggo holhukwasik he, inelu agaukwasik, kweang andi faget, nit ninaneba amep pisikheba u hak, it inaneba enu Akeldama salhukwa.)

²⁰ A'nogoat, at Petrus nen mel yagaisasikhe: ”Wuni lisu palek Mazmur a'nogoba mel isukwa: O at were'ma awi foluk asuak. Afuni ekhe at aiba andoma inebe legat logouwago, iluk lisu palhukwa. Nen, ekhe mel isukwaat: At ebe enuwerek welagarek mene andi ap ekhe logouwak, iluk isukwa.

^21-22 Halok he, nit ninom nikhi logouwogeluk, ap ekhe menfouwok. Ap menfogoin andi re, huli at Yohanes ima pelaginafi lagaikhe andi huli nen he, ninoe Tuhan Yesus ninom hundik-handigat ombo'ne nikhi lagosik, huli Yesus eisena nen nit ninanggele'ma nen kigilogo pogoroba liakfikhe andi huli, ninom nikhi lago mene halok, Yesus eluk aga andi eberogoat. Nineilenggen hogosik, iluk ninom yagaisilik nikhi logouwogeluk, menfouwogo,” iluk yagaisasikhe.

²³ Yagaisasikhemo re, iren he, ”Ap yi menfouwoga, yi menfouwoga,” iluk inebe pire inenu isukwa. Ap ekhe enu henagan, Yusuf igik, Barsabas igik, Yustus salogo igik, ikhi lagaukwa mene. Nen, ap ekhe enu Matias andi.

^24-25 Inenu isukwasik, Allah ayonggo fikhi logolik he, ”Nineisena. Yudas hat hane yagaisilik nikhi logouwageluk ayonggo fesigin meneat he, aren herakfisaluk wa'lasigin higithogoat wa'lagama, obali'mo ap inebe pire yi, haren ap ki hak ayonggo fegen. Hat afuni inebe mondogat inendawinggen helu andi. Halok, ap ebe yi ayonggo figi, iluk, haren yaganisan o,” iluk yagatukwa.

²⁶ A'nogo isukwasik he, ”Ap yi menfouwoga? yi menfouwoga,” iluk oagengge sa oba asigin, sa oba asigin inenu salogo walhasukwama, Matias oba higit agaikhe. Higit agaikhemo, it ap Yesus nen inebe wenagaisogo inayonggo fesikhesik lakfisasikhe mene omanogo inebe 12 mene 11 agaikhemo nen, 12 asuageluk Matias inom logouwageluk menfesukwa andi.