KIDUNG AGUNG 6 - Allah Wene Fano Wene Hupla Inane

Helime hokhorogo nen ikhi lagaukwa mene

¹ Hele eil alili mondok fano pugunsek mene yi re, hat hendawi hundik mene andi re koma laga? Nit ninom herasi logoin nen he hat hendawi hundik mene andi re ki kwe laga?

Hele mene nen ikhi lagaikhe mene

² An nendawi hundik mene andi re at eabu amben-amben engge yagoma, eabumo andoma anggo domba halinafik, nen bunga bakung omanogo palhik hilingisigiluk laga.

³ An nebere nendawi hundik mene angge welagi, nen at he an mene werek, at ebere bunga bakung salkwe andoma domba halinabi'logo.

Wuni fuaben mene Aben ikhi lagaikhe mene

⁴ Hat hebere mondok fano pugunsek logolik ibi eberek welagen, o Yerusalem kota pigin-pugunsek mene inom, nen o Tirza eil alili hilingik mene inom andem hak welagen. Hat he ap tentara esa logalek mene inom nen bendera kelogo pelabe'ma eil fano welagarek andi hangge inom hilingik welagen.

⁵ Hat heilenggen an noba lourek were'ma an nendawinggen nonghong ili'lago hilingi'mo re hafe enden lame o. Nen wam domba o Giliad punukwe holombokhogo lagagik pigik pi wagunem hilingik a'nogo hak hat hesi re a'nogo hilingik welagen.

⁶ Nen hat haik he wam domba esa logalek mene esi ket palogo kume wat fugunem eil mondogat kut andi hak hilingik welagen, domba eak hulipmio mene hakhogo pire wutse'ma misik ekhe iluk ogo longgo u lek hak.

⁷ Helokhenggen he e delima enggen pire pelanget fugunem hak hilingi'mo re, su salek welagen mene a'makwe tibelenggeri'lago.

⁸ Hemi ap raja inagagwi inebe 60 nen werek oba nen ogo, nen inamingmingengge mene inagagwirinafarek mene inebe 80 nen werek oba nen ogo, nen helime tugum inebe hokho-pokhogoro werek oba nen ogore.

⁹ An nendawimo hinaklomakhogo fakhigirik welagi mene narue pel he we misik-masik andiat, omalik we misik engge agaisa nen endawinggen hundik mene. Helime tugum en ineilenggen haluk he at faget fogeratarek, nen raja agagwi nen inom, agagwi amingmingengge mene agagwirinaferek mene omanogo nen inomen ogore at faget ineilenggen alonghogo kumutu welagaikharek.

¹⁰ O wei ikherek hak inom, tugi funuba yaterek hak inom, mo yatunem hilingik hak inom andi re sa weri'lago nogo? At he ap tentara esa logalogo bendera kelogo pelabek mene a'ma wagunem hakhogo, at ebere hunikhogo hilingik.

¹¹ An nebere i kenari yabumo fanggong kwe andoma owil mumungsek mene neilenggen hagaluk wagarik; E anggur omanogo owil mumungsek hea lek hea, nen e delima omanogo enggen ite a lega, iluk kogolik wagi.

¹² An he afuni nen no kereta weim yabik lagaikharek meneba lagagu mene faget it ap inunggulenu werek inap inomen nonourek welagaikharek andi hakhogo, haren an faget hendawi hundik hilingnarek welagen mene andem faget eberek mondok welagi.

Helime hokhorogo nen ikhi lagaukwa mene

¹³ Helime Sulam silerik yoma sani, hinabunukhogoat hinagaiyege'ni! Niren foget hinabuogen he mase'ni! An he afuni kumu'nabi'lagwi mene inanggele'ma nen wuni masetu kwelek, hiren nenahalok an kumutnafi logogun nogo?