KELUARAN 31 - Allah Wene Fano Wene Hupla Inane

Allah nen At Awi sabu a'nogo inom, o andiba hilingitu mene inom wusuageluk ap heragaisogo fisasikhe wene

¹ Tuhan nen Musa yagati logolik,

² ”An nen hun Bezaleel hun Huri amlogo, hun Hur omba unggulenu Yehuda mene a'nogo yanggulhigi,

³ An nomame a'nogo at oba we wogetigi. An nen he at oba endawinggen wenggelek oba hilingisuageluk inom, yi wene ti wene mondogat elu asuageluk inom, at enggiba nen ekhe mene-ekhe mene mondogat ambelal weak hilingiti logouwageluk inom, An nareagun a'nogo at oba wogetigi,

⁴ Andi ebe re, ekhe mene-ekhe mene no emas, perak, perunggu mene oba ambelal weak elalhi logolik yire yi'nogo hilingfuluk wusugun iluk wil-wal haluk wuti logouwageluk inom,

⁵ helep permata fano talagarek mene faget man oba al wasuageluk inom; eba hesesengge wanuageluk inom, nen yi aple ti aple enggiba nen ambelal weak hilingisuageluk inom, hebelek mene wogetigi.

⁶ At Oholiab hun Ahisamakh amlogo unggulenu Dan mene a'nogo ogo re at lebethikhi logouwageluk An nen yanggulhigiat. An nen it tukang-tukang amu mene inoba ogo inelu mondok a'luk yi mene hilingi'ni iluk yagaisugunem hilingitu mene faget wogisasigi.

⁷ An Naiba Sabu andi inom, Peti Wene Warek andi inom, sa'lip sebelek mene andi inom, o Sabu andi elonggoma werek mene inom andoma ebere,

⁸ meja inom, andi amboloba werek engge inom, lampu emas mondok ebe meneba wurik a'nogo eisok inom, andiba werek engge inom, mezbah amben fano mene nolhuba a'nogo inom,

⁹ mezbah yi mene ti mene waluk nolhuba a'nogo inom, a'nogoba hilingitarek mene inom yenggelek mene obalik a'nogo inom, obalik eangge inom,

¹⁰ su it Harun againafuri inom inebe imam logolik yabu hilingisuogeluk labetu asu inom,

¹¹ amusu inunggul oba kweisalhu mene faget inom, nen senggelek hore'ma a'nogo amben fano mene nolhuba faget inom wusuageluk yagahisasigi. Mondogat andoma re An nen yi'nogo ti'nogo hilingisugun iluk hat melalogo hobagagi mene andem higithogo nek hilingi'no.” iluk yagatikhe.

It Inenggi Sabit oba set walogo logogun iluk, isikhe wene

¹² At Tuhan nen he it afuni inunggulenu Israel mene inoba

¹³ wene menfei loageluk Musa mimingiti logolik he, mel isikhe: ”Linggene Sabit andi sambul set walikhi logogun iluk An nen menfesigimo re, hiren linggene andi sambul he esin anggogoin. Hinenggi 7 andiba re hundik-handik hit inom, An ninom ninendawinggen eberek logolik, hiren he we An enek Tuhan welagi mene inom, nen hit hinebe An nonggwarek nagainafuri horek logouwageluk hinobagasigi mene inom inelu asugun.

^14-15 Inenggi sabit sambul set walogo logogun oba andi re, inenggi mondok fano horek mene hilingi'more, hiren esinet fikhi logogun. Hit hinobaget he hinenggi falfaligen logolik yabu hit mene hilingiti logobagaigeluk wokhisasigi, oba nen he hinenggi sabit mene andi re esin mene hilingi'mo re, An nobaget enekhogo fuluk logoino. Ap ekhe nen enggi andiba esinet figi'legengge yabu hilingitu halok he, eberogo nen at wene oba fuluk ebe pinggi wa'no.

¹⁶ Hit hinunggulenu Israel mene nen he, linggene andi faget wene mondok-mondok logogin mene wat-wat agagumo re, fanorogo serogo logolik esinet fikhi logogun.

¹⁷ An Tuhan nebe nen he, nenggi falfaligen he pogot inom, kweang inom elalhigi, nen nenggi sabit meneba set walogo welagagimo re, inenggi sabit mene andi re it afuni Israel mene inom, An inom ninendawinggen eberek logogun mene ikhe o,” iluk yagaisano, yagatikhe.

Helep pire Allah awene palek a'nogo Musa wogetikhe wene

¹⁸ A'nogo At Tuhan nen Musa inom Tom Sinaiba nen ane arat isikhesik he, At Allah nen helep pire kagalek meneba Allah awene melalek a'nogo onggwarek enggi nen palogo Musa wogetikhe.