KIDUNG AGUNG 7 - Allah Wene Fano Wene Hupla Inane

Aben ikhi lagaikhe mene

¹ Hele heil alili mondok fano mene yi re, Hat he mondok hunikhogo hilingik welagen, Heisok sandal ugu welagen mene andem he ibi-eberek welagen. Hagosolit punurek oba andem he elokhe fanorogoluk inalilengge wanharek andi higit hilingik welagen, nen ap ekhe nen yi mene ti mene enggi nen hesesengge waganogo puguneterek andi hak welagen.

² Hanum he iwak hombonunggen meneba hinago welagarek mene hangge, anggur agai elokhe munenogo hinagongge legagi'lek welagarek a'nogo hak hilingik, hat halabut he gandum palogo liafugunem no bakung owil-owilengge nen maserogo kwelabek andi hangge hilingik welagen.

³ Heilak he no rusa eak pire otholik tago hangge inom, nen no kijang eak hulipmio tago hangge inom hilingik welagen.

⁴ Halonggobak he no gajah ambulok oak oba wurogo liabek mene hangge hilingik welagen, nen heilenggen he o Batrabim horokhogo kwe kuguba o Hesybon oba i mogo habuli'mo andoma hangge, Hambisang he o Libanon tom oba ap kagalek mene faget menara wurogo liabe'ma o kota Damasyik fikhit elokhe halogo werek a'nogo hangge hilingik welagen.

⁵ Hunggul he punu o Karmel hangge, Hesi feisalogo hilingfikhi lagen mene andem he no su polu warek ugu mene hangge hilingi'mo re, ap raja meneba nen ogore endawinggen wanu hangge hilingik welagen.

⁶ Hat he eberogo heil alili mondok fano pugunsek welagen, inagaiyek anggagarek mene inanggele'ma mondogaren he hat enek he nendawinggen hundik mene welagen.

⁷ Hat hebere e kurma obakhe mondok farogo liabek andi hak hilingik welagen, nen heilak he e andi enggen ugu hangge hilingik welagen.

⁸ A'nogo hilingi'mo e kurma andi bene lagailesik, enggen andoma taganele anggikhi lagi. Hat heilak he e anggur enggen ugu mene hak hilingik welagen, haren set wulafi lagen mene re e apel enggen amben hak hilingik welagen.

⁹ Hambe re anggur agai enduk mit-mirengge andi hak hilingik welagen! Anggur agai andi anggwe halogore an nendawinggen hundik mene andi oba palfigi'lek lagu mondok logouwak, A'nogo laga logolik ap nogogarek mene inoba mene ogore it inebeba inamol-mol enek asi laga logouwak.

Hele mene nen ikhi lagaikhe mene

¹⁰ An nebe yi re nendawinggen hundik mene andi angge, nen athe endawinggen an noba hundik logouwak.

¹¹ Nendawinggen hundik mene nemberek he o leimo lambik, yabumo andoma owil-owil engge enu pacar anggele'ma andoma nogoi louwogen eme o

¹² Nit he hubethogo yabumo lambik, e anggur omanogo mondogat owil mumungsek a, athe owil mondogat fegelhe hea, nen e delima ogore owil mondogat ite hea, iluk halouwogen eme o; Andoma nen he an nen nendawi hundik hilinghafunem neagain aro.

¹³ E ara amben he mondok sang-pang ili'lago, nit ninawi solombonma andoma re enggen enduk mondok fano mene werek; ket taganogo faga mene inom attak palha mene inom, weregat; Andoma mondogat he an nendawinggen hundik mene andi faget figimo werek.