IMAMAT 21 - Allah Wene Fano Wene Hupla Inane

It imam inebe tegelek logouwageluk yagaisasikhe wene

^1-2 Tuhan nen wene melalek yi it Harun inom at ambisangma mene inomen hilingiti logogun mene yagaisoageluk Musa yagatikhe. Yagati logolik, it imam halok he at agaisa, eisena inom inomalik inom, are inom wa'lagu halok enek he, aren afuni salinafuba andoma laga logogin oba nen he at agaila'lak erugwi amu mene salinafunem halok he, ebe emetlasinogo re laga logogin lek,

³ meneat he at erei agun oan heligi'lek mene inom misi'mo werek mene halok enek he salhunem laga logogin.

⁴ Aren agwe ogogwi erugwi warek salinafunem lagain oba emetfakhagain hanogo.

⁵ Ap imam en halok he fong wati logolik iluk aren esi fena fikhit hogologo palhik, omboro palhik, enggat werek meneba onggwarek agap taungetik hilingiti logou fuk.

⁶ At he An nobaget nunggu mene warogo wo'nesi waga logoginmo re, ebe fano tegelek logolik hilingiti logogin. At ebere An nonggwarek nangge eneksek mene were'ma An nenu sebelogo feinogo.

⁷ It imam andi An nonggwarek nangge hilingi'mo re, iren hemi yugunat hilingitarek lek mene inom, he ap agap onggot mene inom, aben lologo herakfisigi'lek mene inom halok enek woginafi logogun.

⁸ Hineisena Tuhan nebe Anat hilingi'mo An nebe horek welagi hak An nagainafuri inom horegat logoubagaigeluk enogo fakhasigimo, it afuni Israel mene nen he imam andi re An nobaget nunggu mene warogo nolnetunem At onggwarek faget enogo fakhikhe mene iluk fageti logogun fano.

⁹ It imam mene ina'logomi nen yanani hilingirik nugu halok he aren eisena sebelogo fagain andi nen endumo nolugun fano.

¹⁰ It Imam Agung inoe lego mene andi re su imam en labetarek mene a'nogo labetfuluk amusu unggulkwe warogo menfoumo re, aren fong warogo hakhogo asu tiliphogo herakfigi'lek esi feisalhi'lek hilingiti logogin lek.

^11-12 Ap warek mene andi re, at onggwarek eisena agaisa oba nen he, aren An Nawi Sabu wuri'mo herakfuluk wulibi lagain oba, o emetlasinogore o An naiba andoma nen wulibi laluk ap warek were'ma andoma kwilanogo. At ebere An nonggwarek faget logouwageluk wo'netama re aren ebe emerogo fakhikhe hanogo.

^13-14 Athe, hemi sogwe mene halok inom, he aben lologo herak fisaga mene inom, he yanani hilingiti laga mene inom woginafa hanogo. We hele silerik mene ap agap onggot mene at onggwarek unggulenu mene halok helikhi logogin.

¹⁵ Hineisena Tuhan nebe Anat hilingi'mo. An nenat inoe kain mene Imam Agung logouwageluk enogo fisigirek. Andi nen he, aren wene melalek yi sagalhu halok he at againafuri inobabut horek logou mene re andi inebe emetlasugun,” isikhe.

^16-17 Tuhan nen wene ekhe yi Harun yagasi loageluk Musa mimingiti logolik, ”Hat hambisangma mene nen at ebeba agambut werek mene nen halok nobaget warogo nolnetuba omanogo wo'nesi wesinogo. Wene andi re mondok-mondok logogin mene faget yagaheti.

¹⁸ Ap ekhe An nobaget warogo wo'nesi wagu mene halok he at ebeba eil humunik lek mene, eisok holurek lek mene, elokheba aik palek lek mene ebe abirengge agambut palek lek mene, ebe abirengge fanorogo agap oba palek lek mene halok,

¹⁹ eisok weak mene, enggi holu mene,

²⁰ ambol konurek mene, eisok horok mene, eilenggen sigilik mene inom, agap oba oumo werek mene, ouwali waganek mene halok he An nobaget waluk wo'nesi waga logogin lek.

²¹ At Harun ambisangma mene nen tagongge mene halok he, it inebeba inagambut palek lek mene An nobaget nunggu mene warogo nolnesi wagep hanogo.

²² Andiba nen he, iren nunggu mene mondok hihorek mene inom, we horek mene enogo fugu mene inom, An nobaget waganogo fei wagu mene andoma ninggi logogun fano.

²³ Hineisena Tuhan nebe Anat hilingi'more, ap andi ebeba agap pale'ma aren su kain o senggelek hore'ma hulirogo kologo pelabek mene a'nogo inom mezbah inom era'lu horokhogo andoma laga logoinogo. Nen, yi mene ti mene o elonggoma warogo nolhi logolik hilingitu mene andoma An nen enogo fakhasigimo re, ap andi nen An nangge enogo werek engge andomaba emetfeinogo, ikhe ino,” iluk yagatikhe.

²⁴ Wene melalek yi'nogo ti'nogo hilingiti logogun iluk mene andi at Musa nen Harun inom at amlogomi inom it afuni Israel mene inom yagaisasikhe menere andi.