IMAMAT 8 - Allah Wene Fano Wene Hupla Inane

Musa nen Harun inom at againafuri inom inunggul oba amusu warogo menfisasikhe wene

^1-2 Tuhan nen Musa yagati logolik, ”Harun inom at againafuri inom wolisaluk he, su it imam en labetarek mene inom, ap menfisikhi logolik amusu watfisagarek mene inom, inaweak leget fisoageluk sapi ai mene ket kotorek mene ekhe inom, domba ai mene pire inom, roti fiterek lek meneba hilingik mene si ugu misik oba kwalegengge inom, waluk wesuakhogo yagaisano.

³ Nen, it afuni Israel mene ogo An nawi sabu sale'ma solombonma omanogo kabogesi wesuakhogo yagaisanoat,” iluk yagatikhe.

⁴ A'nogo yagatikhemo Musa nen At Tuhan nen yi'nogo hilingi'no ti'nogo hilingi'no iluk yagatikhe mene a'nogo higithogo nek hilingitikhe. A'nogo yagaisasikhemo it afuni Israel inap omanogo mondogat kabogesi wagaukwama,

⁵ at Musa nen ikhi logolik he, ”Yogondak an nen hilingisigin mene yi re Tuhan nen yi'nogo hilingi'no ti'nogo hilingi'no iluk melalnobagaikhe mene hilingisigin,” iluk yagaisasikhe.

⁶ A'nogo yagaisasikhesik aren he, at Harun inom at againafuri inom elokhoma menlasi wagaukwama iba inebene horogo tegelogo fisasikhe.

⁷ A'nogo tegelogo fisasikhesik, at Musa nen su it ap imam en labetararek mene a'nogo at Harun oba ikfikhi logolik, su ebeba inom, ban obakheba pugetu mene inom, su jubah pisarek mene inom labet figik isikhe. Andi nen ekhe su efod eil amu-amu kain eil sakhorek meneba obakhe kwe puget fesikhe.

⁸ A'nogo puget fesikhesik, at Harun oba amik sebelek mene puget fesikhesik, amik sebelek mene a'nogoba re Urim inom Tumim inom, aremnogo kwelakfesikhe.

⁹ Andem kwelakfesikhesik at Harun ungguloba su kut mene it ap imam en labeti lagaukwa mene enu serban andi fouget fesikhesik serban andiba re Harun ebe abirenggere Tuhan angge aga iluk emas mene to'morogo elha wa'ma ikfigik isikhe. Mondogat andi re Tuhan nen yi'nogo hilingi'no ti'nogo hilingi'no iluk yagatikhe mene a'nogo higithogo hilingitukwa andi.

¹⁰ A'nogo mondogat hilingitukwasik, at Musa nen amusu ap menfisikhi logolik watfisikhi lagaukwa mene a'nogo waganogo re Awi Sabu sale'ma omanogo inom, o sabu andi elonggolokwe hilingitarek mene omanogoba inom kwetet higik warik lagaikhe. A'nogo hilingitikhe andiba re yi mene ti mene andoma mondogat he Tuhan faget tegelek logouwageluk hilingfesikhe.

¹¹ Amusu a'nogo mene endebengge ekhe re mezbah a'nogo bene inom, mezbah andi erokwe inom, enggi 7 nen oba kwetet hasikhe. A'nogo hilingitikhe andiba re yi mene ti mene andoma mondogat he Tuhan obaget horek logouwageluk hilingfesikhe.

¹² Andi mene mondogat hilingfuluk at Musa nen amusu afuni menfisikhi logolik watfisikhi lagaukwa mene a'nogo waganogo Harun ungguloba warogo menfesikhe.

¹³ A'nogo mondogat hilingitikhesik aren it Harun againafuri omanogo elokhoma menlasi wesuageluk yagaisasikhemo, Tuhan nen a'nogo hilingi'no iluk yagatikhe mene a'nogo higithogo su inebema mene labet fisigik, ban inobakhe kwe puget fisigik, nen inunggul kwe su kut mene enu serban a'nogo puget fisigik isikhe.

¹⁴ Andi mondogat hilingfisasikhesik, at Musa nen it inaweak lek hilingisogo fisoageluk wam sapi ai mene misik ket kotorek mene ekhe wanhikhesik at Harun inom, againafuri inom wam a'nogo unggul oba inenggi sebel fouwageluk yagaisasikhe.

¹⁵ A'nogo yagaisasikhesik, at Musa nen wam a'nogo warogo amep fena wanhikhesik he, amep a'nogo mezbah andimuk nganok se'ma unggut fena-fena omanogo mezbah andi re Allah faget tegelek mene logouwageluk enggi tum oba yugulogo watfesikhe. Nen, mep fenakwe omanogo re mezbah a'nogo erokwe omanogo kweisal isasikhe. Obalik warogo nolhu mene faget andi re mondok horek logouwagiluk a'nogo hilingiti lagaukwa.

¹⁶ Wam sapi ket watukwa a'nogo menere at Musa nen asei abirengge elonggomanggeba huli'lipsek mene inom, anggerang asei inom, asimogol fano mene inom andoma mondogat he mezbah amboloba nolhukwa.

¹⁷ Oba nen he sapi a'nogo eino inom, agap inom, elonggomangge mondogat inom, alabut inom, wam sapi andi abirenggeba nen he, we fena amumu enogo fesukwa mene omanogo nek fuluk he, mondogat Tuhan nen wene melalek yagaisasikhe higithogo o Tuhan Awi Sabu salek oba omanogo nen endakwe fikhit nolhukwa.

¹⁸ A'nogo hilingitukwasik, at Musa nen domba ai mene inaweak faget warogo nolhu mene iluk a'nogo wanhikhemo, at Harun inom at againafuri inom inenggi wam a'nogo unggul oba sebel fesukwa.

¹⁹ A'nogo hilingitukwama at Musa nen domba a'nogo warogo amep he mezbah a'nogo unggut 4 en omanogo higithogo ebene kweisal fesikhe.

^20-21 Kweisalisasikhesik, wam a'nogo senggelogo re elonggomangge inom, eisok inom he iba sobalhukwa. Nen, unggul inom, asei inom he, domba ai mene a'nogo eino tindelek mene inom he, at Tuhan nen wene yi'nogo hilingi'no iluk yagaisasikhe higithogo it inaweak faget warogo nolhukwa. Nunggu mene warogo nolhukwa andi amben nen he Tuhan endawimo agaiyek agaikhe.

²² Andi mondogat hilingitukwasik at Musa nen domba misik ekhe it imam menfisikhi logolik wata mene a'nogo wanhukwasik at Harun inom at againafuri inom, wam a'nogo unggul oba inenggi sebeluageluk yagaisasikhe.

²³ A'nogo sebelfesukwama, at Musa nen wam a'nogo warogo amep endephogo wanhikhesik he. at Harun esanggo pikhitkwe meneba inom, enggi fuap pikhitkwe meneba inom, eisok fuap pikhitkwe meneba inom yugul fesikhe.

²⁴ Andi nen at Musa nen Harun againafuri omanogo menlasi we'ni iluk yagaisasikhesik he, wam amep a'nogo endephogo ekhe waganogo it inesanggo pikhitkwe meneba inom, inenggi fuap pikhitkwe meneba inom, ineisok fuap pikhitkwe meneba inom yugul fisasikhe. Nen wam amep fena omanogo re mezbah unggut 4 en omanogo bene kweisal hilik lagaikhe.

²⁵ At Musa nen domba a'nogo asei inom, sei ageroma andem mene inom, anggerang sei huli'lipsek mene omanogo inom, asimogol fano mene inom, eisok pikhitkwe mene inom, amuanggo sei inom,

²⁶ si ugu meneba roti fiterek lek mene Tuhan obaget iluk hilingisogo fesukwa mene omanogo at Musa nen roti amusuba ambumhogo hilingik mene inom, misik ekhe seramhogo hilingik mene inom wanhikhesik he, roti omanogo wam domba asei inom, eisok pikhitkwe mene inom amboloba fesikhe.

²⁷ A'nogo fesikhesik abirengge a'nogo at Harun inom at amlogomi inom inenggiba fesikhemo iren inenggi tum warogo Tuhan obaget fesukwa.

²⁸ A'nogo mondogat fesukwasik at Musa nen nunggungge mene a'nogo it inenggimo nen waganogo wanhikhesik mezbah amboloba afuni inaweak faget warogo nolhu mene iluk inom, it imam menfisikhi logolik nolhu mene faget iluk inom nolhikhe. Nunggu mene andi a'nogo nolhikhemo amben nen he Tuhan endawimo agaiyek hasikhe.

²⁹ At Musa nen it menfisugu sambul andi re at onggwarek faget Tuhan warogo nolesuhak he wam domba a'nogo elonggo palek wanhikhesik he, aren enggi tum oba warogo fuluk Tuhan obaget wogetikhe. Abirengge andi re at Tuhan nen Musa oba yi'nogo hilingi'no iluk yagatikhe mene higithogo hilingitikhe.

³⁰ A'nogo mondogat hilingitikhesik, at Harun inom, amlogomi inom, it inasu inom omanogo Tuhan obaget tegelek mene logouwageluk he, at Musa nen it menfisageluk logolik kabogetukwasik amusu fena a'nogo inom, amep fena mezbah amboloba welagaikhe mene a'nogo inom wanhikhesik he, at Harun ebeba inom, at againafuri inebene inom, it inasubene inom kweterisilik lagaikhe.

³¹ A'nogo hilingfisasikhesik he, at Musa nen Harun inom at againafuri inom yagaisikhi logolik, ”Tuhan nen ikhi logolik he hit menhinobagagin sambul noageluk he roti si ugu meneba kwelabek mene werek andi nano ikhe. A'nogo ikhenggere hiren nunggu mene andi Tuhan Awi Sabu sale'ma kwe kwi waguba solombonma andemen isa'ni.

³² Nen, roti tindelasigin mene inom, eino tindelasigin mene inom he mondok felelenghogo endu nolugun.

³³ Linggene hinenggi sabiren andi re Tuhan obaget o sabu sale'ma a'nogo herakfuluk mondok logombik hit menhinafi logolik hilingisugun sambul andi arat hilingisimbik halogen wulibugun.

³⁴ Tuhan nen yaganisikhi logolik he, hiren yogondak hilingito mene andi re hobuk ogo a'nogo hilingiti logogun ikhe. Nen, a'nogo hilingisugun andiba re hinaweak lek hilingisogo hinobagagin.

³⁵ At Tuhan nen yaganeti logolik he, hit linggene hinenggi 7 nen oba andem he hup hundik lingge hundik hit o sabu sale'ma solombon oba hilingiti'lek andem At Tuhan nen yagahisugu mene hilingiti logolik logogun. Nen, hiren a'nogo halok he hinebe mondok wa'lasugun o, iluk yaganete,” iluk yagaisasikhe.

³⁶ A'nogo yagaisasikhemo at Harun inom at againafuri inomen a'nogo hilingiti logogun iluk, Tuhan nen Musa bene yagatikhe mene a'nogo higithogo hilingitukwa.