KIDUNG AGUNG 1 - Allah Wene Fano Wene Hupla Inane

¹ Wuni lego mene Salomo nen felalhikhe awuni.

Wuni attak mene It Helime nen yi'nogo ikhi lagaukwa

² Haren hendawi hundik hilingnafi lagen mene andi re anggur agai hinago inom he higitsek lego, enduk mondok mit-mirengge andi nen he hat hambe nen an saluget neame o.

³ Hat hamben he mondok fano sang-bang eri'lago, henure amusu amben fano mene kweisalogo pugunem amben eterek andi higit hilingik welagen; andiba re helime silerigen inendawinggen ninggerek!

⁴ Raja neisena, an nebe wo'narek o senggelek hat nogokhi lagen oba andoma weak-weakhogo kwilan o. Hat faget nit mondogaren ninagaiyegeti lago, Hendawi hundik hilingiti lagen mene andi re anggur agai sebelek hak oba nen andi nek he mondok esin hilingi'mo re, helime silerigen hat hobaget inendawinggen nunggunem hoba eiselek mondok werek andi re hilingisu hak hilingiri'lagwi o.

⁵ Yerusalem helime yoma sani, an nebere heiselek weak oba nen, neil alili mondok fano welagi, an nebere o Kedar oba tenda eil heiselek weak meneba salek welagarek andi hangge welagiba nen, o Salomo awi wuri'mo senggele'ma alilingge pugun-paganhogo waganek andoma hangge hilingik welagi o!

⁶ Mo nen nagap hali nonggorek mene andoma faget, agap heiselek weak iluk heilenggen wo'nafi logou fugo. An nogogwi nen wena'neti logolik, anggur yabumo yabu hilingisuageluk miming nafu mondok were'ma re, an nebene pugunetu aple faget linggene selek ekhe werek lek andi nen hilingik welagi o.

⁷ Nendawi hundik mene, hat he hebe o koma domba halinafi lagen nogo, nen o hu'mo agunem he it inebe koma weing fisikhi lagen, furogo yaganomo. An he afuni wam konharek mene hak, hat hagaila'lak inanggo domba inanggelekwe andoma nikhi logogin nogo a, iluk ugunem; It aben ikhi logolik he.

Aben ikhi lagaukwa mene

⁸ Hele hat he it hemi inanggele'ma nen mondok fano pugunsek welagen o, obalik honggotsek welagen a? Halok he domba hokhorogo anggwe lagarekwe andoma laluk he, it ap gembala lagen inawi sabu salogo werekwe horokhogo andoma asi laluk hanggo kambing, domba halinafi logoino o.

⁹ Hat he an nendawi hundik mene o, hat hebe re wam kuda holou mene ap raja Mesir angge kereta li'luk wagarek a'nogo hangge hilingik welagen.

¹⁰ Hat helokhonggen he halilingge hesanggoba kologo pelabe'ma eil mondok fano pugunsek welagarek andi hangge hilingik welagen, halonggopma re siong eil fano mene permata ugumo hangge fano pigin-pugunsek welagen.

¹¹ Niren hat halilingge emas mene inom, nen hasiong he perak meneba inom pugunhogo hobagakhi lago.

Helime nen ikhi lagaukwa mene

¹² An noe raja re at nogoli'lago meneba wengik were'ma re, an nangge narwastu amusu amben sang-bang ili'lago.

¹³ An nendawi hundik mene andi nami'mo weinglagunem he, no mur amben eterek hakhogo amben eri'lago.

¹⁴ Nendawi hundik mene andi re o En-Gedi anggur yabumo nen, owil-owilengge enu pacar misi'mo kaboksek andi hakhogo werek.

Aben ikhi lagaukwa mene

¹⁵ Hat hebere mondok fano pugunsek logolik, heil alili pugunsek welagen mene, mondok fani-fanorek welagen! Hat heilenggen he sue pel eil alili hak hilingik welagen.

Helime nen ikhi lagaukwa mene

¹⁶ Nagailak, hat ogore souge fano hagun welagen, ibi-eberogo nenat he souge fano hagun welagen! Nit ninebe nogokhi lagoba re engga mondok muli fanoma andoma o.

¹⁷ Nit ninawi timuk he e laik oba liagaisogo wurik, nen e weile oak he o sumbun wurik.