KELUARAN 38 - Allah Wene Fano Wene Hupla Inane

Warogo nolhuba iluk obalik mezbah wutikhe wene

¹ Hun Bezaleel en he e akasia meneba obuluk warogo endu nolhuba ekhe wutikhe. Andi wuti logolik he uankwe inom horokwe inom he 2,2 meter en, liabek mene re 1,3 meter en wutikhe.

² Unggut enggaminogo ambol fikhit andoma re. andimuk mezbah ebe inom hunogo wutfesikhesik he ebene mondogat no perunggu meneba saplirogo hilingfesikhe.

³ Andi re no kuali inom sekop inom, mangkok inom, andi nen garpu inom, endu nonggwalhuba obalik inom, hilingitikhe. Mondogat hilingitungge iluk hilingitekhe mene andoma re no perunggu meneba nek hilingitikhe.

⁴ Aren he kawat senggan hakhogo perunggu meneba itikhesik he mezbah a'ma fikhit homakfesikhe mene andi re mezbah ebe lego mene a'nogo obakhe tulem ebene hilingfesikhe.

⁵ Andi nen he unggutmo re e piagayo faget senggan enggaminogo ikfesikhe.

⁶ E piagayo andi re e akasia meneba perunggu inom saplirogo hilingfesikhe.

⁷ A'nogo hilingfuluk he e piagayo aremnogo mezbah a'nogo abel fena ekhe-fena ekhe kwelakfesikhe. Mezbah andi re, e kagalek meneba wutikhe, nen elonggo fikhit he agauwelerek welagaikhe.

I yenggelhuba obuluk perunggu meneba wutikhe wene

⁸ Bezaleel en he perunggu meneba i yenggelfuguba faget o'lu re perunggu meneba eyarogo hilingitikhe. Perunggu andoma re eil mondok afumagengge mene it hemi O Tuhan Awi sabumo solombonma yabu hilingiti lagaukwa mene inangge meneba hilingitikhe.

Tuhan Awi Sabumo solombon ambe pale'ma a'nogo wutikhe wene

⁹ Bezaleel en he O Tuhan Awi Sabu a'nogo su kain lenan sakhorek mene wurilogo ugunggeba re hulirogo kwelafikhe. Abel a'ma selatan fikhit uanhogo re 44 meter hilingfesikhesik he,

¹⁰ pebuk e perunggu mene dua puluh nen pelak fesikhesik, ebe lombok talenggere perunggu meneat hilingfesikhesik, enggi senegengge re perak meneba yelfesikhe.

¹¹ Fena utara fikhit ogo andi mene higithogo nek hilingfesikheat.

¹² Fena barat fikhit ogore kain wiyog su mene uanhogo re 22 meter en, e menfugu mene re 10 nen, talhu mene re 10 nenat, kain agundibet fugu mene re perak oba pugunetikhe.

¹³ Fena timur pikhit ebekwe kugukwe andi re su wurilogo re 22 meter oba hilingitikhe.

^14-15 Kwe sou andi abel ebekwe ogo, nen harekwe ogo, kain wurilik mene 6,6 meter en, e liabek mene inom, ea fugu mene inom he, henagandek higik fesikhe.

¹⁶ Su wurilik mene ambe palek kwe abirengge andoma maserogo kolik logoin mene faget he, kain lenan eil sakhorek meneba hilingfilik lagaikhe.

¹⁷ E liabek mene ea faget he, perunggu meneba hilingfesikhe. Sep hunituba inom maserogo amboloba inom he, perak meneba hilingi'mo, misik hundik welagaikhe.

¹⁸ Kwe sou o solombonma afuni andogotuba a'nogo kwi laguba hulirogo yagarek mene andi su re kain lenan wol mene inom, eil hal-hali warek mene inom, ungu mene inom, mep mene inom agaumhogo ugumore alilingge su inenggi nen ugu mene te'merogo kolek welagaikhe. A'nogo kolek welagaikhe mene andoma kwe esanggo higithogo wurilik kwe re 9 meter en liabek kwe re 2 meter en kain o ambe pale'ma a'nogo hilingik hakhogo hilingik welagaikhe.

¹⁹ Kain kwe sou laberek mene andi re, e 4 en liabek mene andoma, ayugouk oba talek mene re perunggu 4 en talek welagaikhe. Inenggi senegge inom, amboloba sebelek mene inom, hambongge inom, andoma mondogat he, perak meneba nek hilingik welagaikhe.

²⁰ Oba nen he, e pebuk O Sabu andi faget inom, leget faget inom, telhikhe mene andoma re perunggu meneba nek wutikhe.

Logam oak O Sabu Tuhan Awi elonggoma andoma were'ma hilingiti lagaukwa wene

²¹ Tuhan Awi Sabumo helep pire meneba Allah Awene melalek 10 nen a'nogo palegengge were'ma hilingiti lagaukwa mene enu palek he yi. Enu palek andi re at Musa nen wene lenggalek oba it ap Lewi mene, hun Imam Harun amlogo Itamar a'nogo nen lenggalinafu kwelek hilingiti lagaukwa mene omanogo palfesukwa.

²² At Bezaleel, hun Uri amlogo, Hur omba unggulenu Yehuda mene a'nogo nen he Tuhan nen yi aple ti aple lenggalinafikhe mene omanogo mondogat hilingitukwa.

²³ At lebethikhi lagaikhe mene re, Aholiab hun Ahisamakh amlogo unggulenu Dan agun andi re, hesesengge wanhu aple inom, nen kain lenan eil sakhorek mene inom, yo eil hal-hali warek mene inom, ungu mene inom, mep mene inom, enggi nen itik, yi'nogo isugun iluk ilirengge walhigik, ugu mene welagaikhe.

²⁴ Emas o Tuhan Awi Hore'ma andi wutu mene faget iluk Tuhan wogetukwa mene andem wenagaisogo re 1.000 kilogram en, ebe re ilirengge Tuhan Awi Sabumo andoma nen walet hagarek meneba enggin waletukwa.

²⁵ No perak it afuni Israel mene inenu palogo wenaginafi logolik kabogetukwa mene re mondogat he 3.430 kilogram en, ebe ilirengge re Tuhan Awi Sabumo andoma nen enggin walhagarek meneba waletukwa.

²⁶ Mondogat kabogetukwa mene andi abirengge re it afuni inenu lisu paluageluk kabogetukwa mene andi inom higithogo kabogetukwa. Afuni inenu lisu palhukwa mene andi, it inebe umur 20 tahun ambol fikhit hilingik mene nek, ap mene nek he inebe 603.550 nen palhukwa.

²⁷ Perak omanogoba re 3.400 kilogram nen oba re O Tuhan Awi Sabu a'nogo langoak liabek mene ea himbirengge faget he, 100 nen figik, kwe sou ebe hilingitik, isukwa. Ea fesukwa mene andoma ebe lombok enggin he 34 kilogram en hilingfesukwa.

²⁸ Perak omanogo tindel agaikhe mene mondogat wenagaisogo re 30 kilogram en agaikhemo, Bezaleel en he agundibengge inom, O Sabu a'nogo tiang liabek mene omanogoba inenggi senengge inom, e liabek mene aremnogo unggulmo sebelek mene inom, wutikhe.

²⁹ Perunggu Tuhan wogetikhe mene andem mondogat wenagaisogo re 2.425 kilogram en.

³⁰ Perunggu andem oba re Tuhan Awi Sabumo kwe sou hurogo lakfuguba obalik hilingitik, mezbah perunggu meneba senggan igisogo kwelafik, mezbah andiba hilingiti logogun mene faget hilingitik,

³¹ su kain wurilik mene o ambe pale'ma a'nogo inom, kwe hokho mene a'nogoba kwi laguba faget inom, o Sabu andiba e pebuk telhu mene faget inom, o ambe pale'ma maserogo omanogo faget inom pugunetikhe.