IMAMAT 4 - Allah Wene Fano Wene Hupla Inane

Afuni inaweak inendawimo wenggelek le'ma nen hilingfuluk warogo noleti logogun mene faget isikhe wene.

^1-2 At Tuhan nen Musa mimingiti logolik, ”It inunggulenu Israel mene ap sa nen wenggelek le'ma nen Tuhan nen yi'nogo hilingi'no ti'nogo hilingi'no ikhe mene a'nogo sagalogo fuluk weak hilingitu halok, wene melalek yi'nogo hilingiti logogun iluk hane menfei lan o.

³ Ap weak hilingitu mene andi re Imam Agung inoe a'nogo weak hilingitunem it afuni Israel mene inom at ombo'ne weak hilingitu halok, Tuhan nen aweak legaphogo fouwageluk aren wam sapi ai mene ket kotorek mene agap palek lek mene misik warogo Tuhan obaget fikhi logogin.

⁴ Sapi a'nogo waluk we'luk Tuhan Awi Sabu sale'ma solombonma omanogo fei wagunem, Imam Agung a'nogo nen enggi unggulmo sebel fuluk o sabu wuri'mo lelunggulmo aremnogo nen wati logogin.

⁵ Watfuluk amep fena fikhit he o Sabu a'nogo elonggoma waluk kwikhi logogin.

⁶ Waluk kuluk he, at enggi tum mep a'nogoba yugul haluk mep a'nogo o senggelek obalik Mondok Hore'ma a'nogo su hulirogo kologo pelabek mene a'nogo elokhe fikhit andoma enggi 7 nen oba kweterisikhi logogin.

⁷ Mep a'nogo nen fena fikhit he o Sabu elonggoma nen amben fano mene enu duba noli kuguba obalik mezbah a'nogo andimuk nganoksek mene ebene watfuluk, fena abirengge re mezbah warogo nolhu men o Sabu elokhoma werek mene a'nogo eisok erokwe andoma kweisal isikhi logogin.

^8-9 It imam en sapi ai mene asei abirengge wanhi logogun mene re yi: asei elonggomangge huli'lipsek mene inom, amuanggo sei inom, asimogol mondok fano mene inom, wanhi logogun.

¹⁰ Abirengge andi re lambul asugun mene iluk warogo nolhi logogun a'nogo hakhogo mezbah warogo nolhu meneba omanogo nolhi logogun.

¹¹ Oba nen he sapi a'nogo eino inom, agap inom, ungguloak inom, enggisok inom, elonggomangge abirengge alet mangorogo inom,

¹² mondogat andi re waluk o sabu wurik mene abel endakwe fikhit wulibi laluk, wul kweisali laguba andi faget obuluk enegenggerogo were'ma aremnogo e nolhu mene wurogo amboloba nolhi logogun.

¹³ Nen, it weak hilingiti logogun mene andi re afuni Israel inap mondogat weak hilingfuluk, Tuhan Awene melalek werek mene omanogo misik ekhe wenggelhigik legengge nen taganet fuluk hilingiri'lagwi,

¹⁴ halok he, weak hilingitu mene weinam agunem aremnogo afuni nen he weak-weak sapi ai mene ket kotorek mene ekhe waluk he Tuhan Awi Sabu o lelunggulmo aremnogo waga logogun. We'luk he, wam andi warogo abirengge inaweak legerasuageluk noleti logogun.

¹⁵ Fei wagunem he it inogogwi kaindek inunggulenu andi mene inobaget mendek welagaikharek mene omanogo nen wam a'nogo ungguloba inenggi sebel fuluk aremnogo nenat wati logogun.

¹⁶ Wat fuluk ap Imam Agung a'nogo nen wam a'nogo amep fenakwe waluk o Sabu elonggoma kwikhi logogin.

¹⁷ Kwi laluk omanogo nen he mep a'nogoba enggi tum en yugul haluk he, o senggelek Fano Hore'ma su hulirogo kologo pelabek mene a'nogo era'lukwe andoma enggi 7 nen oba kweisal hikhi logogin.

¹⁸ Amep fena fikhit he o Sabu elonggoma nen amben fano mene enu dupa nolhuba obalik wurik mene mezbah andimuk nganoksek mene a'nogo ebene wat fikhi logogun. Nen, tindurek he, warogo fei wagu mene nolhuba mezbah a'nogo o Sabu solombonma ebekwe kwi laguba andoma were'ma eisok erokwe kweisal isikhi logogun.

¹⁹ Wam a'nogo asei abirengge waluk he mezbah amboloba nolhi logogun.

²⁰ Andi nolhi logolik hilingitu mene andi re, afuni inaweak legaphogo fouwageluk sapi ai mene warogo nolhi logolik hilingitarek a'nogo hakhogo hilingiti logogun. Afuni weak a'nogo hilingitunem he, at Imam Agung a'nogo nen wam warogo nolhi logogin. Andiba re Tuhan nen afuni inaweak a'nogo lek hilingisogo fisikhi logogin.

²¹ Andi nen sapi ai mene a'nogo re waluk wulibi laluk, at Imam Agung a'nogo onggwarek aweak lek hilingisogo fouwageluk sapi ai mene warogo noluwogeluk hilingitarek higithogo waluk wulibi laluk o Sabu a'nogo abel endakwe fikhit noli laga logogun. Afuni inaweak legaphogo fisoageluk he a'nogo nek hilingiti logogun.

²² Nen, weak hilingitu mene andi re it afuni inoe ferinarek welagarek mene nen wenggelek legengge Tuhan nen wene yi'nogo hilingi'no ti'nogo hilingi'no iluk melalek mene omanogo misik ekhe taganhogo hilingitu halok,

²³ a'nogo hilingiti iluk wenggelogo wesigin oba aremnogo weak-weak at aweak lek hilingisogo fouwageluk wam kambing ai mene misik agambut palek lek mene wati logogin.

²⁴ Aren he wam a'nogo unggul enggi nen sebel fuluk wam warogo noluogeluk palharek oba, mezbah werek mene a'nogo abel ambol fikhit were'ma aremnogo nen wati logogun.

²⁵ Wat fuluk imam enggi tumen amep a'nogoba yugul haluk, mezbah unggut kwe andimuk nganoksek mene ebene aremnogo yugul fikhi logogun, nen, alinlan he mezbah a'nogo erokwe kweisal isikhi logogun.

²⁶ Andi nen he wam lambulogo ninobagauwageluk warogo nolhi logolik hilingitarek a'nogo hakhogo wam asei abirengge omanogo mezbah amboloba nolhi logogun. It imam en ap inoe ferinarek welagarek mene a'nogo aweak faget warogo nolhuba re, Tuhan nen ap a'nogo aweak lek hilingisogo fikhi logogin.

²⁷ Nen, weak hilingiterek mene andi ambi, it afuni we hesangge mene misik ekhe nen Tuhan nen wene yi'nogo hilingi'no ti'nogo hilingi'no iluk melalek werek mene a'nogo wenggelek le'ma nen misik ekhe taganhogo hilingirik laga logolik halok,

²⁸ a'nogo hilingiti iluk wenggelogo wagu sambul aremnogo weak-weak aren kambing helou mene agapma palek lek mene ekhe wati logogin.

²⁹ Aren he wam a'nogo unggul oba enggi nen sebelek logolik, wam watfuluk noluogeluk senggelhuba mezbah werek mene a'nogo abel ambol fikhit andoma nen wati logogun.

³⁰ Wat fuluk imam en enggi tum oba mep a'nogoba yugul haluk, mezbah unggut kwe andimuk nganoksek mene ebene omanogo yugul figik, nen, alinlan he mezbah a'nogo erokwe kweisal isigik, ikhi logogun.

³¹ Asei re misi'mo lambulogo ninobagauwageluk warogo nolhi logolik, hilingitarek higithogo abirengge waluk imam en Tuhan endawimo agaiyek hoageluk mezbah amboloba nolhi logogin. Afuni we hesangge mene faget he imam en a'nogo warogo nolhunem, ap a'nogo aweak Tuhan nen lek hilingisogo fikhi logogin.

³² Ap ekhe nen ambi at aweak lek hilingisogo fouwageluk domba misik ekhe warogo fei waga logogin mene andi re, domba holou mene agapma agambut palek lek mene halok.

³³ Aren he enggi wam a'nogo unggul oba sebel fuluk, wam warogo noluogeluk ebe senggelharek oba mezbah welagarek higithogo abel utara fikhit andoma nen wati logogun.

³⁴ Watfuluk imam en wam amep omanogoba enggi tum oba yugul haluk, mezbah unggut kwe andimuk nganoksek mene ebene omanogo yugul figik, nen alinlan he mezbah a'nogo erokwe kweisal isigik, khi logogun.

³⁵ A'nogo hilingfuluk wam a'nogo asei re Tuhan nen lambulogo ninobagauwageluk, warogo nolhi logolik hilingitarek higithogo, asei omanogo abirengge wanhi logogun. Asei omanogo re, nunggu mene inom, Tuhan obaget nolhu mene omanogo inom seberogo mezbah amboloba nolhi logogun. A'nogo nek it imam en he ap a'nogo aweak faget warogo wogeti logogun, andiba ap andi Tuhan nen aweak lek hilingisogo fikhi logogin o,” iluk yagatikhe.