KIDUNG AGUNG 2 - Allah Wene Fano Wene Hupla Inane

¹ An nebe nek he o Saron bunga mawar inom, bunga bakung inom tonggokwe welagarek mene hangge hilingik welagi o.

Aben ikhi lagaukwa mene

² Bunga bakung alok-alogengge anggele'ma welagarek andi hakhogo, An nendawinggen hundik mene andi ogore it helime inanggele'ma andoma a'nogo werek.

Helime nen ikhi lagaukwa mene

³ Enggama nen e apel engga anggele'ma nen wiliferek hangge, An nendawi hundik mene andi ogore alage inanggele'ma andi higit werek. An he at a'ma sebe ikugu mene faget nagaiyek welagi, Nen, enggen ugu mene re enduk mit-mirengge hilingik.

⁴ Aren an hondo'narek he seni fate ambeba lagasik, eilenggen an nebe endawinggen ningge mene a'nogoba fifurogo kumutnarek welaga.

⁵ Logolik he, an he hat hoba nendawinggen nunggunem ou hikhi logolik welaginggere, an noba anggur amusu enduk mit-mirengge mene andomaba nomamet figik, e apel enggen enduk fano mene andomaba noba set figik, hilingnobagain o.

⁶ Enggi harekwe nen nunggul agorogo fe'narek logolik he, Enggi ebekwe nen felikhogo fe'narek werek.

⁷ Arigini'mo re hit helime Yerusalem mene yi sani, endawinggen nunggunem set lagapu hilingiri'lago mene andi oba homot lasuakhogo re anggwe palfigi'lek logouwakhogo, hiren o leimo andoma paik rusa inom, kijang inom enuba hombuk palini o.

Wuni pirenek mene Helime nen ikhi lagaukwa mene

^8-9 Holini! Hele an nendawi hundik mene a'nogo weri'lago a'li! At ebere paik rusa eak inom no kijang inomen hilingirik wagarek hak, tomkwe inom punukwe inom huksombo lagagik-pigik weri'lago a'li. Yethani! At ebere leget pa'leget waganek mene ambol fikhit andoma mendek logolik he, jendela folelekwe nen eil wili'lago a'naga.

¹⁰ An nendawi hundik mene a'nogo nen an noba ane ili'lago yi, holini. Hat hele fano mene ari re noba we'no o, Hat hele ebe mene ari re noba eme o.

Aben ikhi lagaukwa mene

¹¹ Yethan, o salim tepsek welaga mene a'nogo arat palogo lek agik, o meiso welaga mene a'nogo terenghogo palfigik ikhe.

¹² Yabu wagane'ma awi yagokwe omanogo owil-owilengge mondogat fulelhik, owil-owilengge palugun oba arat horogasi wagik, nen nit nineabumo nen sue abiang ane igik, ikhe andi.

¹³ E ara enggen iterek mene erorate, nen e anggur owil hokho-pokhorogo ite. Hat hele fano mene ari re noba we'no o, Hat hele ebe mene ari re nambit eme o.

¹⁴ Hat he an narue pel helep elekwe mene hak hilingik welagen, nen tom eil pulekwe hina'lagaikharek andi hak hilingik welagen, Helokhe re mondok fano heil alili pugunsek welagenma re, An nen hat helokhe kumut hiigik, hane hologo welagik, ugu mene namolo welagi o.

¹⁵ Nit nineabumo anggur awi yago mene omanogo hokho asigin ha'ma nen he, No kelinci hak mene andoma nen weagerogo fili'lagongge re senfeni o.

Helime nen ikhi lagaukwa mene

¹⁶ At endawi hundik mene andi re an nonggwarek mene o, nen an he at mene welagi. At ebe hubet sogoi funha wagarek mene nen o mumsek mene a'nogo furogo leget figi'lek werek kwelek,

¹⁷ no bakung owil anggelekwe andoma anggo domba halinafi logolik werek. An nendawi hundik mene hebere no kijang inom rusa eak inom tom Beter oba andoma nen hilingik hakhogo welagenma re, hambotkwe sugulogo we'no o.