KELUARAN 33 - Allah Wene Fano Wene Hupla Inane

Nineisena Tuhan nen afuni Israel mene tom Sinai herakfisaluk wesuageluk yagaisasikhe wene

¹ At nineisena Tuhan nen Musa oba yi'nogo yagatikhe: ”Afuni o Mesir en woginarek wagen mene aroma hinom he, o yoma herakfisaluk o An nen Abraham inom, Ishak inom, Yakub inom, iren tagomangge mene inom, wogisageluk wene warisasigiba andoma lani o.

² An nen he, malaikat ekhe hit wokhinarek mondok loageluk ayonggo fembik hinoba lakfei wesigin o. Wokhinarek lamo, An nen he, afuni inunggulenu Kanaan mene inom, Amori mene inom, Het mene inom, Feris mene inom, Hewi mene inom, Yebus mene inom, mugusogo wulakfisagain o.

³ Hit he, o kweang muli fanoma, yi mene ti mene mondok hokho-pokhorogo were'ma andoma logogun. A'nogo meneat he, afuni Israel mene aroma inendawinggen mondok helep andi nen he, ebekhalem laga logolik An nen legetfisigi hanogo iluk he, An nebe ninom logoin lego,” iluk yagatikhe.

^4-6 A'nogo yagatikhesik, hobuk at Musa nen afuni Israel mene wene ekhe yagaisoageluk yagatikhemo mel yagaisasikhe: ”At Allah nen he, Hit afuni yi re, hinendawinggen helep hangge welagep. Mare, An ninom logoin halok, An nen hit hinebe mondogat weagethinabigin anggikhi lagi o. Halok he, hit hinalilingge waganek mene aroma mondogat nonggologo feino o. A'nogo fegep halok, An nen hit hinoba hilinghinabigin mene wene halogo fagain o, iluk ikhe yagaisan,” iluk yagaisasikhe. Nineisena Tuhan nen a'nogo yagaisasikhemo, iren inesanggo holhukwasik he, inendawimo mondok weak agaikhesik, inoba sinurogo fong welagaukwa. A'nogo hilinglagaikhesik, it mene inalilingge andi nonggologo fesukwasik, tom Sinai herakfuluk waga logolik he, it afuni Israel mene inalilingge ekhe wanhi lagaukwa mondok lek.

Tuhan awi tenda meneba wutukwa wene

⁷ A'nogo hilingitukwasik, at Musa nen nineisena Tuhan awi wusigiluk he, it afuni Israel mene inawi sabu tenda andomaba nen endakwe ale'ma pa'nakhogo wuthikhesik he, enu o andogoti logogun oba iluk salhikhe. Andi nen he, it ekhe nineisena Tuhan nen komo wene ikherek mene holu inamolo mene halok he, wulibi laluk o andi laga lagaukwa.

⁸ At Musa o wuri'mo andi kwigeluk lagu halok he, it afuni Israel mene inebe mondogat he, inailoba kwe ambe pale'ma andoma menla'luk ineilenggen were'ma nen at Musa ebe kugunem haluk enek he, inailokwe kwikhi lagaukwa.

⁹ At Musa arat kwe lagunem en, ohena mendek a'nogo pi we'luk he, o sabu wuri'mo kweba andoma kamo ikhi lagaikhe. Kamo ugunem, at nineisena Tuhan ebe ohena andiba logolik Musa emberek weneane ikhi lagaukwa.

¹⁰ Ohena mendek a'nogo Tuhan awi su mene wuri'mo andi kweba were'ma, it afuni Israel mene ineilenggen yethaluk he, inebe mondogat inaiba lombok kweba menla'luk, ineindep awi yagaisogo fogerati lagaukwa.

¹¹ A'nogo fogeratu kwelek, At nineisena Tuhan Musa emberek afuni inagaila'lak inom weneane inelokhe yet-yet agarek andi hak ikhi lagaukwa. A'nogo arat uluk, at Musa aiba su mene wuri'mo waga lagaikhe. A'nogo meneat he, ap alage Musa lebethikhi lagaikhe mene, Nun amlogo enu Yosua andi nek he, o Allah awi su tenda mene wuri'mo a'nogo oloba mondok welagaikhe.

Fethinarek mondok logogin iluk Tuhan nen againafuri wene warisasikhe wene

¹² O inenggi ekhe sambul he, at Musa nen Tuhan oba mel yagatikhe: ”Neisena, haren he, an nen afuni yi woginarek o haren wo'nisageluk wene wa'nisasigin oba woginarek loageluk yaganeten. A'nogo meneat he, ap andi nen lebethoageluk ayonggo fembik lakfei wagi, iluk yaganeten lek andi. Neisena, haren he, An faget Hat hebe nelu, noba liok ili'lago, iluk yaganetigin andi.

¹³ An hat faget hilingiti logolik, hendawimo hamolo mene nek hilingitu mondok logoigen he, haren yi'nogo hilingisigin iluk anggegen mene andi yaganom o, neisena. Haren he, afuni yi, an nagainafuri logouwageluk, wenagaisogo fisasigin a'nogo hendawimo ebesin o, neisena,” iluk yagatikhe.

¹⁴ A'nogo yagatikhemo, Tuhan nen he, ”An nebe nenat fethinarek welagik, fano liokhogo welagik, ugu kwelek o hit wokhisageluk wene wathisasigiba andoma eise asi kugun o,” iluk yagatikhe.

¹⁵ A'nogo yagatikhemo at Musa nen he, ”Hat nit ninom logoin lek halok he, o yoma herakfuluk lani, iluk yaganisagun o.

¹⁶ Haren nit lebetnisaganin lek halok, afuni nen he, Musa inom, afuni Israel mene inom, inebe at Allah oba liok ili'logo higi, iluk ninggi'nogo nen inelu asugun anggegen. Hat nit ninom mondok logogun andiba afuni kweangma welagaikharek mene ekhe hunogoat, nen nit Israel mene hunogoat, enegat asigin o,” iluk yagatikhe.

¹⁷ A'nogo yagatikhemo, Tuhan nen Musa mel yagatikhe: ”Hat hebe An nelu logolik, hebe noba liok ili'logo andi nen, haren kino yaganeten mene andi An arat nesanggo holhirik a'nogo hilingisigin o,” iluk yagatikhe.

¹⁸ A'nogo yagatikhemo, at Musa nen he, ”Haren he, An nebe ninom welago, iluk hombak-bak yararet hugunem yetheagen he, inuk neano o,” iluk kino yagatikhe.

¹⁹ A'nogo yagatikhemo, at Tuhan nen he, ”An nebe esinatma fogetnafarek mene nonggwarek nenu uluk helokhoma laga logogin. An hineisena Tuhan nen, nagainafuri nendawirinabigin anggaluk nendawirinafik, noba liok uak anggaluk, fano liogeriafik, igirego.

²⁰ An nebe afuni nen ineilenggen nealuk, ineluk logogun lek andi nen he, nelokhe inuk heagain lego.

²¹ Obalik ekhe An nera'lu enda'ma andoma punu helep mene ekhe werek a'naga hat hebe andoma mendek logoino o.

²² An nebe nombak-bak yararet hilik waga logolik, hat hebe punu helep mene anggele'ma kwelakhobagambik nenggi nen laberogo hobagambigen, nombak-bak arat yararethogo laga logouwagen wokhagain o.

²³ Wokhambik, nelokhe heilenggen neagain lek meneat he, nambotkwe nek neanogen iluk, nenggi wokhagain o,” iluk yagatikhe.