KEJADIAN 4 - Allah Wene Fano Wene Hupla Inane

Ap Kain agot Habel emberegen hilingitukwa wene

¹ Hobuk, at Adam agwe Hawa emberek nogo isukwama, he a'nogo omalik a'ma agaikhesik he, eak ap takhasikhe. A'nogo takhasikhesik, aren he, ”Neisena, Tuhan nen lebetniikhemo neak ap takhigi,” iluk enu Kain, salhikhe.

² A'nogo salhikhesik he, hobuk amlogo enu Habel takhasikheat. A'nogo taginafikhemo, at Habel he wam domba eise logolik halhu mene welagaikhe. A'nogo meneat he, at Kain he, yabu eise logolik wanhu mene welagaikhe.

³ A'nogo hilingiti logolik welagaukwasigen, at Kain yi mene ti mene yatikhe mene enggen palogo wanhikhesik he, fena Tuhan faget fisasikhe.

⁴ A'nogo fisasikhemo, at Habel ogo re, anggo domba mene ekhe eak attak tatikhe mene wanhikhesik he, warogo nen senggelogo asei fano mene re Allah faget fisasikhe. A'nogo fisasikhemo, Allah agaiyek Habel oba fesikhe.

⁵ Meneat he, at Kain nen fesikhe mene re herakfisasikhe. A'nogo herakfisasikhemo, at Kain a'mage hokhorogo lagasikhesik, elokhe age lagasikhe.

⁶ A'nogo hilingitikhemo, Tuhan nen Kain oba mel yagatikhe, ”Nenahalok, hat ha'mage a'nogo lagegendik, helokhe age hokho lagegen?

⁷ Hat fano hilingiten halok, hendawimo mondok hagaiyek hagain aro, mene re weak hilingiten halok, weak hilingisigin mene andi hendawimo mondok peterogo kwimbik omame asigeluk werek andi re, haren elok sebelogo leget fisagain aro,” iluk yagatikhe.

⁸ A'nogo yagatikhemo, at Kain nen agot Habel mel yagatikhe, ”Nemberek yabumo louwogen eme o,” iluk yagatikhesik, arat yabumo lagaukwasik he, Kain agot Habel warogo sebelfesikhesik, ebe pinggi watikhe.

⁹ A'nogo watikhemo, Tuhan nen he Kain mel yagatikhe, ”Hagot Habel ebe koma werek?” iluk yagatikhe. A'nogo yagatikhemo aren he, ”An nonggoro. An nen nagot fisogo welagingge halok?” iluk yagatikhe.

¹⁰ A'nogo yagatikhemo At Tuhan nen he, ”Hat hobabut mondok weak inailo mene hilingiten andi nenahalok? Hat hagot amep kweangma nen, unggulmo fouwageluk ane hokhorogo nenu hombuk pali'logo andi lega?

¹¹ Hat henggi nen hagot watunem amep kweisalogo kweangma pikhe mene nen kweang ya ninggemo re, hat kweang yaba logogin lego, iluk homan hobagakhi lagi. Kweang herarik o yatma andomaat lakhobagagin o.

¹² Lakhobagaumo hat a'nogo pugulogo kweang herarik lagunem, kweang o ekhema nen hat henggi werek hilinghobagakhi logogin mondok lego. Yabu waganogo awi yatunem fulelogo ebe aga logogin legaro,” iluk homan fesikhe.

¹³ Homan a'nogo fesikhemo, at Kain nen he, mel isikhe: ”An a'nogo nikhi logou mondok elo'lek mene, homan enggin hokho mene a'nogo nobagegen andi mondok elo'lego.

¹⁴ An Hat helokhoma yoma nen o yatmaat laknobagagin andi re, an nanggweang yoma legen a, heise o yi awi ti awi lagunem, afuni ekhe ninom ambi a'luk nebe noasugun andi mondok lego, neisena,” iluk yagatikhe.

¹⁵ A'nogo yagatikhe meneat he, Tuhan Allah nen he, mel yagatikhe: ”A'nogo hoasugun lego. Meneat he, hat hoasugun halok, hunggulmo re, An nen it ap inebe 7 nen inomat inoasigin aro,” iluk yagatikhesik, afuni ekhe inom ambi asimbik, at Kain ebe wasinogo iluk inendawinggen wenggelogo Kain ebeba silo fesikhe.

¹⁶ A'nogo hilingitikhemo, at Kain a'nogo Tuhan Allah elokhoma nen lagaikhesik, mo lagai wagarek higithogo o Eden yabu yagoma abel elikwe kweang ekhe enu Nod agarek oba andoma lagaikhesik welagaikhe.

Ap Kain en tagongge mene inebe wialarik lagaukwa wene

¹⁷ Kain agwe emberek omalik ap ekhe tatukwasik, enu Henokh salhukwa. A'nogo salhukwasik, at Kain o kota ekhema sili pumbukhogo halogo kwisikhesik he, o kota andi enu at amlogo enu meneat salhikhe.

¹⁸ At Henokh en ap Irad tatik. Nen, Irad en Mehuyael tatik. Mehuyael en Metusael tatik. Nen, Metusael en Lamekh tatik, taginabik lagaukwa.

¹⁹ Lamekh andi agagwi inebe pire, he ekhe enu re, Ada. Nen, he ekhe enu re, Zila.

²⁰ At he Ada nen Yapal tatikhe. At Yabal andi nen tagoma mene nen inawi su mene wuthigik logolik, wam kulhu welagaukwa.

²¹ Nen, at Yabal agot enu re, Yubal. Andi nen tagoma mene nen, gitar inom, yi pinggong ti pinggong inom watu inelu mondok welagaikharek.

²² Nen, at he Zila nen eak enu Tubal-Kain tatikhe. At Tubal-Kain nen tago mene, yi mene ti mene ebe tembaga mene inom, posiemanggen mene inom, hilingitu inelu mondok welagaikharek. At Tubal-Kain agot hele mene enu re, Naama.

²³ Inebe a'nogo logolik, at Lamekh en agagwi pire aremnogo mel yagaisasikhe: ”Attak Zila hemberek an wene igin yi hinesanggo holini! Ap alage mene ekhe nen an noate andi nen, an nen at ebe pinggi wati o.

²⁴ At Kain ebe wata halok unggulmo inebe 7 nen inoasugun halok he, an noata halok nunggulmo inebe 77 nen inoasugun aro,” iluk yagaisasikhe.

Adam amlogo hobuk takhasikhe wene

²⁵ Nen, hobuk Adam agwe Hawa emberek omalik ap ekhe takhasukwa. A'nogo takhasukwasik, at Hawa nen he, mel isikhe: ”Neak Habel oe Kain nen wate a'nogo obali'mo re, Allah nen neak abat wo'nete,” iluk isikhesik he, enu Set salhikhe.

²⁶ Nen, at Set amlogo ap takhasikhesik, enu Enos salhikhe. Andem sambul he, afuni nen nineisena Tuhan fogerati logolik enu hombuk palhi logogun mene huli andem oba nen yanggulhukwa.