KELUARAN 37 - Allah Wene Fano Wene Hupla Inane

Peti Wene warisasikhe mene a'nogo obalik logogin oba wutukwa wene

¹ At Bezaleel en Peti Wene Warek a'nogo e akasia oba wutukwa. Wuti logolik he uankwe re 110 sentimeter, horok fikhit inom liabek mene inom he 66 sentimeter oba wutukwa.

² Elonggo fikhit inom, endakwe fikhit inom he emas fano meneba nek te'merogo fesukwasik he esanggokwe wurep sebelogo re emas meneba nek maset fesukwa.

³ Andi nen e pia'luk lagu mene faget he, senggan emas mene 4 en igisogo peti unggut enggaminogo aremnogoba re, senggan pire unggut misik oba kwelakfesukwa.

⁴ E piagayo re akasia meneba hilingitukwasik he, emas inom seberogo hilingfesukwa.

⁵ A'nogo hilingfesukwasik e piagayo aremnogo re, peti a'nogo esanggo fikhit emas mene eiselek a'nogoba kwelakfesukwa.

⁶ Andi nen ambe sebelhu mene re, emas mondok fano meneba uankwe 110 sentimeter en, horokwe re 66 sentimeter en wutukwa.

⁷ Iren he kerub pire emas sagalek meneba ilirenggerogo hilingfesukwasik,

⁸ ambe a'nogoba wurep fena ekhe-fena ekhe fesukwa. Kerub pire andem he ambe sebelek mene a'nogo inom misik hunfesukwasik,

⁹ inebe inelokhe wuthigik hilingfesukwa. Nen, inagerabul langhogo re e peti Wene Warek a'nogo sebelek logolik inelokhe peti andi ambeba kwelagaisogo fesukwa.

Roti werago fuguba faget meja wutukwa wene

¹⁰ Bezaleel en he meja e akasia meneba wuti logolik, uanhogo re 88 sentimeter horok fikhit he 44 sentimeter en, nen liabek mene re 66 sentimeter en wutikhe.

¹¹ Meja andi ebe emas fano mene inom seberogo wutikhesik, esanggokwe ogo emas meneba maserogo wutikhe.

¹² A'nogo wutikhesik he, Meja andi esanggo fikhit sabiarogo re, 7,5 sentimeter en wutikhe. A'nogo wutfesikhesik he, esanggo sabiarekwe andi maserogo re emas meneba ero sebelhikhe.

¹³ E piagayo faget he, senggan enggaminogo nen igisogo re, meja eisok 4 en aremnogo unggut fikhit andoma kwelakfesukwa.

¹⁴ Nen e piagayo andi senek mene faget he, meja a'nogo esanggo fikhit andoma senggan anggwe folelogo hilingfesikhe.

¹⁵ E piagayo andi re, e akasia oba hilingisogo re emas inom saplirogo hilingfesikhe.

¹⁶ Aren ogo re, piring inom, iwak enggi werek mene cangkir inom, iwak ekhe anggur agai hinagaisogo fugu mene mangkok inom hilingitikhe. Meja andiba hilingiti logogun mene andoma re emas mondok fano meneba wutikhe.

Lampu eisok wutikhe wene

¹⁷ Bezaleel en lampu eisok wuti logolik, emas fano meneba wutikhe. Inenggi senengge mene inom, talegengge inom he, emas sagalek meneba wutikhe. Owil-owilengge hesesengge hakhogo hilingik welagaikhe mene andoma inom, enggen mumungsek mene inom, andoma re inenggi senetu mene inom misi'mo seberek welagaikhe.

¹⁸ Inenggi senetungge andiba re, 6 en akhogo hilingfesikhemo re, ombandu amu-amu andomaba handogalhogo henagan nen aksek welagaikhe.

¹⁹ Handogalsek andoma higithogo re, alilingge e badam mene owil henagan mumungsek mene inom, abip inom ilirenggerek welagaikhe.

²⁰ Handogalsek mene andoma inenggi senetungge no badam owil mumungsek mene inom, abip inom enggaminogo nen ilirenggerek welagaikhe.

²¹ Handogalsek mene andoma a'makwe re owil misik-misik mumungsek mene ilirenggerogo fesukwa.

²² Lampu eisok andi abirengge inom, handogalhogo aksek welagaikhe mene andoma inom, owil wurilik welagaikhe mene andoma inom he, emas fano mene misik lebeksek meneba hilingik welagaikhe.

²³ Lampu eisok andiba re lampu sabiren inom, sumbu puguneti logogun mene inom, elonggoma re emas mondok fano meneba hilingfesikhe.

²⁴ Lampu eisok a'nogo inom, andiba hilingitu mene abirengge andoma wutu mene faget inom he, emas mondok fano mene wenagaisogo 35 kilogram oba wutikhe.

Obalik amben-amben engge dupa nolhuba mezbah wutikhe wene

²⁵ Bezaleel en he e akasia meneba obalik dupa nolhuba mezbah ekhe fanorogo wutikhe. Wuti logolik mezbah ebere unggut hilingisogo, uan hogore 45 sentimeter en liabek mene re 90 sentimeter oba wutikhe. Unggut enggaminogo hilingik mene aremnogo amboloba re andimuk mezbah ebe inom seberogo hundik logouwageluk hilingfesikhe.

²⁶ Ambolkwe poma re abel 4 en andi higithogo inom nen andimuk andoma inom he, emas mondok fano meneba saplirogo hilingfesikhesik he, ebe esanggo maserogo re emas meneba fanorogo hilingfesikhe.

²⁷ Mezbah ebe andi pia'luk lagu mene iluk, e piagayo andi agorek logouwageluk he, no emas meneba sebelogo hilingik mene andi a'ma fikhit senggan pire hilingfesikhe.

²⁸ E pia andi re e akasia meneba emas inom saplirogo wut fesikhe.

Amusu wene kabogeti logolik hilingiti logogun mene inom, amben fano mene dupa inom hilingitikhe wene

²⁹ Bezaleel en he amusu wene kabogeti logolik hilingitu mene faget inom, dupa amben fano mene minyak wangi inom, mulelogo hilingik mene hakhogo inom hilingitikhe.