KELUARAN 8 - Allah Wene Fano Wene Hupla Inane

Yagaise nen weagerinafikhe wene

¹ At Tuhan nen he, Musa mel yagatikhe: ”Hat hebe at raja Firaun oba lambik he, Allah nen he, mel yagahete iluk yaga'no: An nagainafuri nen an fogetnabi loageluk he, lakfisano o.

² Meneat he, haren lakfisigi'lek halok, An nen wene hinoba fembik he, yagaise mondok hokhorogo hilingisogo foumo, o Mesir elonggo yi awi ti awi andoma mondogat saga igin o.

³ A'nogo saga imbik, i Nil ima re, yagaise mondok sik-pik imbik pete igin aro. Peterogo endakwe wulibi wesimbik he, hat haiba kwimbik, o hulumo hat hebe nogo egendek oba kuluk, su nogo egendek mene elema kwigik, hagoromi inailokwe kwigik, afuni mondogat inailokwe kwigik, sumburu roti weratarek kwe kwigik, panci elekwe kwigik, ikhi logogin o.

⁴ A'nogo hilingiti logolik, yagaise andi hat hebe inom, hagoromi inom, afuni mondogat inom, hinebene hukpok-hakpok lagakhi logogin o, yagahete iluk yaga'no,” yagatikhe.

⁵ A'nogo yagatikhesik, Musa ekhe mel yagatikheat: ”O Mesir yi awi ti awi mondogat yagaise mondok hokhorogo sik-pik imbik pete uageluk, at Harun nen arige tomuk a'nogo wanhikhesik he, i hokhokwe endep kwe mondogat inom, kalok waganekwe i wagarek mene inom, mogo yenggelek mene inom, enggi pisarogo i agum oba higit lakfouwageluk yagaom o,” iluk yagatikhe.

⁶ A'nogo yagatikhemo, at Harun en arige tomuk a'nogo wanhikhesik he, i mondogat agum oba higit enggi pisarogo lakfesikhemo re, yagaise hokhorogo weinam agaikhesik o Mesir yi awi ti awi mondogat sik-pik isikhesik pete isikhe.

⁷ A'nogo meneat he, it ap wesainap elalin hilingitu inelu mene omanogo nen ogo re, inawesa meneba hilingitunem yagaise hokhorogoat weinam agaikhesik sik-pik isikheat.

⁸ A'nogo hilinglaga lagaikhemo at raja a'nogo nen Musa Harun emberek wolisasikhemo lagaukwama re, mel yagaisasikhe: ”Hit hineisena Tuhan nen he, yagaise oma mondok leget fisoageluk samban ini o. Yagaise andoma lek aga halok, an nen hit afuni Israel mene hineisena Tuhan faget warogo nolesi lobagaigeluk lakhinobagagin o,” iluk yagaisasikhe.

⁹ A'nogo yagaisasikhemo, at Musa nen he, ”An nendawimo nagaiyek anggikhi logolik, noe hat faget hobuk samban igin o. Haren, o ti sambul samban ninobaget ino o, iluk egen halok an nen hat hebe faget inom, hagoromi faget inom, afuni mondogat faget inom, samban igin o. Samban igi halok, yagaise andi noe hat hoba logogin mondok lek. We, i Nil ima nek logogin o,” iluk yagatikhe.

¹⁰ A'nogo yagatikhemo, at raja a'nogo nen he, ”An faget samban ohealekwe ino o,” iluk yagatikhemo, at Musa nen he, ”Noe, haren yi'nogo hilingfanino, iluk yaganeten halok he, an nen hilingisigin aro. Hilingitunem, haren he, hit hineisena Tuhan Allah andi hangge ekhe mondok lek. We, at Allah andi eberogoat higi, iluk futfagain aro.

¹¹ Aren he hat hebe inom, hagoromi inom, afuni mondogat inom, yagaise hinom mondok welagep mene andi hinoba nen legetfagain o. A'nogo legetfoumo, hinailokwe mondogat yagaise ekhe logogin mondok lego. We, i Nil ima nek logogin o,” iluk yagatikhe.

¹² A'nogo yaga'luk, at Musa Harun emberek at raja herakfisaluk wulibi wagaukwasik he, at Musa nineisena Tuhan nen yagaise at kain oba hokhorogo sik-pikhogo hilingisogo fesikhe mene andi leget fouwageluk kino yagatikhe.

¹³ A'nogo yagatikhemo, At Tuhan nen, Musa nen kino yagatikhe mene andi ane esanggo holhikhesik, yagaise olokwe inom, o silikwe inom, yabukwe inom, welagaikhe mene omanogo wa'lasuageluk hilingitikhemo mondogat wa'larik lagaikhe.

¹⁴ A'nogo wa'lagaikhemo, afuni Mesir mene nen he, yagaise warek omanogo andogorogo filik lagaukwama, o Mesir yi awi ti awi mondogat amben weak mene sang isikhe.

¹⁵ Yagaise a'nogo wa'lagaikhemo, at raja eilenggen hasikhe meneat he, endawinggen mondok haro agaikhesik, At Tuhan nen isikhe higithogoat Musa Harun emberek ugunem inane hologo hilingiti'lek herakfisasikhe.

Kolum en weagerinafikhe wene

¹⁶ Tuhan nen Musa mel yagatikhe: ”At Harun nen arige tomuk a'nogoba kweang fothoagen yagaom o. A'nogo Fothugunem he, kweang age o Mesir yi awi ti awi mondogat saga ikhi logolik, kweang age andi hebekhogo kolum hokhorogo hilinglasigin o,” iluk yagatikhemo Harun yagatikhe.

¹⁷ A'nogo yagatikhemo, at Harun nen he, arige tomuk a'nogoba kweang fothasikhemo, o Mesir andoma kweang age omanogo hebekhogo kolum agaikhesik folhaluk afuni inebene inom, wam ebene inom, mondok heim ikhi lagaikhe.

¹⁸ A'nogo heim ikhi lagaikhemo, it ap wesainap elalin hilingitu inelu mene omanogo inawesa meneba kolum ekhe weinamet fouwogeluk walhasukwa mene re, mondok elo'lek agaikhe. A'nogo elo'lek agaikhemo werek kwelek, o ekhema-ekhema kolum mondok hokhorogo hilinglagaikhe.

¹⁹ A'nogo hilinglagaikhemo, it ap wesa inap elalin hilingitu inelu mene omanogo nen he, raja Firaun mel yagatukwa: ”Yi re, at Allah nenat hilingiri'lago higi,” iluk yagatukwa meneat he, at raja endawinggen mondok haro agaikhesik he, At Tuhan nen isikhe hagat Musa Harun emberek inane ugunem hologo hilingiti'lek herakfisasikhe.

Sobon nen weagerinafikhe wene

²⁰ Hobuk Tuhan nen he, Musa mel yagatikhe: ”Hat hebe hobit huberat siakhogo re, at raja Firaun ebe i Nil ima pi wagunem elokhoma lambik hemberek ambi asimbik he, an nane igi mene yi yaga'no o: An nagainafuri nen An foge'nabi loageluk lakfisano o.

²¹ Nen, haren it lakfisigi'lek halok he, hat hebe inom, hat hagoromi pegawai inom, hagainafuri Mesir mene mondogat inom, sobon hinoba lakfei wesigin o. Lakfei wagunem, afuni inailokwe inom, endakwe inom, sobon mondok hokhorogo sik-pik imbik pete igin o.

²² A'nogo meneat he, haren he, andi Tuhan nen hilingiri'lago higi, iluk futfeinogen iluk, An nagainafuri inaiba welagaikharek oba o Gosyen andoma nek he, sobon mondok lek logogin o.

²³ An nen he, nagainafuri inoba hunogoat hilinginafi logolik, hat hagainafuri inoba hunogoat hilinginabigin andi re, o healegat elalin mene yi hilingisigin o, iluk ikhe, yaga'no,” iluk yagatikhe.

²⁴ Tuhan nen a'nogo yagatikhesik he, at raja Firaun aiba inom, agoromi inaiba inom, sobon mondok hokhorogo lakfei wagaikhemo re, o Mesir yi awi ti awi sobon mondok hokhorogo hilinglagaikhemo, afuni Mesir mene mondogat wiik-weakhogo welagaukwa.

²⁵ A'nogo hilinglagaikhemo, at raja a'nogo nen he, Musa Harun emberek wolisasikhemo lagaukwama re, mel yagaisasikhe: ”Hit hineisena Allah faget warogo o amumo nolesi logoin lek. We, o yomaba nen horokhogo nolesi lano o,” iluk yagaisasikhe.

²⁶ A'nogo yagaisasikhemo, at Musa nen he, mel yagatikhe: ”A'nogo hilingisugun lek. Niren Allah faget a'nogo warogo noletunem he, afuni Mesir mene ineilenggen nisambik he, andi weak hilingiri'lagwi, iluk ninebe helep oba mondok ninoasugun o.

²⁷ Andi nen he, Tuhan nen yaganisikhe hagat, o leimo afuni le'ma andoma ninenggi henagan laga logombigen nineisena Tuhan Allah faget nolesi logoin o,” iluk yagatikhe.

²⁸ A'nogo yagatikhemo, at raja nen he, ”An nen hit o leimo afuni le'ma andoma lambik, Tuhan Allah faget warogo nolesi lobagaigeluk lakhinobagagin o. Andi nen he, hit hinebe yatma la fugo. We, horogat lambik an noba ebesimbigen nobaget samban ino aro,” iluk yagatikhe.

²⁹ A'nogo yagatikhemo, at Musa nen he, ”An lagi halok he, ohealek sobon andi mondogat hat hebe inom, hagoromi inom, afuni mondogat inom, hinoba nen loageluk, samban weak-weagat Tuhan kino yagasigin o. A'nogo yagasigin meneat he, haren heranen nit lalninafik, afuni Israel mene ineisena Tuhan faget warogo nolesi louwogeluk ugunem inanggwe palhik, hobuk hilingisugun mondok lego,” iluk yagatikhe.

³⁰ At Musa nen raja wene a'nogo yaga'luk wagaikhesik he, samban nineisena Enupogot kino yagatikhe.

³¹ Yagatikhemo, At Tuhan nen Musa ane esanggo holhikhesik he, sobon omanogo at raja inom, agoromi inom, afuni mondogat inom, herakfisaluk tarogo loageluk hilingitikhemo re, ekhe kamo igi'lek felelenghogo mondok lagaukwa.

³² A'nogo hilinglagaikhe meneat he, at raja endawinggen mondok haro agaikhesik afuni Israel mene, lani, iluk yagaisigi'lek kamo isikheat.