KIDUNG AGUNG 5 - Allah Wene Fano Wene Hupla Inane

Aben ikhi lagaukwa mene

¹ Nagot ninom lombolek mene yi, an he neabumo omanogo waga lagi, wagiresik he mur inom, amben-ambenengge fano mene inom kaboget fuluk, an nen kin amusu inom awingga sap palek mene andi inom ninggik, susu inom anggur agai inom ninggik ikhi lagi. Sumburu ninggik, i ninggik, ikhi logoni nerugwi, a'nogo nunggu werek kwelek enek he hinoba aik age lagambik ap lugu-lugwi palharek hak hilingisugun.

Helime nen ikhi lagukwa mene Wuni enggaminogo nek mene re Helime nen ikhi lagaukwa mene

² An nogokhi lagiba nen nendawinggen he neluk welagi. An nendawinggen hundik mene a'nogo nen kwe pak-paget hili'lago andi holini. Nagot, nendawinggen hundik mene, narue pel hak mene, nendawimo nen mondok fogethafi lagi mene, nunggul ebene min omare meiso helalabugen noate mene, o hubanggo meiso henanggikil en noate mene re nesibene hetsek oma.

Aben ikhi lagaukwa mene Helime nen ikhi lagaukwa mene

³ An nasu nebema mene nonggol figirik welagi, ma re nekhengge labesioga? Nen neisok mondogat sobalhi, Mo re nekhengge yugulioga?

⁴ An nendawi hundik mene a'nogo nen kwe kolok fak-fikhemo re, an nendawimo muluk-malak ikhe.

⁵ A'nogo hilingitemo re an nebe feisakhogo menlagarik, at nendawinggen hundik mene a'nogo kwe huthigi. An nenggi segelet ebene nen he mur amusu tephigik pikhi logolik he, kwe kolok inenggi fagongge a'nogo bene yugulaga.

⁶ Oba nen he an nendawi hundik mene a'nogo faget kwe huthigiba nen, at ebe ambotkwe sugulogo lagama. Andi nen an nen at ane igin mene holigin iluk nendawinggen fenggek-fenggek ikhi logolik heratiba nen he we alomarogo herati lagi. At enu wolhigiba nen, ane onggo yaganete lek.

⁷ A'nogo hilingitemo an he ap o hubanggo o kota kagalek werek mene ninom ambi agosik, iren an nebe yei warogo nagap palfagasik he nasu laberek welagi mene ina'mageba nonggologo helaga.

⁸ Yago, hit Yerusalem helime yoma, hiren an nendawi hundik mene andi hinom ambi asimbik halok he, at he hat faget endawinggen ninggemo oba ou agasik ou wili'logo iluk yagasubagaigen he wene watne'ni o.

Helime inebe hokhorogo nen ikhi lagaukwa mene

⁹ Hele hebe tugum fano mene yi, hat hendawi hundik mene andi re it fena re maben hangge werek kwelek arenet he ningginik mene? Hat hendawi hundik mene andi re it fenakwe sebelek hak werek kwelek at enek he ebe mondok fano anggegendigen nit ninoba wene wa'ne'ni iluk yaganisikhi lagen nogo?

Hele mene nen ikhi lagaikhe mene

¹⁰ An nendawi hundik mene andi re ap inebe sepuluh ribu mene inanggele'ma nen arenek he ebe fano mondok logolik hibilik-hebelek mene werek.

¹¹ At unggul he emas mondok ebe mene hak werek, esire muli fano mondok mene re i esinggen founalherek mene hangge hilingik.

¹² Eilenggen he sue pel i elesimo mene hangge werek, sue pel eilak amusuba isabok kulelheresik i esanggoma hurek welagarek higit werek.

¹³ Elokhonggen he yabu amben-ambenengge faget waganek mene hangge hilingik, nen ambe pum he bunga bakung owil en mur ebe mene tephogo pelaferek mene hak hilingik.

¹⁴ Enggi re fano pugunsek were'ma senggan emas mene inom permata mene inom kwelabek, Obakhe re no gading hangge hilingi'mo helep nilam obabut hak hilingik.

¹⁵ Eisok he o fesengge helep marmer kut mene eisok hak hilingi'mo re, eisok a'makwe re emas ebe meneba talogo wurik mene hak hilingik. Nen at ebeba hilingik mene re o Libanon tom wolonghigik liabek hak, nen e laik kogo feleng welagarek hak hilingik.

¹⁶ Ane ikherek mene re enduk mondok mit-mirengge, nen at ebene hilingik mene andoma mondogat he inendawinggen wanu hak enek. Yago, o Yerusalem helime yi sani! An nendawinggen hundik mene andi ninom hilingik welago mene re a'nogo andi.