IMAMAT 20 - Allah Wene Fano Wene Hupla Inane

Afuni nen Allah ane sagalugun halok wene inoba fagain iluk, isikhe wene

^1-2 Tuhan nen it afuni Israel mene inoba wene yi yagaisoageluk Musa yagati logolik, ”Afuni hit mene nen ogo nen it pok meneba nen hinanggelekwe welagaikharek mene ogo inomalik warogo kembu enu Molokh andi wogetu halok he, afuni inebe mondogen huk helep oba wasumo ebe pinggi wa'lasigin.

³ Ap ekhe nen omalik warogo kembu Molokh oba wogosi lagu halok he An Nawi Sabu wurik mene emerogo figik, Nenu fano mondok welagi a'nogo sebelogo figik igin andi nen, An nen ap andi wene oba fembik at ebe An nagainafuri mene werek he anggagain lek.

⁴ Ap andi nen ambi a'nogo hilingisigin oba nen afuni nen ineil humun lagaikharek hakhogo hilingiti logolik, onggo wene oba figi'legengge werek halok he,

⁵ An namunegen ap andi ebe inom, agwe againafuri inom lambulogo, afuni at inom seberogo An heraknobagaluk kembu Molokh fogerasugun mene inom wene inoba fagain. Nen, it andi re An nagainafuri mene werek anggagain lek.

⁶ Ap ekhe nen it heinogengge afuni wa'lagaikha mene inaheime inom sebeti logolik inane matu meneba komo wene yaganisoageluk inambit lagu halok he, An nen ap andi oba wene fembik at andi An nagainafuri mene werek anggagain lek.

⁷ An hineisena Tuhan Allah nobabut fano horek welagi hak, hirogo a'nogo logobagaigen he, hinonggwaregen ogal fakhikhi logoni o.

⁸ Hineisena Tuhan he, Anat logolik hit hinebe An nonggwarek faget enogo fakhigimo re, An nawene melalek lisu palek andi fifurogo hilingiti logoni,” iluk isikhe.

⁹ Tuhan nen wene melalek yi Musa oba fikhi logolik, ”Ap ekhe nen eisena ogo agaisa ogo homan fisugu halok wene oba fuluk pinggi wasugun fano. Nen, at wa'lasigin mene andi re onggwarek aweak onggo.

¹⁰ Ap Israel mene misik ekhe nen, he it inunggulenu misik mene inagagwi ekhe inom pailak hilingite halok he ap andi inom, he andi inom wene inoba fuluk pinggi inoasugun.

¹¹ Ap misik ekhe nen eisena agwe ekhe inom nogogu halok he eisena omame a'nogo sebelogo fikhe andi nen, he andi inom ap andi inom emberek wene inoba fuluk pinggi inoasugun. Nen, it wa'lasugun andi re inonggwaregen hilingisugun onggo wa'lasugun.

¹² Ap misik ekhe nen eamalhe inom pailak hilingitu halok he, inonggwarek weak hilingisugun andi onggo, wene inoba fuluk pinggi inoasumo wa'lasugun.

¹³ It ekhe nen ambi hemi inom nogogarek hak it ap-ap sebetu halok he, it inebe pirenet mondok weak nonghonghogo hilingisugun andi nen it inaweak onggo wene inoba fuluk inoasumo wa'lasugun.

¹⁴ Ap ekhe nen agwe wanhesigen agaisa inomat woginafe halok he, andi mondok hilingisu elo'lek mene hilingitemo iluk inebe henaganet endumo nolinabumo wa'lasugun. Inobabut a'nogo hilingisugun mene andi re hit hinanggele'ma ekhe logogun mondok lek.

¹⁵ Ap misik ekhe wam inom a, athe mene inom a, sebetu halok he ap andi inom wam a'nogo inomat pinggi inoasugun.

¹⁶ Hele misik ekhe nen wam inom a, athe mene inom a sebetu halok he, wam andi ogo nen hele andi ogo pinggi inoasugun. Nen, it wa'lasugun mene andi re inonggwarek inaweagen wa'lasugun.

¹⁷ Ap mene misik ekhe nen at onggwarek erei inom ogo, nen ineisena misik oba nen inagaisa amu-amu mene halok ogo, inom sebetu halok he it andi hilingisu mondok elo'lek mene hilingitama iluk inonggwaregen hilingisugun onggo saburogoin andi. Nen, it andi re An nagainafuri mene werek he anggagain lek.

¹⁸ Ap misik ekhe nen hele misik ekhe tugi amep lagu mene a'nogoba lagu kwelek inom sebetu halok he, it andi An nagainafuri mene werek he anggagain legat.

¹⁹ Ap misik ekhe nen agaisahe inom athe oanugwi mene inom sebetu halok he iren kwanirek mene hilingisugun andi onggo inebe pirenet saburogoinat.

²⁰ Ap misik ekhe nen eisena agot ogo agaisa agot ogo inom nogoga halok he aren eisena agot enu sebelogo fagain andi nen, it ineluk logogun huli nen wa'lasugun huli andoma inomalik taginafi'legengge logombik wa'lasugun.

²¹ Ap misik ekhe nen are agwe palogo helikhe halok he aren are sebelogo fuluk elo'lek mene hilingisigin andi nen, ineluk logogun huli andoma inomalik taginafi'lek logombik wa'lasugun.

²² Tuhan nen ikhi logolik, ”An nen wokhinarek lagain oba o Kanaan andoma nen mugusogo wulak hinabi nogore, An nen nawene melalek inom yi'nogo hilingiti logoino ti'nogo hilingiti logoino iluk yagahisikhi lagi mene andi furogo holfuluk hilingiti logoino.

²³ It afuni o andoma werek mene nen he An nendawimo nabit mene nek hilingitu nen hit it inaiba andoma kwi lobagaigeluk it mugusogo wulaginafigi. Enggere hiren it afuni andoma inetokhogo werek aple inom, iren hilingiti lagaikha aple hilingitu mene inom, inobabut waganogo hilingiti logogun lek.

²⁴ An hineisena Tuhan Allah nen yi afuni ti afuni inunggulenu lombok werek oba nen, hit enek he An nagainafuri wenagaisogo hinobagagi mene a'nogo hilingi'mo, kweang ebe mondok heiselek logolik yi mene ti mene enggen hokhorogo were'ma andoma re hit wokhisagain iluk abok yagahisigimo re, hit hinonggwarek hinangge asuageluk wokhisagain.

²⁵ Arigini'mo hiren wam yi mene ti mene nunggu mene inom nunggu lek mene inom andi fifurogo tegelek logoino. Nen, wam wesa werek mene re ninggi logogun lek. Wam andi re An nen wesa mene igimo re, hit nogoin halok hinebe emetfakhogoin o.

²⁶ Hineisena Tuhan Allah re An nebeat hilingi'mo, An nebe fano horek welagi hak hirogo An nobaget fano horegat logogun. Hit he afuni inunggulenu amu meneba nen An nonggwarek nangge mene logobagaigeluk enogo hinobagasigi.

²⁷ Aben ogo hemi nen ogo afuni wa'lagaikha mene inagaimengge inendawimo kuluk hilingitu halok he, it andi huk helep oba pinggi wa'no. Nen, at wa'lasigin andi re at onggwarek aweak oba, ikhe yagaisano iluk,” yagatikhe.