IMAMAT 5 - Allah Wene Fano Wene Hupla Inane

Ki sambul afuni inaweak lek hilingisogo fouwageluk warogo nolhi logogun, iluk yagaisasikhe wene.

¹ Ekhe ikhi logolik, ”Wam inaweak lek hilingisogo fouwageluk wogosi waga logolik he, ap ekhe o wene heirogo tegetarek oba andoma nen weinamhogo hikhe mene faget inom, esanggo holhe mene faget inom, fagesin iluk yagatunemen, aren fakhogo igi'lek labelhe halok he, at fagesigin lek andi onggo re onggwaregen ambisangma saburilik laga logogin.

² Ap ekhe nen wenggelek legengge nen wesa mene ekhe paik fili hea, athe wam fili hea, ekhe senhikhe halok he ap a'nogo ebe alomarogo fakhalugen at hobuk endawimo wenggelogo waga halok.

³ Ap ekhe nen wenggelek legengge nen, afuni inoba mene enggi senhalugen, hobuk endawimo wenggelogo wagunem an weak hilingiti higi iluk eberogo wagu halok.

⁴ Ap ekhe nen ero tukhumsek legengge nen yi'nogo hilingisugun iluk ane hombuk palfulugen ane hombuk paligin mene a'nogo weak hilingiti iluk, wenggelasi wagu halok.

⁵ Yi wene ti wene andi mondogat faget he, ap weak hilingitu agun a'nogo nen aweak fageti logogin.

⁶ Nen, at aweak hilingisigin mene a'nogo leget fouwageluk onggo re aren wam domba ogo, kambing ogo, he mene halok misik ekhe waluk wagunem, it ap imam omanogo nen ap a'nogo aweak lek hilingisogo fouwageluk wam a'nogo warogo Tuhan wogeti logogun.

⁷ Oba nen he, ap weak hilingisigin mene a'nogo nen aweak leget fouwageluk anggo domba inom, kambing inom, mondogat lek halok he, aren sue muluk agun agwe wuthogo inom, nen sue abiang hak mene eil kuluk mene waluk we'luk he, misik ekhe re aweak leget fugu mene faget, nen misik ekhere warogo nolhuba andoma nolhu mene faget, waluk waga logogun.

⁸ Sue omanogo waluk it imam inambit wagunem, imam en sue omanogo ap a'nogo aweak leget fouwageluk mene tak warogo fikhi logogun. Sue ebe alonggop teget higi'lek kwanirogo wati logogun.

⁹ Alonggop kwanirogo watfuluk sue a'nogo amep waganogo re mezbah esanggokwe kweterisikhi logogun oba nen he, fenare ap a'nogo aweak lek hilingisogo fouwageluk mezbah a'nogo eisok erokwe kweisal isikhi logogin.

¹⁰ Andi mondogat hilingfuluk he, wene melalek yi'nogo hilingi'no ti'nogo hilingi'no iluk werek mene higithogo re, sue pirenek mene a'nogo imam en warogo noletunem ap a'nogo aweak Tuhan nen lek hilingisogo fikhi logogin.

¹¹ Nen, ap weak hilingitu mene andi nen he, sue muluk inom, sue abiang inom aremnogo at aweak lek hilingisogo fouwageluk fougetu mene eilmo lek agu halok he, aren tepung satu kilogram waluk waga logogin. Oba nen he fei wesigin mene andi re amep werek lek mene noluageluk fei wesigin lek halok he, andi re at aweak legabesuageluk hilingi'mo re tepung andi re zaitun amusu pelabek legengge kemenyan inom ambolebene tamulik legengge fei waga logogin.

¹² Tepung a'nogo waluk we'luk imam were'ma wagunem, it imam omanogo nen tepung aremnogoba inenggi agut oba misigam yinggilogo wanu hak waluk, sue abirengge Tuhan obaget nol fouwageluk enegenggerogo waluk tepung nunggu mene aremnogo nolugun mene iluk mezbah amboloba nolhi logogun. Afuni inaweak lek hilingisogo fisoageluk halok he a'nogo hilingiti logogun andi.

¹³ Ap a'nogo aweak faget Tuhan nen lek hilingisogo fouwageluk he, it imam en warogo nolhi logogun. Oba nen he tepung fena tindel agu mene omanogo re gandum amep lek mene iluk nolhi logolik hilingitarek hakhogo it imam mene inobaget fikhi logogun,” iluk yagatikhe.

Tuhan obaget fogoin ilugen taganet fuluk obali'mo hilingiti logogun mene faget iluk yagaisasikhe wene

¹⁴ Tuhan nen he wene melalek ekhe yi Musa oba fesikhe,

¹⁵ ”Nen, ap misik ekhe nen wenggelek legengge nen Tuhan obaget palfigi'lek hundik-handik fikhi logogin ilugen, figi'legengge hilingitu halok he ap andi nen fei wesigin lek mene andi higithogo fouwageluk obali'mo waluk nolesi wesigin fano. Nolesi wesigin mene andi re domba ogo kambing ogo ai mene halok misiktek higik, agap oba agambut palek lek mene halok o Tuhan Awi Sabu sale'ma onggo werek higithogo fuluk fei waga logogin.

¹⁶ Ap a'nogo nen attak fei waga lek mene a'nogo faget onggo obali'mo fikhi logolik he, 20 persen ekhe inom mangorogo fugunogo. Fuluk aren it imam omanogo wogisamo, iren ap a'nogo aweak lek hilingisogo fouwageluk wam a'nogo warogo nolumo, Tuhan nen ap a'nogo aweak lek hilingisogo fagain.

¹⁷ At Tuhan nen ikhi logolik wene yi'nogo hilingi'no ti'nogo hilingi'no iluk isikhe mene a'nogo misik ekhe ap misik ekhe nen wenggelek legengge ferekhogo sagalfugu halok he, aren hilingisigin mene andi onggo hikhi logogin enek.

¹⁸ Nen hilingitu mene onggo iluk obali'mo fei waga logolik he, wam domba ogo, kambing ogo, ai meneba nen agap oba agambut palek lek mene halok o Tuhan Awi Sabu sale'ma onggo werek higithogo mene fei waga logogun. Nen, it imam omanogo nen he wam a'nogo warogo ap a'nogo aweak faget nolhunem he, at aweak Tuhan nen lek hilingisogo fikhi logogin.

¹⁹ Aren Tuhan eilhanem weak hilingitu mene a'nogo obali'more a'nogo hilingiti logogin,” iluk yagatikhe.