KELUARAN 25 - Allah Wene Fano Wene Hupla Inane

Tuhan Awi sabu wusugun mene faget kabogesuageluk yagaisasukwa wene

¹ Tuhan nen Musa yagati logolik,

² ”Afuni Israel mene nen An nobaget fili'lagwi mene andoma wo'nesi wesuagen yagaisan o. Ap ekhe endawimo nen wo'nesigin iluk An nobaget waluk fei wesigiluk he,

³ emas inom, perak inom, perunggu inom,

⁴ kain lenan eil sakhorek mondok fano mene inom, kain wol domba esiba ugu mene eil pogot hak mene inom, eil ungu mene inom, mep mene inom kain kambing esi mene inom andoma,

⁵ domba ai mene agap mep meneba yugulik mene inom, agap sakhorek mene inom, e akasia agap inom,

⁶ minyak lampu faget mene inom, amben-ambenengge amusu wene kabogeti logolik hilingitu mene faget inom, dupa hendali amben fano mene nolhu mene faget inom,

⁷ helep onggo mondok hokho wanharek mene inom permata eil yinik-hunik mene inom, su efod inom, su andire ebe inenggile hilingik lek inomolo togok menere kain fano mene eil amu-amu hilingik engge onggo hokho meneba hunisogo ugungge. Su ugu andiba re, ele hilingi'mo enu Urim inom Tumim inom, imam en Allah endawimo anggili'lago mene nelu asuageluk hilingiti lagaikhe mene oba eratu mene faget inom at Imam lego mene amik salek mene a'nogoba mintatu mene faget inom andoma waluk fei wesugun.

⁸ An nebe nagainafuri andi inanggele'ma andoma logogin nen he, iren An nobaget O Sabu fano hore'ma ekhe wusuakhogo yagaisan.

⁹ O Sabu inom, yingge-tingge o andi faget waluk wesugun engge andoma inom he, An nen yi'nogo hilingisugun iluk hat yagahesigin mene andem higithogo nek hilingisugun,” iluk yagatikhe.

Peti Wene Warek a'nogo wusimbik kwalogo fogoin mene faget

¹⁰ ”Peti misik ekhe wuti logolik, e akasia ba uanhogo liabek he 110 sentimeter en, wurepma nunggulik mene inom liabek mene inom, amu-amu re 66 sentimeter oba wu'no.

¹¹ Wuti logolik he elonggo fikhiret endakwe fikhiret emas endumo werago mene mondok fano meneba saplirogo wusugun, nen tum ogo re emas meneba nek wu'no.

¹² E pia faget he, senggan emas mene 4 en ikfuluk he unggut 4 en aremnogoba hunfeino, nen senggan ugu andem he, pirendek higik esanggo hilingik higithogo nek feino.

¹³ E pia andem he, e akasia oba emas inom saplirogo wusimbik he,

¹⁴ E pia andi senggan ugu elelekwe re, e peti a'nogo abel oba hilingik higithogo kwelakfeino.

¹⁵ E pia andoma re senggan andi elema mondogat kwelabek logogin, enggere lisogo wulak fisa fuk.

¹⁶ A'nogo hilingfuluk he e peti andi elonggomare, An nen Nawene melalek helep pire meneba palogo wokhetigi mene aremnogo kwal feino.

¹⁷ Peti andi ambe sebelengge re emas eil pugunsek meneba uanhogo liabek he, 110 sentimeter en nunggulik anggwerek fikhit he 66 sentimeter en oba wu'no.

¹⁸ Andi wuti logolik he kerub emas meneba mondok sagik-sagokhogo wuti logolik he,

¹⁹ peti a'nogo ambe sa'lib warek mene wurep fena re kerub ekheba, nen wurep ekhere kerub ekheba feino. Kerub ebe pire andi re ambe sebelek mene andi inom misi'mo sebet feino.

²⁰ Ambeba andoma inagerabul langhogo kwelabek logolik inom agundipsek mene hak peti andi amboloba logogun.

²¹ Helep pire andi peti andi elema fembik he ambe sebelogo feino.

²² O ariginik oba andoma An hat ninom ambi a'luk peti amboloba kerub pire fena-fena were'ma andoma nen it afuni Israel mene inobaget An nen hat wene melalek yi'nogo hilingi'no ti'nogo hilingi'no iluk wokhesigin,” iluk yagatikhe.

Meja roti werago mene fuguba faget wusugun iluk isikhe wene

²³ ”Meja misik ekhe e akasia meneba pugunhogo wu'no, nen uanhogo re 88 sentimeter, esanggo horok fikhit he, 44 sentimeter, liabek mene re 66 sentimeter oba wu'no.

²⁴ Wuti logolik he, emas mondok eilpugun sek meneba, sap palhigik wusimbik he, ebe maserogo emas meneba perelogo wusugun.

²⁵ Meja andi esanggo fikhit ayogouk he 7,5 sentimeter sabiarogo wutfuluk he, emas meneba huli palogo esanggokwe maserogo kwelakfeino.

²⁶ Senggan emas mene 4 en igisogo unggut 4 en forekwe kwelakfuluk, eisok 4 enat esanggoma hilingfeino.

²⁷ Senggan andi re meja andi pia'luk lagunem, pia andi agorek mene faget.

²⁸ E pia andi re e akasia meneba nek hilingisugun, emas inom saplit higik hilingisugun.

²⁹ Andi nen piring inom, waruk cangkir inom, iwak inom, cangkir anggur agai hinagaisogo fei lagu mene inom hilingisugun. Yi mene ti mene meja andiba hilingiti logogun engge andoma re, emas ebe meneba nek pugune'no.

³⁰ Meja andi re Peti wene warek andi elokhoma andem foumo were'ma, meja andi amboloba re, roti werago mene hundik fuguba logogin.”

Lampu eisok faget

³¹ ”Lampu eisok andi re emas obabut palek meneba pugune'no, inenggi senetuba inom, alhop inom he emas sagalogo pugunsek meneba wu'no; owil-owilengge kologo pelabek mene inom, atel sebelek mene inom, elha inom, alhop inom, inenggi senengge inom, misi'mo wuret fogoin.

³² Inenggi senetu mene andiba agole mondok lambukhogo re 6 en agethigik wutfeino, nen ombandu amu-amu re henagan higik hilingfeino. Inenggi senetu mene andibare, abel fena-fena henagandek wuret higik wutfeino. Nen lambukhogo re, 6 en agethigik wutfeino.

³³ Enggi handogal abirengge ebene re alilingge eil fanorogo badam owil wurilik mene inom, abib inom, 3 nen higik, hilingfeino.

³⁴ Inenggi senetunem andoma re alilingge badam mene oan owil wurilik mene inom, elha inom, 4 en higik pugunet feino.

³⁵ Enggi handogal fena-fena wutsek mene andoma ebene lomboget higik he, fem wure'ma nen pelagaisogo, unggul misikdek higik wut feino.

³⁶ Lampu eisok abirengge andoma inom, enggi handogalsek mene andoma inom, unggul wurilik mene andoma inom he emas sagalogo mondok ebe mene eil misik meneba wusugun.

³⁷ Lampu eisok 7 nen wutfembik he, lampu eisok liabek mene wurep ebene andoma mondok pugun-paganhogo hilingfoumo esage ibilfugunem ombak-bak he, ero fikhit andoma wial fikhi logouwak.

³⁸ Pelita andi ebene tetu mene inom, earogo fugu mene inom he, emas mondok fano meneba nek hilingi'no.

³⁹ Lampu andi eisok inom, nen andi ebene hilingik mene inom hilingitu mene faget he, emas mondok eil fano mene 35 kilogram en oba hilingi'no.

⁴⁰ Lampu andi eisok he An nen Tom yiba nen hat yagaheti higithogo hilingisugun nen he, fanorogo futfeino,” iluk yagatikhe.