KELUARAN 22 - Allah Wene Fano Wene Hupla Inane

Afuni inebe lombok inangge halhu mene faget isikhe wene

¹ ”Ap misik ekhe nen wam sapi hea, domba hea, ekhe hina'luk senggelogo onggo wanhu halok, sapi misik faget obali'mo sapi 5 nen fogoin, nen domba misik faget obali'mo domba 4 en fogoin.

^2-4 Aren yi mene ti mene hinasigin mene andoma onggo higithogo obali'mo fagain oba nen, at angge obali'mo fugu mene lek halok he, aren hinasigin mene omanogo obali'mo onggo hakhogo re at ebe inamingmengengge asigin. Nen aren hinasigin mene sapi hea, domba hea, keledai hea omanogo elugengge fisogo were'ma herasimbik halok he wam misik faget aren onggo wam pire kino igin. Nen o hubanggo ap misik ekhe nen oloba hinatunemen senfuluk wasugun halok he, ap wasigin agun andi re oba wene logogin lek. Oba nen he, linggene hilingisumo wasugun halok enek he, ap wasigin mene andi oba ogo wene logogin.

⁵ Ap ekhe nen tari'lagongge omanogo engga nilik laga logouwageluk aren yabukwe inom, anggur yabukwe inom waluk laluk kwalogo were'ma, tari'lagongge omanogo yugunat obogisamo afuni alek mene ineabukwe inom, anggur yabukwe mondok ningge halok, ap anggo eisewerek a'nogo nen enggen ugu fano mene hea, nen eabumo nen anggur enggen amusu mondok fano mene hea, obali'mo fikhi logogin.

⁶ Ap ekhe nen at eabumo endu nolfoumo lei a'nogo nilik laga logolik, ap amu mene eabumo gandum yagokwe wilibi'lago mene inom, athe gandum enggen ket palogo fagain mene mondogat nunggu halok he, ap endu noligin agun andi nen andoma obali'mo onggo higithogoat fagain.

⁷ Wene walhigik he, ap ekhe nen uang hangge hea, athe afuni inangge onggo hokho mene hea, oba foumo fano imbik fisogo were'ma nen, ap ekhe ahinak weak mene nen hinasigin halok, ap hinasigin agun a'nogo ebe weinam agunem ap andi nen onggo altap pireba fagain.

⁸ Mene athe at hinasigin agun a'nogo herasugun lek halok he, ap fisogo logouwagaluk oba fagain agun a'nogo hondo'luk he wene kabogetunem laluk, yi mene ti mene an noba fikhe mene andoma an nen hinati lego iluk hombuk paligin.

⁹ Wam sapi hea, keledai hea, domba hea athe su labetu mene hea, longgo ugunem herasugun mene faget inane sagalek pilili ikhi logolik halok he, ap ekhe nen andi an nangge iluk igin mene andi re hondo'luk he, wene kabogetunem omanogo fisa waga logogun. Fisa wagunem Allah nen ikhi logolik: ’Ap yi nen weak hilingite,’ igin mene andi re, aren onggo altap pireba angge eisewerek mene a'nogo wogeti logogin.

¹⁰ Walhigik he, ap ekhe nen angge keledai hea, anggo sapi hea, domba hea, athe aren tari'lagongge we amu mene ogo, at are nen mene ekhe kulhunemen wam a'nogo aben ineilenggen higi'le'ma nen wa'lasigin halok ogo, nen agap oba agambut palek logogin halok ogo, ap selei mene nen telogoin halok ogo,

¹¹ wene andi faget he, wene kabogeri'lagwiba omanogo lambik, ap kulhi logogin mene a'nogo nen he, an nen kulhi logouwageluk noba fikhe mene andi re an nen hinati lego, iluk Tuhan enu hombuk palogo igin. Nen eberogo aren herate lek halok he, alomat laga mene andi faget he, onggwarek agun andi oba lombok, nen at kulhi laga mene andi nen onggo feinogo.

¹² Wam andi re, it ap amu mene nen herasugun halok he, ap kulhi logogin mene a'nogo nen angge eisewerek mene a'nogo onggo obali'mo wogosigin.

¹³ Nen iren tari'lagingge andoma mene, mene aik anini weak mene nen warogo senggelambik nagain halok ap hali'lago mene a'nogo nen he, oak lologo waluk anggo eisewerek a'nogo oba enegengge re yi iluk inuk hagain. nen ap halhi logogin agun a'nogo nen anggo eisewerek mene a'nogoba obali'mo onggo wogosigin mondok lek.

¹⁴ Ap ekhe nen tari'lago mene are ekhe nen we elama faget kinorogo wanumo nen, wam a'nogo anggo eisewerek mene ebe lek kwelek tok agapma hundik halok ogo, nen ebe pinggi werek halok ogo, ap elama iluk wanigin agun a'nogo nen onggo obali'mo mondogat wanigin.

¹⁵ Mene athe, at eisena anggo eisewerek a'nogo ebe eilhanemen hilinglasigin halok he, at elama faget wanhe agun a'nogo nen onggo fagain mondok lek. Nen wam andi elama faget ap ekhe nen fisogo logogin iluk onggo fembik fisogo were'ma nen weaget lasigin halok he, onggore fisogo logogin iluk onggo fugu mene andiba kwi lagain andi aro,” iluk yagatikhe.

Afuni inebe weak hikingiti'lek fano logolik andogoti logogun wene

¹⁶ ”Ap ekhe nen hele ket silerik oan ap agap onggot mene, nen aben ogo hele ari an iluk oan aiksek lek mene ekhe inom, ninom nogouwogen iluk mimingitu halok onggo mondabi fembik ebe helagain fano.

¹⁷ Mene athe, hele a'nogo eisena nen, an na'logo ap andi nen wanigin lek ugu halok he ap andi nen onggo re hele a'nogo eisena oba helime ket silerik mene faget iginafi logolik fagarek higithogoat fagain.

¹⁸ It hemi nen ekhe inambolfamengge kanggorogo hilingitu halok he ebe pinggi wa'no.

¹⁹ Ap ekhe nen hali'lagongge, ap ekhe inom sebetu halok he ebe pinggi wasugun.

²⁰ Afuni nen An Tuhan nobaget enek wam warogo fikhi logou meneba nen, iren kembu ilah inobaget wam warogo fugu halok he ebe pinggi wa'no.

²¹ Hit attak o Mesir ap pok mene higit welagagip aple a'nogo hinendawinggen wenggel haluk he, hiren ap pok mene inoba enggin-fenggin fisigik, nen wene henarogo wene yagaisigik hilinginabu fuk.

²² It hemi sogwe mene inoba inom, yenggerugwi suarek mene inoba inom, hit hinendawinggen ebeti lagep mene andi nek hilinglasuageluk hinane ning-nanghogo yagaisa fuk.

²³ Hiren hinanini it inoba fikhi logogun halok he, iren lebetninabin o, iluk inane kweti logogun mene andi An Tuhan nen nesanggo holhi logogin.

²⁴ Inane holfuluk he, An nanini nen hit weim yabugun oba andoma hinebe pinggi hinoasumo, hit hinagagwi sogwe fisigik, hinagainafuri suarek mene agik, hilinglasugun.

²⁵ Afuni An namlogomi mene inanggele'ma andoma nen hit hina uang, ap inenggi lek mene nen palegengge hinoba logogin halok, hinane agaiyek oba ap yi mene ti mene onggo wili'lago mene nen agarek higit, to'mongge ekhe inom wanin iluk yagaisa fuk.

²⁶ Hiren ap ekhe asu jubah endakwe labetu mene at ombalegengge andi obali'mo feigeluk endawi lirengge iluk wanimbik halok, o mo oan ubuk igi'lek kwelek wogosugun.

²⁷ Su we misigenek mene hilingi'mo, ebe aganhanhogo iluk, andiba huli'liphogo nogoli'lagonggere, nen hiren at onggwarek wogosugun lek halok, at nogokhi logolik he nenanggeba huli'liphogo nogogin anggegep? Aren lebetnean o iluk An noba ane kwesigin mene andire, An nen elagaik hambik ane nesanggo holigin.

²⁸ Hiren hinaneweak Tuhan oba fou fuk, hit hinunggulenu mene hinanggele'ma andoma hinogogwi fethinarek mene inoba homan fisa fuk.

²⁹ Hinenggi ti sambul fikhi logogun iluk wenagaisogo fogoin higithogo hiren hineabumo onggo gandum enggen fena fikhit inom, anggur agai inom, zaitun amusu inom, andoma An nobaget fugunogo. Hinagainafuri ap manggusa tago andoma inom An wo'netunogo,

³⁰ nen fena sapi, domba eagwi ai mene attak tasigin mene halok inom An wo'neti logogun. Wam eak attak tasigin mene ai mene andoma re, inenggi 7 nen andi, agaisa inom wela'luk he, inenggi 8 meneba andi nek he An wo'nesi wesugun.

³¹ Hit hinebe re An nagainafuri horek logolik, hinanggo tati logogun mene andoma mene olomene nen senggelhu halok he ninggi logou fuk, meneat he, senggelek mene andoma hiren mene wogeti logoino,” iluk yagatikhe.