IMAMAT 3 - Allah Wene Fano Wene Hupla Inane

Allah ninom seberogo ninobagauwageluk warogo wogosi waga logogun wene

¹ Ekhe inom ikhi logolik, ”Ap misik mene ekhe nen Allah ninom sebesugun iluk sapi misik ekhe warogo fei wagu halok, sapi andi holou mene halok ogo ai mene halok ogo fano, oba nen he agap oba endephogo ekhe agambut palek lek mene halok.

² Fei we'luk ap waluk wagu mene a'nogo enggi wam a'nogo ungguloba sebel fugunem Tuhan Awi Sabu wurik oba solombonma aremnogo nen wati logogun. Nen, it imam at Harun ambisangma mene omanogo nen he sapi amep omanogo waluk mezbah unggut enggaminogo abel higithogo kweterisilik laga logogun.

^3-4 Wam at Tuhan ninom sebesugun iluk fei waga logogun andi mene, it imam en Tuhan faget iluk fikhi logogun mene re yi: Elonggomangge sei huli'lipsek mene inom, anggerang pirenet inom, amuli inom, asimogol fano mene inom halok.

⁵ Mondogat andi re amu mene inom seberogo nolhu mene iluk mezbah amboloba nolhi logogun. A'nogo nol fugunem he amben nen he Tuhan endawimo agaiyeget fikhi logogin.

⁶ Nen, ap ekhe nen Allah ninom sebesugun iluk fei wesugun mene andi re, wam domba ogo kambing ogo holou mene a, athe ai mene a mondok fano nek, oba nen he agap oba agambut pale'lek mene halok.

⁷ Ap ekhe mene domba warogo wogosigin anggaluk halok he, aren o Tuhan Awi Sabu wuri'mo omanogo waluk fei waga logogin.

⁸ Andem waluk we'luk he ap a'nogo nen enggi domba a'nogo ungguloba sebel fuluk o Sabu solombonma andoma nen wa'no. Wat fuluk at imam en he amep waluk mezbah a'nogo unggut 4 aremnogo ebene kweterisilik laga logogin.

^9-10 At Tuhan ninom sebesugun iluk anggo warogo fei waga logogin mene andi nen, it imam en domba andiba Tuhan obaget iluk fikhi logogun mene re yi: Sei elonggomangge huli'lip sek mene inom, sei ageroma andem mene sapukhogo inom, anggerang sei inom, amuli fano mene inom, asimogol fena fano mene inom halok fikhi logogun.

¹¹ Fugunem imam andem oba yabu hilingiti logogin mene a'nogo nen he mondogat andoma nunggu mene andi re Tuhan obaget fugu mene iluk mezbah amboloba nolhi logogin.

¹² Waluk fei wagu mene andi re kambing misik halok he ap fei wagu mene a'nogo nen waluk Tuhan Awi Sabu wuri'mo omanogo fei laga logogin.

¹³ Waluk we'luk aremnogo nen he ap a'nogo kambing a'nogo enggi nen unggul sebelek werek kwelek he, O Sabu sale'ma solombonma aremnogo nen kambing a'nogo wasugun. Wat foumo it ap imam en he amep a'nogo waluk mezbah unggut 4 en aremnogobene kweisalhi logogun.

^14-15 Tuhan faget nunggu mene iluk wogeti logolik he, it imam en he kambing a'nogo elonggomangge wogosugun menere yi: Asei elonggoma huli'lipsek mene inom, anggerang asei mene inom, asimogol mondok fano mene inom wogeti logogun.

¹⁶ Wogotunem it imam andem oba yabu hilingitu inaben he abirengge andoma mezbah amboloba nol fikhi logogun. nunggungge iluk nolhi logogun mene andi nen he, Tuhan endawimo agaiyeget fikhi logogun. Wam asei andoma mondogat he Tuhan mene nek logogin.

¹⁷ Afuni Israel mene nen he amep inom asei inom andoma ninggi logogun lek. Wene melalek yire etok mondok were'ma, it Israel mene nen o yi awi ti awi andoma logolik wene yi tiphogo nek hilingiti logogun,” iluk yagatikhe.