Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

KIDUNG AGUNG 4 - Allah Wene Fano Wene Hupla Inane


Aben ikhi lagaukwa mene

1 Hat hebere mondok pugun-pagansek logolik, ebenggene welagen, eberogo nenat hat he heil alili fanorek welagen. Hat heilenggen su salek welagen mene andi a'ma fikhit andoma re sue pel higit hilingik welagen, hat hesi re, kambing ulukhogo o Gilead punukwe pikhi logolik hilingiterek hak foinalik-lenggalik laga lagen.

2 Haik he wam domba esa hokhorogo esi ket palfuluk kume wat fugunem amulit fikherek hak kut mondok welagen. Domba eagwi ebe pire wutsek andi hak ambolkwe a'makwe wutse'ma re misik iluk ogo ekhe langgorogo la lek hak.

3 Hambe re hele pita eil mep mene hangge hilingi'mo re, hambe mondok pugun-pagansek welagen. Helokhenggen he e delima enggen pire pelanget fugunem hak hilingi'mo re, su salek welagen mene a'makwe tibelenggeri'lago.

4 Halonggop he hun Daud en asikhe fakhuguba faget, helep huguloak wurik lagasikhe mene a'nogo hak hilingik welagen. Hasiong he tok kwe palengge seribu nen hangge, nen ap sikhe fisogo mene inogogwi inarige tomuk hak hilingik welagen.

5 Heilak he no rusa eagwi pire hangge hilingik welagen, nen no kijang eagwi pire hulipmio mene owil-owilengge bunga bakung anggelekwe engga tegethigik nunggunem hangge hilingik welagen.

6 A'nogo hilingik welagenma re an nebe re, tom mur oba inom, nen punu kemenyan oba inom lele anggikhi lagi o. A'nogo lelesik were'ma sogoi hubet mene funha waga logolik, o mum werek mene a'nogo furogo waluk lelep anggikhi lagi.

7 Hat hebe re nendawinggen hundik mene heil alili mondok pugun-pagansek mene welagen, Hat hebeba hagambut palek mene ekhe werek lek.

8 An nen wenakharek welagi mene, nit he o Libanon nen puogen o. Nit he punu o Amana unggulmo nen, punu Senir inom, Hermon inom alonggopma, mene olomene anini mene enu macan tutul inom singa inom werek oba andoma nen puogen.

9 Nagot nemberek lombolek welago mene, an nendawinggen sebelek mene re hat welagen, hat helokhe mondok fano andiba an nendawinggen sebelek welagi, nen hasiong ikhugunem inom, halilingge permata fano mene liakhugunem inom andiba an nendawinggen ninggerek.

10 Nagot nemberek lombolek welago mene, hat ninom ninendawinggen ninggerek mene andem he enduk mondok fano, anggur agai enduk maben hak oba nen, andi nek he enduk mondok mit-mirengge hilingik. Haren amusu yugulhi lagen mene amben sang-bang ugunem, yi mene ti mene amben andoma elo'lek hak hilingik kwelek andi nek he mondogat mit-mirengge hilingik.

11 Ninom lombolek welago mene, hat hane ikhi lagen mene andoma re, susu inom, kin amusu inom we endep hak hilingik kwelek, hat hane nek he enduk mondok mit-mirengge o. Hat hasu laberikhi lagen mene amben he Tom Libanon amben hak hilingik welagen.

12 An nendawi hundik mene andi reyabu ap yugunat kwinogoluk inane waik palek mene hangge hilingik welagen, Helep leget wurogo, i elesi anggwe yagarek were'ma ap amu mene nen husu elo'lek welagarek andi hak hilingik welagen.

13 A'nogo hilingi'mo andoma re e delima wilibik were'ma re, enggen enduk fano mene nek igisogo pelabek. bunga pacar inom,

14 narwastu inom, kunyit inom, e kami hak mene inom, el inom, nen e hendali hak mene enu kemenyan amu-amu mene inom wilibik werek. Mur inom gaharu inom, yi mene ti mene amben-amben engge mondok fano mene nek werek.

15 An neabumo andoma re i elesi eluk mene, o Libanon nen wilibisogo lagarek!


Hele mene nen ikhi lagaikhe mene

16 Sogoi abel utara fikhit mene yi, heluk ame o, nen sogoi selatan fikhiren eme o! Waga logolik, an neabu waganekwe andoma funhame, a'nogo hilingisigin oba amben enek sang-bang uakhogo. A'nogo hilinglagunem an nendawi hundik mene a'nogo at eabumo andoma we'luk, agayonggen enduk fano mene andoma na wesigin fano o.

ကြှနျုပျတို့နောကျလိုကျပါ:



ကြော်ငြာတွေ