KIDUNG AGUNG 3 - Allah Wene Fano Wene Hupla Inane

¹ O hubanggo an nebe nogokhi logolik nabi wokhugunemen he, an nendawi hundik mene a'nogoba heratunem hikhi lagiba nen we alomarogo nek hikhi lagi o.

² Nabi a'nogo hikhi logolik he nebe menla'luk o kota kwe andoma laga logolik, ebekhe kwe inom ineisok sebelharekwe inom andoma mondogat herarik noak solok ikhi lagi. An nen nendawinggen elonggoma mene a'nogo ebe herati lagiba nen he, we alomarogoat hilingiti lagi.

³ A'nogo hilingiti logolik, ap o hubanggo kota kagalek werek mene ninom ambi a'luk he an nen it inoba heinok wogisikhi logolik, ”Hit he an nendawinggen hundik mene andi ekhe hegeba?”

⁴ Iluk heinok wogisigi oba nen welagi'legat an nendawinggen hundik mene a'nogo herakhigi. Herakhigirik an nen nenggi pukhogo fagaisogo, oboget higi'lek waluk he an nagaisa nebe ta'nafe mene awiloba hondok haluk lagi.

⁵ Hit helime Yerusalem mene yi sani, hiren he nit ninendawinggen hundik hilingiti lago mene andi ninanggwe palhi'lek werek kwelek enek he at oba homot lasuageluk, hiren no rusa inom kijang inom o leikwe werek mene andoma inenuba hombuk palini o.

Wuni henaganek mene Helime nen ikhi lagaukwa mene

⁶ O leik esi mondok lek fikhit andoma nen endu hule mone'luk weri'lago andi re nena mene nogo? Amben he no mur amben inom, kemenyan amben inomen it onggo wanharek mene nen inagap ebene ambenhogo iluk yugulharek mene amben hangge hilingiri'logo.

⁷ Hani, andi re Salomo angge kereta wurik meneba wagunem, Israel inaben ap sikhe inenggi pagat weak inap, nen it sikhe anini mene andi mondogat he inebe enam puluh nen mene weri'lagwi,

⁸ it andem weim yafu mene re mondok wil-walsek inap mene nek, it inebe re o hubanggo inoasi kugunem kagalugun iluk, inouwa'ma inenggarok awinggaba kwelagongge hobalhigik werek.

⁹ At Salomo onggwarek hu'lagu mene faget he o Libanon agayo e mondok fano mene omanogoba wurikhe.

¹⁰ Oak he perak meneba wurik, nen ambot timirek mene re emas meneba wurik. At ebe hurek werek obare kain elokhe ungu meneba hilingik, andi re helime silerik mene o Yerusalem mene nen inendawimo inagaiyek oba ita mene.

¹¹ O Sion helime yi sani, hinebe wulibi wesimbik he, hun raja Salomo agaisa nen at ebe agwe igeti logolik, mahkota puget fugunem agaiyek mondok hilingiri'lagongge andi hineilenggen hani o.