KELUARAN 40 - Allah Wene Fano Wene Hupla Inane

Tuhan awi a'nogo wutikhesik tegelogo fesikhe wene

¹ Tuhan nen Musaba yagati logolik mel isikhe:

² ”Tugi attak meneba tanggal misik oba werek kwelek andem he An Nawi Sabu ekhe wu'no o,

³ A'nogo wutfembik Wene Warek 10 nen a'nogo Peti elema kwalegengge O Sabu wuri'mo kwelakfeino, a'nogo kwelakfembik he kain wurilik mene elokhoma kologo feino.

⁴ Andi nen, meja mene, elonggoma andoma nen hilingitarek mene mondogat inom, esage lampu eisok ogo kwelakfembik he, lampu ebe ibil feino.

⁵ Mezbah emas amben fano mene nolhuba andi re, Peti Wene warek kwalek mene andi elokhe fikhit andoma hut fembik he, O sabu salek a'nogo solombonma kwe ambeba andem he kain kologo pelak feino.

⁶ Nen mezbah obalik warogo nolhuba andi re O Sabu andi solombonma kwe kuguba andem feino.

⁷ I yenggelhu mene obalik andi re, O sabu andi honggolek mezbah honggolek tulem andoma feino. A'nogo fembik i hinagaisogo feino.

⁸ Andi nen kain esanggo wurilik mene re, O sabu andi ambe pale'ma tegelek logogin oba elokhoma andoma haningisogo kolik lambik he, kwe sou hokho mene andiba hulirogo re kain kwe palengge kologo filik lano.

⁹ O Sabu andi inom, O elonggokwe hilingitu mene andoma mondogat inom An nobaget fuluk he, amusu kweisalogo nobagagu nogo. A'nogo hilingiti logogun andiba re andoma An nobaget tegelek mene logogin.

¹⁰ Andoma mondogat An nobaget enek kabokhogo fugunem An nonggwarek nangge mene logouwageluk he mezbah inom yi mene ti mene mondogat inom An enek wo'neti logoino.

¹¹ I yenggelek fugu mene obalik inom, o'lu earek mene andoma ogo, a'nogoat hilingi'no.

¹² Andi mondogat hilingfuluk he, Harun inom at againafuri inom inebe mondogat O sabu solombonma andoma we'luk inebe horogo fakhikhi logouwak.

¹³ Su it imam lagen labetarek mene a'nogo at Harun oba labet fuluk he, at ebe An nobaget tegelek logolik yabu imam mene hilingiti logouwakhogo re, amusu ungguloba watfeino.

¹⁴ Andi mondogat hilingfuluk he, at againafuri andi horokhogo wesuageluk yagaisaluk wagunem he, it inebe inasu kemeja labet fisugunogo.

¹⁵ A'nogo hilingfisaluk he, iren inebe imam An nobaget logolik yabu hilingiti logouwakhogo re, it ineisena hilingfogoin andi hakhogoat it inebene ogo amusu kweisalogo watfisano. Amusu a'nogo wat fisogoin andiba re, it inunggulenu mene andi re, inenggi mo lagagik pigik ugu kwelek andoma ineabu imam logolik hilingitarek mene andoma eiserogo logolik hilingiti logogun,” iluk yagatikhe

¹⁶ A'nogo yagatikhemo re, at Musa nen he, Tuhan nen mondogat komotikhe mene omanogo higithogo nek hilingirik lagaikhe.

¹⁷ Afuni Israel mene o Mesir herakfisaluk wulibi wagaukwasik oba nen tahun misik welagaukwasik, tahun ekheba kwikhi logolik, tugi attak wenatarek mene a'nogoba, tanggal satu ba re, Tuhan Awi Su mene a'nogo wusugun mene erotukwa.

¹⁸ At Musa nen o andi wusuogeluk tik lakfesikhesik, eisok liafik, o ebe e ea nunggulik mene lakfigik, liabek mene liakfigik, isikhe.

¹⁹ A'nogo hilingitikhesik, nineisena Tuhan nen, ”Yi'nogo wu'no,” iluk isikhe higithogoat, wa'lengge su mene a'makwe mene salfigik, amboloba mene salfigik, isikhe.

²⁰ A'nogo salhikhesik, helep pire a'nogo peti Allah nen wene warogo wo'ninafikhe iluk hilingisogo elema kwelakfesikhe. Kwelakfesikhesik, peti ambe yagarogo re, epokhogo waluk nikhi logogun mene senggan oba kelhigik fesikhe.

²¹ A'nogo kelfesikhesik, Tuhan nen, ”Yi'nogo hilingi'no,” iluk yagatikhe higithogo, peti andi o Allah awi su mene wutikheba a'nogo elonggoma fesikhesik, laberogo su kain mene hulirogo kologo pelabi wagaikhe.

²² A'nogo pelabi wagaikhesik, su kain andi abel enda'ma ambolkwe utara fikhit andoma meja ekhe fesikhe.

²³ A'nogo fesikhesik, sumburu roti Allah faget fesukwa mene meja andiba earogo fesikhe.

²⁴ Fesikhesik, esage lampu eisok telik mene o a'nogo oloba abel a'makwe higit, meja a'nogo emberek inelokhe wuthogo fesikhe.

²⁵ A'nogo fesikhesik he, esage lampu andoma ebe lombok amulok ibilogo re, nineisena Tuhan elokhoma fesikhe.

²⁶ A'nogo fesikhesik he, mezbah Allah faget noleti logogun mene emas hilingik a'nogo re, o Allah ailoba su kain kologo pelabek mene a'nogo elokhoma higit fesikhe.

²⁷ A'nogo fesikhesik, at Tuhan nen, ”Yi'nogo hilingiti logoino,” iluk Musa yagatikhe higithogoat amben fano mene endu noletikhe.

²⁸ A'nogo noletikhesik, su uan mene o kwe palogo hulirogo fesikhe.

²⁹ Nen, kwe andi elokhoma re, yi mene ti mene Allah faget endu noleti logogun mene ekhe hilingisogo fesikhe. A'nogo hilingisogo fesikhesik, amboloba re, Allah faget wam warogo endu noletik, nenggarek mene ekhe fisigik, isikhe.

³⁰ I hinago fikhi logogun mene obalik ekhe hilingisogo o su mene andi kweba honggolek, yi mene ti mene Allah faget noleti logogun oba a'nogo honggolek, tulem andoma fesikhesik he, elema i hinagaisogo fesikhe.

^31-32 A'nogo fesikhesik, Musa Harun emberek inom, inagainafuri inom, hundik-handik O Tuhan awi su mene wuri'mo a'nogo kuogeluk ogo, nen yi mene ti mene warogo Allah noleti logogun oba fesikhe mene a'nogo horokhogo kuogeluk ogo, inenggi ineisok i andi sobalhi lagaukwa.

³³ O Sabu su mene wurik andi inom, yi mene ti mene Allah faget warogo endu noleti logogun mene andi inom, esanggokwe mondogat haningisogo leget higit su wurilogo kolhigik fesikhe. Fesikhesik, kwe ambe palek oba andoma su mene kolhigik pelabi wagaikheat. O a'nogo wutikhesik, arat eil hondologo wutikhe andi.

O hena Tuhan awi wuri'mo andoma sebeli pi waga lagaikhe wene

³⁴ At Musa nen o a'nogo arat wutikhemo nen, hobuk he, ohena Tuhan awi wuri'mo andi sebeli pi we'luk Tuhan ebe andoma were'ma re, o andi o hulu mondogat ombak-bak mondok hokho mene yararet hikhi lagaikhe.

³⁵ Andi nen he, at Musa o andi ku elo'lek aga lagaikhe.

³⁶ Ohena a'nogo Tuhan awi wuri'mo tum oba nen lagagu halok, afuni Israel mene o ale'ma hokhumhogo logoin iluk, inawi su mene wurik omanogo meisalhigik helaluk waga lagaukwa.

³⁷ A'nogo meneat he, ohena andi lagagi'lek werek halok, it inebe lagi'lek welagaukwa.

³⁸ Afuni Israel mene a'nogo o ya wutik ta wutik wagu kwelek Tuhan ebe inom woginarek waga lagaikhe. Ebe inom hundik welago iluk, Awi tum oba omanogo linggene re ohena welagaikhe. Nen, hubanggo re ohena anggele'ma endu higit aga lagaikhe. A'nogo hilinglagunem it afuni Israel mene ineilenggen hikhi lagaukwa.