KELUARAN 3 - Allah Wene Fano Wene Hupla Inane

Allah nen Musa ayonggo fesikhe wene

¹ Andem sambul he, at Musa wam eamal Yitro Allah eisewerek o Median mene a'nogo anggo domba, kambing inom konhi lagaikhe. Konhi logolik, wam woginarek he, o leimo afuni le'ma abel yikwe wagaikhesik, Allah onggwarek andom Sinai oba wagaikhe.

² Andoma malaikat Tuhan nen yonggo pelakfisa wagarek mene omanogo ekhe engga sebelek anggele'ma nen endu amuilogen wialhi logolik elokhoma menlasigiluk wagaikhe. Wagaikhesik, engga sebele'ma omanogo endu amuilogen wialhi lagaikhe meneat he, engga ebe endu nen ninggi'lek were'ma, at Musa eilenggen yethasikhe.

³ A'nogo hilingitunem at Musa nen he, ”Egi! Engga sebele'ma eroma endu nen nili'lago lek andi nailo e, elalin o. An nebe horokhogo nen neilenggen ha lagain,” iluk anggasikhe.

⁴ A'nogo anggasikhesik, eilenggen hageluk lagunem, At nineisena Tuhan engga sebele'ma omanogo anggele'ma nen eilenggen hasikhesik he mel yagatikhe: ”Musa, Musa,” iluk yagatikhe. Yagatikhemo, at Musa nen he, ”Wu i, an nebe yi welagi,” iluk yagatikhe.

⁵ A'nogo yagatikhemo, At Tuhan nen he, ”Hat hebe An nonggwarek nanggweang oba mendek welagen andi nen, hebe horokhogo ya wagi'lek, andem logolik heisok sandal ugu welagen mene ari nonggologo arem fein o.

⁶ Hat hombalak Abraham inom, Ishak inom, Yakub inom, ineisena Allah Anaro,” iluk yagatikhe. A'nogo yagatikhemo, at Musa eilenggen Allah yetha ailo agaikhemo, elokhe salhikhe.

⁷ A'nogo salhikhemo, At nineisena Tuhan nen he, mel yagatikhe: ”An nagainafuri afuni Mesir mene nen inamingmingengge higit ferinarek logolik, yi enggin ti enggin hilinginafunem telinabuageluk nayonggo fugu mondok welagaikharek andi, An arat neilenggen isigik, nesanggo holhik, igi o. It yi enggin ti enggin hili'lagwi andi An mondogat nelu o.

⁸ Andi nen, An nen it afuni Mesir mene nen ferinarek werek andi telogo woginarek o andoma nen o ekhe mondok hokho fanoma andoma lageluk pi wagi o. O andire, kweang mondok muli fanoma, yi mene ti mene nenggarek mene mondok hokhorogo were'ma yogondak afuni inunggulenu Kanaan mene inom, Het mene inom, Amori mene inom, Feris mene inom, Hewi mene inom, Yebus mene inom werek.

⁹ Afuni Israel mene Mesir mene nen sebelogo ferinarek weregen le ari'lagwi andi An neilenggen isigik, inane nesanggo holhik, igi o.

¹⁰ Haren An nagainafuri Israel mene o andoma nen woginarek wulibi we'nogen he, yogondak ap raja Firaun a'nogo oba lan o,” iluk ayonggo fesikhe.

¹¹ A'nogo ayonggo fesikhe meneat he, at Musa nen he, mel yagatikhe: ”An nebe sa nogo? An nebe elo'lek mene welagi yi re, ap kain Mesir mene a'nogo oba lambik, afuni Israel mene higit o Mesir en woginarek wulibi wesuageluk yaganeten a? Elo'lego,” iluk yagatikhe.

¹² A'nogo yagatikhemo, at Allah nen he: ”An nen lebethabigin o. Afuni nen he, Musa Allah nen eberogoat ayonggo fikhesik lakfei wagama, iluk enegat futhobagauwageluk, haren afuni Israel mene o Mesir en woginarek wagen halok he, tom yiba nen, An foge'nabugun o,” iluk yagatikhe.

¹³ A'nogo yagatikhemo, at Musa nen he: ”A'nogo egen meneat he, an afuni Israel mene inoba lambik an nen he, ninombalak ineisena Allah nen he, nayonggo fikhesik hinoba lak nobagai waga o, iluk yagaisugunem, iren he wene yi'nogo mondok eberogoat heinok wo'neogoinat anggigi: At andi enu sa, iluk heinok wo'neaga halok, an nen ninggi'nogo yagaisagain?” iluk yagatikhe.

¹⁴ A'nogo yagatikhemo, at Allah nen he, ”An he, Anaro. Afuni Israel mene yi'nogo yagaisano: Aren he, An he, Anaro, ikherek iluk agarek mene a'nogo nen hinoba laknobagai wagama wagi o, iluk yagaisano o.

¹⁵ Ekhe re, yi yagaisanogen yagahesik: An he, hit hinombalak Abraham inom, Ishak inom, Yakub inom, ineisena Nenupogot Allah a'nogo nen hat hayonggo figirik it inoba lakhobagagi o. An nenu re, Tuhan Allah, iluk ugu mondok logogun mene a'nogo aro. An nenu andi re, afuni hobuk ta'larik laga logogun mene mondogaren ugu mondok logoguno.

¹⁶ Afuni Israel mene inogogwi mondogat andogorinabi lan o. Lambik he, hit hinombalak Abraham inom, Ishak inom, Yakub inom, ineisena Allah a'nogo An arat nelokhoma menlaga o. Menlagasik yi'nogo yaganete: An hit afuni Israel mene it afuni Mesir mene nen hilinginabi'lagwi andi, An arat neilenggen isa pi wagi yi o.

¹⁷ Neilenggen arat isigirik, afuni Mesir mene nen it yi enggin ti enggin hilinginabi'lagwi andi telogo woginarek o kweang muli fanoma yi mene ti mene nenggarek mene mondok hokhorogo were'ma afuni inunggul enu Kanaan mene inom, Het mene inom, Amori mene inom, Feris mene inom, Hewi mene inom, Yebus mene inom, welagaikharek oba andoma woginarek lageluk wene arat igi o, iluk ikhe, iluk yagaisano o.

¹⁸ A'nogo yagaisamo, it nagainafuri nen hat hane inesanggo holugun o. Holugunmo re, hat afuni Israel mene inogogwi hinom at raja Firaun a'nogo oba lambik he, yi'nogo yaga'no: Nit afuni Ibrani mene nineisena Enupogot Allah ninelokhoma menlaga. Ma re, o leimo afuni le'ma kwe we inenggi henagan laga lagaikharesik arat kwi lagaikharek oba andoma lambik nineisena Tuhan Allah faget yi mene ti mene warogo nolesi louwogeluk haren, lani, iluk yaganisanogeluk wago o, iluk yagasi lano,” iluk yagatikhe.

¹⁹ A'nogo yagatikhesik, hobuk ekhe mel yagatikheat: ”At raja Firaun andi nen, fano. Lano o, iluk yagahisagain lek. We, An nen at nomamerogo yagasumo nek he, elok, lani, iluk igin a'naga An nelu aro.

²⁰ Ma re, An nomameba afuni Mesir mene yi enggin ti enggin inailo mene inoba lakfei wesigin o. A'nogo hilingitunem enek he, lani iluk yagahisagain o.

²¹ An nen, afuni Mesir mene inendawimo fanot fisamo agaukhogo hilinghinabuageluk hilingisogo fisagain o. A'nogo hilingisogo fisamo, nagainafuri wesugun andi sambul hinenggimo legengge ekhe wesugun lego.

²² Hemi Israel mene inebe lombogen afuni Mesir mene o sili misikwe welagaikharek mene inom, hemi Mesir mene inaiba misi'mo logogun mene inom, it inasu labetarek mene inom, inalilingge perak mene emas mene inom, kino yagaisamo wogisogoin o. A'nogo wogisamo, hinagainafuri labetfisigik, ikfisigik ugun o. A'nogo hilingisugun andiba yi mene ti mene afuni Mesir mene inangge hit helaluk wulibugun o,” iluk yagatikhe.