KELUARAN 6 - Allah Wene Fano Wene Hupla Inane

Allah nen Musa ayonggo fesikhe wene

¹ At Allah nen a'nogo yagatikhesik, ekhe mel yagatikhe: ”Tuhan Nebe re, Anaro.

² Anatma re, An Allah Nebe Nomame Hokho yi mene ti mene hilingisu hagenek logolik, Abraham inom, Ishak inom, Yakub inom, inelokhoma menlaga lagagi meneat he, An Nenu, Tuhan iluk furogo yagaisikhi lagi lego.

³ An nenat he, o Kanaan it attak inebe ap pok higit welagaukwaba andoma hit wokhisagain o, iluk wene warisasigiaro.

⁴ Wene a'nogo warisasigi andi nen he, it afuni Israel mene afuni Mesir mene nen inamingmingengge hangge ferinarek were'ma, iren he, eige nabire, iluk ugunem inane nesanggo holhirik he, An nen it wene warisasigi mene andi nendawimo ebeti.

⁵ Andi An nen it afuni Israel mene yi'nogo yagaisigi mene andi haren sele'ma yagaisa lano: At Allah nen, Tuhan he, Anaro. Afuni Mesir mene nen inamingmingengge hangge fethinarek were'ma, An nenat wulakhinobagagin o. An nen hit telhinabigiluk he, nomame hokho mene sele'matfigik, afuni Mesir mene wene enggin mene inoba figik, igin o.

⁶ An nen hit nagainafuri hilinghinabimbik he, An Tuhan hineisena Allah logogin o. Logolik, afuni Mesir mene nen inamingmingengge hak fethinarek were'ma wokhinarek wulibi wagunem hiren he, An Tuhan, hineisena Allah iluk hobuk futnobagagun o.

⁷ An nen he, o Abraham inom, Ishak inom, Yakub inom, hit wokhisagain, iluk hombuk palogo wene warisasigiba andoma wokhinarek lagain o. Lambik o andoma, hit hinonggwarek faget eise mondok logobagaigeluk wokhisagain o. Hineisena Tuhan he, Anaro,” iluk yagaisasikhe.

⁸ A'nogo yagaisasikhemo at Tuhan en, ”Yi'nogo yagaisano,” iluk Musa yagatikhe mene a'nogo mondogat, it afuni Israel mene yagaisa lagaikhe. A'nogo yagaisasikhe meneat he, it afuni Mesir mene nen inamingmingengge hak ferinarek logolik, wiik-weakhogo hilinginafunem, it inendawimo nen he, ”Fano asigin lek mene ili'logo,” iluk Musa nen wene a'nogo yagaisugunem holhi'lek herakfisasukwa.

⁹ Hobuk At Tuhan nen Musa mel yagatikhe:

¹⁰ ”Hat hebe raja Firaun oba lambik he, mel yaga'no: Afuni Israel mene o hit were'ma yoma herakfuluk wulibuagen yagaisanogeluk wagi o, iluk yagasi lano,” iluk yagatikhe.

¹¹ A'nogo yagatikhe meneat he, at Musa nen mel yagatikhe: ”Afuni Israel mene inonggwaregen he, an nane inesanggo holu mondok inabit andi. Andi nen he, at raja Firaun nen an nane holek logou mene hangge igirek lek mene yi nen yagasumo aren nane hologo hilingisigin anggegen a? Mondok elo'lego,” isikhe.

¹² Tuhan nen it Musa Harun emberek inayonggo fikhi logolik, ”Hiren mel yagaisa lano: Niren hit afuni Israel mene o Mesir yoma nen wokhinarek wulibuageluk ninayonggo fikhemo wago, iluk yagaisigik, nen, raja Firaun a'nogo yagati logolik, niren afuni Israel mene woginarek wulibuageluk ninayonggo fikhemo wago o, iluk yagatik, i lano o,” iluk lakfisasikhe.

Musa Harun inombalak ta'larik wagaukwa wene

¹³ Musa inom, Harun inom, inombawi taginabik wagaukwa menere yi: Yakub amlogo manggusa menere Ruben, aren againafuri ap enggaminogo welagaukwa mene inenu re yi: Henokh, Palu, Hezron, Karmi inom. It andem he afuni inunggulenu Ruben mene inambu-inombalak welagaukwa.

¹⁴ Simeon againafuri abengge inebe falfaligen welagaukwa, inenu re: Yemuel, Yamin, Ohad, Yakhin, Zohar inom. Nen, ap he Kanaan mene andi nen he Saul tatikhe. It andem he afuni inunggulenu Simeon oba nen inambu-inomba mene welagaukwa.

¹⁵ At Lewi re, amlogomi inebe henagan mene welagaukwa. Inenu re Gersom, Gehat, Merari inom andem; it andem he afuni inunggulenu Lewi mene inambu-inombalak welagaukwa. At Lewi ebere umur 137 tahun huli welagaikhe.

¹⁶ Gersom amlogomi inebere pire welagaukwa, inenu re: Libni inom, Simei inom, iren taginabik wagaukwa mene hokho-pokhorogo welagaukwa.

¹⁷ Kehad amlogomi inebe enggaminogo nen welagaukwa. Inenu re Amram, Yizhar, Hebron, Uziel inom. At Gehad ebe umur 133 tahunr huli welagaikhe.

¹⁸ Merari amlogomi inebe pire tago welagaukwa. Inenu re Mahli inom, Musi inom, ap inunggulenu Lewi mene a'nogoba inunggulenu lombok it inambisangma ta'laga lagaukwa mene inom a'nogo welagaukwa.

¹⁹ At Amram he agwe eisena agot hele Yokhebed helasikhe, nen at againafuri re Harun inom, Musa inom. at Amram ebe re umur 137 tahun huli welagaikhe.

²⁰ Yizhar againafuri abengge inebe henagan welagaukwa. Inenu re: Korah, Nefeg, Zikhri.

²¹ At Uziel againafuri abengge inebe henagan welagaukwa. Inenu re: Misael, Elsafan, Sitri inom.

²² At Harun he agwe hun Aminadab a'logo hele Eliseba a'nogo helasikhe; he Eliseba ebere Nahason erei. At Eliseba nen he Nadab inom, Abihu inom, Eliazar inom, Itamar inom taginafikhe.

²³ Korah againafuri abengge inebe henagan welagaukwa. Inenu re: Asir, Elkanah, Abiasaf andem. It andem he afuni inunggulenu Korah mene inambu-inombalak welagaukwa.

²⁴ Eliazar hun Harun amlogo a'nogo re agwe hun Putiel a'logo misik ekhe helasikhe, nen it ineak he Penehas tatukwa. It inunggulenu Lewi meneba nen it inagainafuri tagomangge a'nogo inogogwi kaindek lombok inawi sili lombok welagaukwa menere andi.

²⁵ Harun, Musa inom andemen afuni Israel mene o Mesir en woginarek wulibi wesuageluk Tuhan nen inayonggo fesikhe.

²⁶ At raja Mesir mene nen afuni Israel mene lologo wulak fisoageluk it inebe pire andemen raja were'ma kwi lagaukwa.

At Allah nen he, ”Yi'nogo hilingi'no, ti'nogo hilingi'no,” iluk Musa Harun emberek yagaisasikhe wene

²⁷ Tuhan nen at Musa o Mesir en yagati logolik,

²⁸ mel yagatikhe: ”Tuhan he Anaro. An nen yi wene ti wene yagaheti mene andi, at raja Firaun a'nogo yagasi lan o,” iluk yagatikhe.

²⁹ A'nogo yagatikhe meneat he, at Musa nen Tuhan mel yagatikhe: ”Neisena, an nen wene yagaisa re, nane holek logou mene hangge igirek lek andi hat helu o. Andi nen he, at raja Firaun andi. an nane hologo hilingisigin anggegen a? Elo'lego,” iluk yagatikhe.