KELUARAN 2 - Allah Wene Fano Wene Hupla Inane

Musa ta'lagaikhe wene

¹ A'nogo hilinginafi lagaukwa andem oba re, iren hemi woginafi lagaukwa higithogoat, ap Lewi mene ekhe nen agwe Lewi meneat wanhikhe.

² Wanhikhesik, at he a'nogo eak abengge takhasikhe. A'nogo takhasikhesik, eilenggen kwelakhasikhe re, omalik a'nogo fano mondogen hinakfesikhesik were'ma tugi henagan welagaikhe.

³ A'nogo hinago welagaikhe meneat he, omalik a'nogo hinago mondok logou elo'lek agaikhe. Elo'lek agaikhemo, at he a'nogo nen he, yobin hangge mul itarek hak ugu mene wanhikhesik he, i kwinogo iluk ebenekwe amusu sin amusu hangge mene watfesikhe. A'nogo watfesikhesik he, omalik a'nogo mulugu andi elonggoma kwalfesikhesik, i Nil ima waluk lagaikhesik he, i esanggoma yobin hangge mene engga hokhorogo were'ma anggele'ma fesikhe.

⁴ A'nogo fesikhemo, at omalik a'nogo oe hele yenggerek mene nen agot a'nogo ninggi'nogo hilingisigin, iluk ebe yatma nen eilenggen welagaikhe.

⁵ Werek kwelek, at raja Firaun a'logo kume wasigiluk lagaikhesik, it helime yenggerugwi ekhe kain aiba andoma yabu hilingitarek mene i esanggokwe lagik-wagik ugu kwelek, at kain a'logo a'nogo ima pisikhesik eilenggen yethasikhe re, mul ugu yobin hangge mene i amboloba lialhugunem eilenggen hasikhesik inamingmingengge mene hele yenggerek mene ekhe nen wogesi puageluk yagatikhe.

⁶ Yagatikhemo pisikhesik, wogosi wagaikhemo, at raja a'logo a'nogo nen mul elonggoma a'nogo healogo kwelakhasikhe re, omalik a'nogo le agaikhe. A'nogo le agunem eilenggen hasikhesik he, endawi agaikhemo mel isikhe: ”Omalik yi afuni Ibrani mene inamlogo o,” iluk isikhe.

⁷ A'nogo isikhemo, at hele yenggerek omalik a'nogo oe nen he, kain a'logo a'nogoba mel yagatikhe: ”Noe, omalik ari eilak hunet hesuageluk an nen, he Ibrani mene ekhe herakhesigin hamolo a?” iluk yagatikhe.

⁸ A'nogo yagatikhemo, at hele raja a'logo a'nogo nen he ”I o. Fano o,” iluk yagatikhemo, onggwarek agaisa a'nogoat wol ha lagaikhe.

⁹ Wol ha lagaikhemo wagaikhemo re, at kain a'logo a'nogo nen he, he a'nogo mel yagatikhe: ”Nagaisa. An nen hobuk onggo wokhesigen he, omalik yi waluk lambik heilak wogoti logoino o,” iluk yagatikhemo, aiba waluk lagaikhesik eilak wogoti lagaikhe.

¹⁰ A'nogo wogoti lagaikhesik, omalik a'nogo arat alue agaikhemo, agaisa nen he, at raja Firaun a'logo a'nogo wogosi lagaikhe. Wogosi lagaikhemo re, at eak hangge kulikhi logolik mel isikhe: ”An neak yi re, ima were'ma heligi mene andi u hak, enu Musa,” iluk salhikhe.

Musa heise o Midian wagaikhe wene

¹¹ A'nogo salhikhemo, at Musa arat alue agaikhesik he, afuni at unggulenu mene yabu mondok enggin mene ning-nanghogo inoba fesukwama hilingitunem eilenggen isageluk lagaikhe. Lagaikhe hak he, ap Mesir mene nen ap Ibrani mene watunem eilenggen hasikhe.

¹² Hasikhesik, afuni era'lukwe eilenggen kwelakhasikhe re legen he, ap Mesir mene a'nogo watikhe, watikhesik warek a'nogo ial a'ma salfesikhe.

¹³ Salfuluk wagaikhesik hobuk ohealekwe re, lagaikheat. Lagaikhe hak he, ap Ibrani mene nen agailak Ibrani meneat yei watunem eilenggen isasikhesik he, at yei wati lagaikhe mene a'nogoba mel yagatikhe: ”Hat hagailak meneat he, nenahalok yei wati lagen,” iluk yagatikhe.

¹⁴ A'nogo yagatikhemo, at ap a'nogo nen he: ”Hat nit ninoe fetninarek logolik, wene ninoba figik kotik, ikhi logouwageluk sa nen menhobagaikhemo. Ap Mesir mene waten a'nogo hak an noasigiluk ikhi lagen a?” iluk yagatikhe. A'nogo yagatikhemo, at Musa ailo mondok agaikhesik endawimo nen he: ”Egi, nailo e. An hilingiti a'nogo afuni inelu agama higi,” iluk endawimo ebetikhe.

^15-16 A'nogo endawimo ebetu kwelek, at raja Firaun nen wene andi esanggo holhikhesik he: ”Nena mene oba lisimbik Musa ebe wasigin he,” iluk anggikhi lagaikhe. A'nogo meneat he, at Musa heise o Midian wagaikhesik andoma welagaikhe. A'nogo werek kwelek, o andem oba ap ekhe imam aiba Median mene enu Yitro a'logomi inebe 7 nen tagongge mene welagaukwa. Inenggi ekhe sambul he, at Musa i mogoma lagaikhesik era'lu hurek were'ma, helime Yitro a'logomi inebe 7 nen omanogo i hinatik, ineisena mene kambing, domba yonggo palek nikherek mene omanogo i noageluk hinagaisogo fagarek oba hinagaisogo figik, uogoluk wagaukwa.

¹⁷ A'nogo wagaukwa meneat he, ap wam konharek mene ekhe nen helime yenggerugwi omanogo mugisasukwa. A'nogo mugisasukwama, at Musa wagaikhesigen, leberisikhi logolik inanggo inagai noageluk hinagaisogo wogisasikhe.

¹⁸ A'nogo hilingitikhemo, inambotkwe inaiba lagaukwama, ineisena nen he: ”Hit o yogondak he, weak-weagat wagep andi nenahalok,” iluk heinok wogisasikhe.

¹⁹ Heinok wogisasikhemo, iren he: ”Ap wam konharek mene nen mu'nisugunem he, ap Mesir mene ekhe nen nit lebe'nisigik, ninanggo faget inagai hinagaisogo wogisigik, ikhe mo,” iluk yagatukwa.

²⁰ Yagatukwama, aren he, ”Ap andi ebe yogondak koma werek. Nenahalok at andi herakfuluk wagep? Ninom sumburu nouwogen he, weak-weak ayonggo lani o,” iluk yagaisasikhe.

²¹ A'nogo yagaisasikhemo ayonggo lagaukwasik wagaukwama, at Musa nen he, ”Ninom yoma logogun fanoaro,” iluk yagaisasikhe. Yagaisasikhemo inom logolik, at Yitro nen a'logo enu Zipora Musa wogetikhe.

²² Wogetikhemo, at he Zipora eak ap takhasikhe. Takhasikhemo, at Musa nen he: ”An nebe o yoma ap pok welagi, andi nen he, namlogo enu Gersom,” iluk salhikhe.

²³ Tahun hokhorogoat welagaukwasik he, at raja Mesir mene a'nogo ebe arat wa'lagaikhe. A'nogo wa'lagaikhe meneat he, afuni Israel mene, it Mesir mene nen inamingmingengge hangge ferinarek logolik enggin-fenggin inoba fikhi lagaukwa andi nen, ”Allah nineisena, telninabin o,” iluk yagatu mondok welagaukwa mene andi, inane Allah were'ma lagakhi lagaikhe.

²⁴ A'nogo lagagunem, Allah nen inane esanggo holhikhesik, Abraham inom, Ishak inom, Yakub inom, wene warisasikhe mene a'nogo endawimo ebetikhe.

²⁵ Ebetikhesik he, afuni Israel mene it Mesir mene nen inamingmingengge hangge ferinarek were'ma eilenggen isasikhesik, it inane hologo leberisagain iluk endawimo anggasikhe.