KELUARAN 17 - Allah Wene Fano Wene Hupla Inane

Helep hokho mene elema nen i wulibi wagaikhe wene

¹ A'nogo hilingiti lagaukwasik, hobuk it afuni Israel mene inebe mondogat at nineisena Tuhan nen he, ”Yi'nogo hilingi'no,” iluk yagaisikhi lagaikhe hagat, o leimo afuni le'ma enu Sin leimo andoma herakfuluk he, o ekhema nen ekhema wagik, wagaukwa. Inenggi ekhe sambul he, o su mene o Rafidim andoma wutukwa, meneat he o andoma i nunggu mene mondogat lek welagaikhe.

² A'nogo hilingik welagaikhemo iren he, inane mul-mul Musa mel yagatukwa: ”Nit ninagai noageluk i ekhe wo'nisan o,” iluk yagatukwama, at Musa nen he, ”Hit he, Tuhan a'mage werek a? Lega, iluk, an noba wene palogo nenahalok lalnafi lagep,” iluk yagaisasikhe.

³ A'nogo yagaisasikhe meneat he, it afuni omanogo i mondok nele hokhorogo agaikhemo re, Musa oba inane mul-mul fikhi logolik, mel yagatukwa: ”Nit ninebe inom, ninagainafuri inom, ninanggo inom, i nele nen o yoma wa'lasuageluk, o Mesir en wo'ninarek wagen andi nenahalok,” iluk yagatukwa.

⁴ A'nogo yagatukwama, at Musa ane hokhorogo nineisena Tuhan mel yagatikhe: ”Yethan. Neisena. Iren an nebe helep oba mondok noasuogeluk hilingiri'lagwi yi, an nen ninggi'nogo hilingisik,” iluk yagatikhe.

⁵ A'nogo yagatikhemo, at nineisena Tuhan nen Musa mel yagatikhe: ”Haren it afuni Israel mene inogogwi ekhe woginarek he, it Israel mene ekhe hobugetfisaluk he, attagat laga logoino o. A'nogo laga logolik he, harige tomuk o Mesir en i Nil waten mene a'nogo henggim waluk lano o.

⁶ A'nogo lagunem he, an nebe hit hinelokhoma tom Sinai era'lu helep hokho mene andiba mendek logogin o. Were'ma lambik, helep andi wa'no o. Watunem i wulibi wagunem he, afuni andi i elok noago,” iluk yagatikhemo, at Musa nen it afuni Israel mene inogogwi omanogo ineilenggen werek kwelek a'nogo watikhe.

⁷ A'nogo hilingitukwa andi re, it afuni Israel mene nen, nineisena Tuhan Allah ninom welago a? Lega, iluk obabut paluogeluk hilingitukwa andi nen o andoma enu ekhe re, ”Masa,” iluk salhik, nen wene palogo lalhukwa andi nen, enu, ”Meriba,” salhik, isukwa.

Afuni Amelek mene inom weim yafukwa wene

⁸ It afuni Israel mene omanogo o Rafidim andoma were'ma, afuni Amelek mene inoasuogeluk wagaukwa.

⁹ A'nogo wagaukwama, at Musa nen Yosua mel yagatikhe: ”Ap Israel mene afuni Amelek mene inom weim yabuagen ekhe wendeberogo fisan o. A'nogo fisegen halok an ohealek nineisena Tuhan nen sige tomuk waluk lano, iluk yaganete mene a'nogo waluk tom oba lagambik fisogo logogin o,” iluk yagatikhe.

¹⁰ A'nogo yagatikhemo, at Yosua Musa nen, ”Yi'nogo hilingi'no,” iluk yagatikhe hagat hilingitikhesik, at Musa inom, Harun inom, Hut inom, tom oba logouwogeluk huli punu ebeba lagagu kwelek, at Yosua afuni Amelek mene inom weim yabuogeluk lagaikhe.

¹¹ A'nogo lagaikhesik, weim a'nogo yafu kwelek, at Musa enggi pogoroba higit liabek werek kwelek he, afuni Israel mene inomame aga lagaukwa meneat he, enggi pelakfei wagunem he, afuni Amelek mene inomame aga lagaukwa.

¹² At Musa enggi senap agaikhemo pelakfei wagaikhe andi nen he, Harun Hut emberegen, at Musa ebe higit hurek logouwageluk helep ekhe wanhukwasik talogo fesukwa. A'nogo fesukwasik, at Musa enggi pogoroba liabek mondok werek kwelek o mo korok uageluk, at Harun nen Musa enggi fenakwe legeisogo, nen, at Hut en enggi fenakwe legeisogo, fisogo welagaukwa.

¹³ A'nogo werek kwelek he, afuni Israel mene nen Amelek mene mabenetfisasukwa andi.

¹⁴ A'nogo mabenet fisasukwama, At Tuhan nen Musa mel yagatikhe: ”It afuni Israel mene inomame agaikha mene andi inendawimo eberek mondok logouwagen he, lisu palogo fein o. Nen, An nen afuni Amelek mene mondok leget fisagain o, iluk Allah nen ikhe, iluk Yosua yaga'no o,” iluk yagatikhe.

¹⁵ A'nogo yagatikhemo, at Musa nen yi mene ti mene Allah faget warogo loleti logogun oba mezbah ekhe wutikhesik enu mel salhikhe: ”An namboksu bendera liabek he, Neisena Tuhan hebe aro,” iluk salhikhe.

¹⁶ A'nogo salhikhesik, ekhe mel isikhe: ”Nineisena Tuhan nen afuni Amelek mene inom weim yafu mondok logogin iluk, at amboksu bendera andi ponggweat liakfuluk fisogo logoni o,” iluk isikhe.