KELUARAN 27 - Allah Wene Fano Wene Hupla Inane

Mezbah wusuageluk yagatikhe wene

¹ ”Mezbah ekhe e akasia ba wu'no. Ebe wuti logolik obabut he unggut hilingisogo, nen ebe uankwe faget inom, nunggulik fogoin mene faget inom he 2,2 meter, nen liabek he 1,3 meter oba wu'no.

² Amboloba a yuguk ebene andoma unggut higithogore andimuk mezbah andi inom misik asuageluk hilingfeino. Andoma mondogat he, no perunggu oba saplirogo hilingi'no.

³ Kuali inom, sekop inom, mangkok inom, garpu inom, endu obalik inom puguneti logolik abirengge andoma re, no perunggu meneba saplirogo hilingi'no.

⁴ Kawat perunggu meneba igisogo e pia faget he, senggan 4 en mene pia andi unggut a'makwe fikhit kwelakfogoin.

⁵ Kawat ugu mene andi re mezbah andi obakhe tulemkwe yinggil fuluk he kawat ugu mene a'nogo mezbah a'ma fikhit maserogo hilingfeino.

⁶ Pia re, e akasia meneba pirenet perunggu inom saplirogo pugunet fembik he,

⁷ mezbah andi pia'luk laga logolik he mezbah a'nogo fena-fena senggan ugu a'nogo oba kwelakfikhi logogun.

⁸ Obuluk mezbah andi re e kagalek mene elonggoma anggwe folelogo wusugun mene faget iluk, An nen tom yiba nen yagaheti aple a'nogo tiphogo nek wu'no,” iluk yagatikhe.

Tuhan Awi leget wusugun mene faget isikhe wene

⁹ A'nogo isikhesik ekhe ikhi logolik he, ”An naiba sabu wurik mene o solombonma ambe pale'ma andoma re kain wurilik mene yo eil sakhorek meneba ugu mene andiba maserogo kwelakfeino. Su wurilik mene andi abel selatan fikhit he ebe uanhogo re 44 meter oba hilingfuluk he,

¹⁰ no perunggu oba langoak hilingik mene ebe 20 nen oba hambuget feino, nen abirengge andem he perunggu mene nek he, talhu mene feino, nen kwaliok inom, kolhu mene inom he, perak meneba nen hilingfeino.

¹¹ Andi higithogoat abel utara fikhit ogo hilingfogoin.

¹² Fena abel barat fikhit he su wurilik mene andi re uanhogo 22 meter en, nen oak pelabek mene re 10 nen, talhu mene re 10 nenat hilingfogoin.

¹³ Timur fikhit o kwe sou folelek fikhit andoma re su wurilik mene andi uanhogore 22 meter,

^14-15 nen kwe sou andi hare fikhit inom, pikhit fikhit inom he, su wurilik su andoma ebe lombok kologo amu-amu tomoget higik, uanhogo re, 6 meter nen e oak mendek mene re henagan, nen eare henaganat oba fogoin.

¹⁶ Kwe sou faget he, su hulirek mene uan hogore 9 meter kain lenan eil sakhorek mene inom wol pogot eil hak mene inom, eil ungu mene inom mep mene inom oba seleben segengge, nen ebene re yo lalek meneba alilingge wokhigik hilingik meneba kolhigik filik logoin. Solombonma kain porek logogin mene andi senek logouwageluk he, e oak 4 en oba inomen, ea mene re 4 enat oba hilingisugun.

¹⁷ O solombonma maserogo pelabek mene andi re ekhe nen ekhe inom misik hundik logouwageluk he, kwaliok perak mene oba wat fogoin, kwaliok andi re perak meneba eangge nek he perunggu oba hilingfogoin.

¹⁸ Su wurilik mene o solombon oba andoma maserogo logogin mene andi re e uan hogore 44 meter en horok fikhit he 22 meter en liabek mene 2,2 meter en hilingfogoin. Kain wurilik mene andi re kain lenan eil sakhorek meneba isugun, nen eangge nek he no perunggu meneba hilingfogoin.

¹⁹ O Sabu andi elonggoma andoma re yi mene ti mene logogin mene inom, o sabu andi faget e telhi logogun mene faget inom, nen su wurilogo kolhi logogun mene andi faget inom he perunggu meneba enek hilingisugun,” iluk yagatikhe.

Lampu halhi logogun Mene faget isikhe wene

²⁰ Ekhe yagati logolik he, ”An Nawi Sabu wuri'mo andoma lampu ibil fuluk liarek mondok logouwageluk he, it afuni Israel mene nen zaitun amusu amu mene yugulik legengge eil mondok wurik mene nek lampu faget waluk wesuageluk yagaisano.

²¹ At Harun amlogomi inomen he lampu andi hu'mokwe huli nen he, hubet huli andoma iren enek An nebe weinam asi waga logogin oba, Peti Wene warek mene a'nogo elokhoma re, kain kologo pelabek mene endakwe fikhit andoma nen halhi logogun. Wene melalek andire, afuni Israel mene inom, iren tagongge mene inom huli andomaba hilingitu mondok-mondok logogun,” iluk yagatikhe.