IMAMAT 6 - Allah Wene Fano Wene Hupla Inane

¹ Tuhan nen wene melalek ekhe yi Musa oba fesikhe.

^2-3 ”Ap misik ekhe nen agaila'lak inangge oba fogoin oba nen inonggwarek nekhengge wogisagain lek halok inom, athe ane nen lebelogo hinakhagain halok inom, nen agaila'lak inangge longgo umo aren herasigin oba nen hombuk palogo labeligin halok inom, aren Tuhan eilhanem weak hilingisigin andi nen he, at aweak faget warogo fei waga logogin.

^4-5 Fei waga logolik he, ap weak hilingisigin mene a'nogo nen he agaila'lak inangge labelhigik helagain mene omanogo abirengge obali'mo onggo fagain. Nen, at weak hilingitunem herakfuluk halok he, at onggwarek agun a'nogoba onggo wogeti logolik, aren dua puluh persen ekhe inom to'morogo wogosigin.

⁶ At hilingitu mene faget obali'mo iluk warogo fikhi logolik halok he, domba ogo kambing ogo ai mene oba nen agambut palek lek mene onggo Tuhan Awi Sabu sale'ma werek mene higithogo nek fei waga logogun.

⁷ It imam omanogo nen he ap a'nogo aweak faget warogo nolhunem Tuhan nen ap a'nogo aweak legaphogo fikhi logogin,” iluk yagatikhe.

Warogo nolhi logogun mene faget isikhe wene

^8-9 Ekhe Tuhan nen Musa yagati logolik, ”Hun Harun inom at amlogomi inomen wam ebe abirengge warogo nolhi logolik halok, it imam omanogo nen mezbah amboloba fuluk, endu fagaisogo kwelakfuluk he hup inukhogo omanogo herak fugunem logogin mene faget wene melalek yi yagaisan.

¹⁰ Nen, warogo nolhu mene a'nogo mondogat wul agunem he, it imam en su celana horok mene inom su jubah mondok fano mene kain lenan oba selebensek mene inom laberaluk he, wam amusu wul oba pugunem yalelogo re mezbah wurik mene a'nogo erokwe andoma fikhi logogun.

¹¹ A'nogo hilingfuluk at a'nogo asu amu mene laberaluk wul a'nogo hambokhogo waluk he, o sabu wuri'mo nen endakwe fikhit obalik enegenggere'ma andoma fei wilifi logogin.

^12-13 Endu mezbah amboloba andi re nagul agi'lek amulok lagagu mondok logouwagen he, hubet hundik-handik it imam omanogo nen he mezbah a'nogo amboloba andoma nolfuluk inaweak faget warogo nolugun iluk wam lambulogo fisoageluk a'nogo asei omanogo inom nolhi logogun, a'nogo hilingitunem he Tuhan endawimo agaiyeget fikhi logogun,” iluk yagaisoageluk, yagatikhe.

Amep werek lek mene nolhi logogun mene faget isikhe wene

¹⁴ Tuhan obaget amep werek lek mene wa'luk nolhi logogun mene faget awene melalek he yi: ”Nen, amep legengge mene andi re it Harun ambisangma mene omanogo nen waluk mezbah a'nogo era'lu waga logogun.

¹⁵ Waluk we'luk amep werek lek mene a'nogo abirengge Tuhan obaget fogo iluk enegenggegore, it Harun ambisangma mene omanogo nen tepung inenggi misigen yinggilogo wanu hak amusu inom kemenyan inom waluk mezbah a'nogoba nolhunem, amep lek mene nolesugun mene omanogo amben en Tuhan endawimo agaiyeget fikhi logogin.

^16-17 Nen, tepung fena abirengge andi re roti fiterek lek mene werak fuluk, it imam omanogo nen o Tuhan Awi Sabu sale'ma solombonma obalik Mondok Hore'ma andoma nen ninggi logogun. Amep werek lek mene nunggu mene andi re inaweak legabesuageluk warogo fugu mene inom, hilingitu onggo obali'mo fugu mene inom, hilingik hakhogo hilingi'more mondok horek mene logogin. Nen, andi re at Tuhan nen it imam ninggi logogun mene iluk wogisasikhe mene re ebe andi.

¹⁸ Amep werek lek mene ninggi logogun mene iluk fugu mene andi re, mondok hore'ma omame mondok hokho logogin andi nen he, ap ekhe nen nunggu mene andi fakhikhe halok inonggwaregen alomat fakhikhi logogun. Nunggu mene andi Tuhan obaget fugu meneba nen he it Harun ambisangma mene nen ninggi logogun iluk were'ma re, mondok-mondok andoma logolik it ap Harun ambisangma mene nek roti andoma helaluk ninggi logogun,” iluk yagatikhe.

¹⁹ Tuhan nen Musa wene melalek yi oba fikhi logolik,

²⁰ ”It Harun ambisangma mene yabu imam mene hilingiti logogun iluk inunggul sebelogo menfisikhi logolik, warogo nolhi logogun mene faget iluk yagahesigin. Linggene inebe menfisugu sambul andi re, aren tepung gandum meneba sagalek mene satu kilogram Tuhan obaget fikhi logogin. Nen fenare hubet faget fuluk, fena hu'mokwe faget fei waga logogin.

²¹ Obaget amep werek lek mene fei wesugun mene andi amben fano nen Tuhan endawimo agaiyek hoageluk tepung a'nogo minyak inom mulelogo hilingfuluk kerogo weragaisogo kut-kut hilingfuluk fei waga logogun.

²² Hundik-handik inetokhogo at Harun ambisangma mene ap imam inoe Imam Agung logouwageluk menfogoin mene a'nogo nen Tuhan obaget iluk fei wesugun andi re abirengge wogeti logogun.

²³ Amep werek lek mene weragaisogo noli waga logogun mene andi re endebengge iluk ogo ekhe it ninggi'legengge mondogat it imam en nolhi logogun,” iluk isikhe.

Afuni inaweak legasuageluk warogo nolhi logogun mene iluk yagaisasikhe wene.

^24-25 Tuhan nen Musa mimingiti logolik, ”It Harun inom at amlogomi inomen wam afuni inaweak legaphogo fisoageluk warogo nolhi logolik he yi'nogo hilingiti logogun iluk yagaisa lan. Wam afuni inaweak legaphogo fisoageluk andi re afuni inaweak faget iluk watunem Tuhan endawimo agaiyet fagarek oba mezbah abel utara fikhit omanogo nen wati logogun. A'nogo watunem iren warogo fugu mene andi re mondogat horek logogin.

²⁶ Nen, at imam en warogo fei kugu mene andi re obalik tegele'ma o Sabumo ohulumo kwi laguba andoma nen ninggi logogin.

²⁷ Wam andi re mondok horek hilingi'mo ap ekhe asuba amep kweterogo lagu halok he, su andi obalik amu tegele'ma nen sobalhi logogun. Nen ap ogo athe we amungge mene iluk ogo, wam andi fakhugu halok onggwaregen alomat fakhikhi logogin.

²⁸ Waruk kweang mene hilingik meneba wam andi isatu mene ogore halokhogo hugisikhi logogun. Nen, waruk isatu mene andi ogore helep posiemanggen meneba hilingik mene halok he agap seleng isaluk iba sobalhi logogun.

²⁹ It imam ineisok erokwe mene halok he warogo fei wagu mene mondok hi-horek mene andi ninggi logogun.

³⁰ Wam inaweak legaphogo iluk hilingitu sambul faget warogo fei wagu mene andi it ninggi'legengge nol fuluk abirengge amep fena re Senggelek Hore'ma andoma waluk kugu mene faget fikhi logogun,” iluk yagatikhe.