KIDUNG AGUNG 8 - Allah Wene Fano Wene Hupla Inane

¹ Eige, hat he an namep mene nagaisa nen eilak hunhabilep mene logoilenma nen, eberogo nen he an nemberek ambi a'losik hai hambe saluk wat haple aro, It ekhe nen iluk ogo an noba inabit feilep lek.

² Hat hebe hondokharek an nagaisa ambit lelosik, haren an yagane'len aro. Hat hoba an nen anggur amben fano mene inom e delima enggen inom wokhele aro.

³ Henggi hare fikhiren an nebe legeisogo fetnarek logolik, henggi pikhit fikhiren nebe felikhogo pu'narek logoilen.

⁴ Helime o Yerusalem mene yoma sani, hiren he, at endawi hundik anggaluk hilingitu werek kwelek, oan hoba homot figi'le'ma hanggwe palugun lego, iluk wene wa'ne'ni o.

Wuni falfalik mene Helime hokhorogo nen ikhi lagaukwa mene

⁵ O leimo andoma nen aren endawi hundik anggikherek mene a'nogoba endawinggen tipsek logolik weri'lago mene a'li re sa anggegep? Hele mene nen ikhi lagaikhe mene An nen hat hebe hagaisa a'ma agasik takhafemo re, e apel eroma aremnogo nen elelogo heluget hobagasigi.

⁶ Enggere an nebe yi re hat hendawinggen tulem mene hilingnabin o, Amu mene ekhe inoba hendawinggen tulemhogo logou fuk, we an namu nek pukhogo fetnarek logoino. Nendawinggen ninggerek mene andi re wa'lagaikhare'ma pagarek andi higit omame mondok werek, nen inoba aganhan eterek mene andi re endu wabunak ninggi logolik amulok lagaikherek andi hak hilinginaferek.

⁷ Inendawinggen ninggerek mene andi re I hokhorogo meneba nen ogore nagulumo re elo'lek, Ap ekhe nen endawinggen ninggerek mene andi onggo palagain iluk at mene angge wogosigin meneba nen ogore we inabiret fisaluk weaget fisagarek mene onggo hela hak.

Inagaila'lak helime inom alage inomen ikhi lagaukwa mene

⁸ Nit ninerei re hele misik ekhe werek, at eilak he we endebat tuksek. Nen ap ekhe nen nit ninerei andi nit ikhogoin iluk wagu halok he, niren at faget ninggi'nogo hilingisu hak?

⁹ At ebe andi pa'leget waganek andi hak logoumo nen he niren andi amboloba menara perak meneba sep hun-hun wurik lagailo. Nen at andi ebe kapura kwe kugukwe hak hilingik logoilepma nen he niren he e laik oba kelok ninghogo wa'lo.

Hele mene nen ikhi lagaikhe mene

¹⁰ An nebe re pa'leget waganek mene hak, nen neilak he inebe lagaluk kagalek welagaikharek oba hak hilingik welagi. An nendawi hundik mene andi nen he, nendawinggen nagaiyek at oba welagi mene a'nogo re arogo elu aro.

Ap mene nen ikhi lagaikhe mene

¹¹ Salomo eabu anggur yabu re o Baal-Hamon andoma werek, Nen, at eabu omanogo re ap hali'lagwi mene omanogo inoba wogisikhe. A'nogo wogisikhemo enggen ugu faget enek he it inebe lombogen uang perak seribu nen mene fili'lagwi.

¹² Nen it inebe yabu hilingiri'lagwi mene onggo re uang perak dua ratus nen helili'lagwi. Andi nen he Salomo ahwi, uang andoma re hat hebe inom, it hat heabumo hali'lagwi inap andoma faget inom werek, oba nen he yabu anggur yabu andi nek he, an nelokhoma were'ma re andi re an mene o.

¹³ Yago, hat nendawinggen hundik mene hebe yabumo welagenma re, an nagaila'lagen hat hane ugunem holilo iluk nenangorogo werek andi nen he, hane an holiogen yaganom o!

Hele mene nen isikhe mene

¹⁴ Nendawinggen hundik mene, hat hebe re no kijang inom rusa eak inom tom Beter ebene amben-amben nengge yagokwe wagarek andi higit we'no.