KELUARAN 26 - Allah Wene Fano Wene Hupla Inane

O Sabu tenda Tuhan aiba a'nogo faget isikhe wene

¹ ”An Nawi Sabu andi wuti logolik he kain lenan yo eil sakhorek meneba kwago mene ebe 10 nen menere, yo domba esi mene eil pogot hak meneba inom, eil mep meneba inom, eil hal-hali warek meneba inom seleben ogo re, kain andi wurep ebene kerub ilirenggerogo andoma mondogat hilingi'no.

² Su andoma ayuguk he, higithogo nek palfeino, nen unggut uanhogo re 12 meter nen unggut wurilogo re 2 meter hilingfeino.

³ Kain andi palek fuaben he misik agundibet foumo re oba wurilasigin, nen palek fuaben ekhe andem ogo re a'nogo nek hilingi'no.

⁴ Kain pire andem esanggokwe re elugun watfuguba faget kain elokhe pogot eil hak meneba eisel feino.

⁵ Kain ebe lombok he elugun 50 nen eiselhu mene hilingfeino.

⁶ Kain pire andem misi'mo elugun watu aple faget he kolfugu mene emas mene 50 nen pugune'no.

⁷ O Sabu andi tum salugun mene faget he kain kambing esi mene 11 nen lebege'no.

⁸ Abirengge andem he wurep higithogo nek lebege'no, nen unggut uanhogo re 13 meter en unggut wurilogo re 2 meter higik lebege'no.

⁹ Palek 5 nen wurep misi'mo selebene'no, nen fena 6 en andem ogore a'nogo nek hilingi'no. Palek 6 mene elugun warek mene andire O Sabu tenda andi elokhe fikhit sebelek mene faget tulem pire sirogo hilingfeino.

¹⁰ Kain wurilik mene aremnogo nen attak meneba re elugun watu mene 50 nen anggwe folel feino, nen, kain pirenek mene andiba ogo re, 50 nenat anggwe folel feino.

¹¹ Kain wurilik mene pire andem elugun misi'mo seleben hogo re, O Sabu tenda a'nogo saluageluk no perunggu meneba elugun watu mene anggwe 50 nen folel fuluk he fena-fena elugun watfeino.

¹² Kain andi nen fena tindelogore O Sabu tenda ba salek andi ambolkwe andoma salfeino.

¹³ Kain andi tindelasigin mene uan hogore 50 sentimeter en hakhogo o sabu andi unggut hilingik higithogo o andi abel fena-fena andoma maserogo salek logouwageluk hilingfeino.

¹⁴ O Sabu tenda andi endakwe sebelek mene faget he pire ekhe inomat hilingi'no, misik he domba ai mene agap oba amusu mep mene warogo nen ekhere agap serameak meneba hilingi'no.

¹⁵ O Sabu tenda andi lang oak faget he, e akasia mene ligabek menogo wut filik lano.

¹⁶ E lang oak andoma wurep liabek mene uanhogore 4 sentimeter en wurep nunggulik mene re 66 sentimeter en higik, hilingfeino.

¹⁷ Lang oak andoma ebe lombok pirendek erarogo fuluk, oak andoma misi'mo agundibet filik logoin.

¹⁸ O Sabu tenda andi nen selatan fikhit faget he oak 20 meneba wut feino,

¹⁹ nen ea talek menere no perak oba menere ebe 40 meneba hilingi'no. Ea pire andem ninghogo anduli ebe lombok wut fogoin.

²⁰ O Sabu andi nen utara fikhit faget he oak 20 nen meneba wutfeino.

²¹ Nen, ea talek andem no perak meneba ninghogo anduli ebelombok pirendek wuthigik 40 nen wut fogoin.

²² O Sabu tenda andi ambol barat fikhit andoma faget he, e oak 6 en hilingfeino.

²³ Nen, o andi unggut fena-fena faget he e oak pirendek menfeino.

²⁴ E oak andoma erokwe inom, wurep fikhit inom, agundibet feino. Unggut hilingik mene pire andem ogore a'nogoat hilingfeino.

²⁵ Arigini'mo re, oak andoma 8 nen liabe'ma anduliba ninghogo iluk perak meneba hilingik logogin. Anduli re 16 nen hilingik logogin, andi nen e oak misik oba re, e anduli pire ligabek logogin. fena andoma andi higithogo nek hilingik logogin.

²⁶ E nunggulik mene faget he 15 nen eakasia mene nek fouget fuluk 5 nen o sabu abel fena kwe faget,

²⁷ nen, 5 nen ekhe re amu fikhiren agorek logogin mene, 5 nen ekhe re o sabu abel barat fikhit andoma agorek logogin mene hilingi'no.

²⁸ E ambolkwe mene honggolek a'makwe mene honggolek tulem tiagansek logogin mene re, uan mene o sabu andi fena-fena tipsek logogin.

²⁹ E oak mendek mene inom, e nunggulik tiagansek logogin mene inom, abirengge andoma re emas meneba nek saplirogo hilingisugun. E nunggulik senggan kolhigik fogoin mene andoma ogo re emas meneba hilingisugun.

³⁰ O Sabu andi re wusugun higithogo An nen yi'nogo wu'no iluk Tom yiba nen yagaheti higithogoat wu'no.

³¹ Kwe sou re kain lenan eil sakhorek mene domba esi meneba yo eil pogot hak meneba inom, hal-hali eil hak meneba inom, eil mep meneba inom, selebenhogo hilingi'no. Kain andi selebeneti logolik he, kerub ilirengget higik hilingi'no.

³² Hilingfuluk he, kain andi e akasia mene enggaminogonek engge emas inom sablirogo hilingik meneba, kologo fugu mene ogo emas menebaat hilingfuluk he, perak mene enggaminogo ea fogoin mene amboloba hilingfeino.

³³ A'nogo hilingfembik he, kain andi mene O Sabu engga salek mene a'ma kolhu mene erarek mene omanogoba kol feino. A'nogo hilingfoumo re kain andi nen O Senggelek ekhe Horek mene a'nogoba inom, obalik ekhe Mondogat Horek mene andomaba inom hulire'ma, elonggo fikhit he Peti Wene Warek helep pire meneba palegengge kwalek a'nogo logouwageluk andoma kwelabi logoin.

³⁴ Peti Wene Warek ambe sa'lip andi re peti andi amboloba feino.

³⁵ Meja yi mene ti mene waluk fei waguba faget he, senggelek mondok horek mene andi nen abel endakwe utara fikhit andoma feino, nen lampu eisok hilingik andi nek he O Sabu andi elonggoma abel a'ma selatan fikhit andoma feino.

³⁶ O Sabu andi kwe sou oba kolek logogin mene faget he kain lenan sakhorek mene yo wol eil pogot hak mene inom, hal-hali eil hak mene inom, yo eil mep mene inom, oba lalek meneba hilingi'no. Hilingfuluk he, ebene re inenggi nen fanorogo alilingge liagaisogo hiling feino.

³⁷ Su kweba kolek logogin mene andi faget he, tiang e akasia mene 5 nen meneba emas inom saplirogo pugunet fembik kol fugu mene emas mene ebe 5 nen aremnogo inom wuret fogoin. E anduli menogo fogoin oba faget he no perunggu meneba ebe 5 nen hilingi'no,” iluk yagatikhe.