IMAMAT 2 - Allah Wene Fano Wene Hupla Inane

Enu warogo fugu mene nunggu mene faget warogo noletuba fei waga logogun wene.

¹ Ekhe inom ikhi logolik, ”Ap misik ekhe nen Tuhan hai wati logolik nunggu mene Tuhan faget fei wesigin anggaluk halok, fei wagu mene andi re tepung mondok fano mene zaitun amusu kweisalogo kemenyan amben fano mene ambolebene tamulogo fuluk fei waga logogin.

² Nunggu mene enu warek fei waga logogun mene andi amben Tuhan endawimo fano asuageluk he, at waluk wagu mene a'nogo nen waluk we'luk it imam at Harun nen tagomangge mene omanogo inambit wogisa waga logogin. Wogisa wagunem it imam andem sambul yabu hilingiti logogun inap omanogo nen, abirengge andi mondogat Tuhan obaget fogo iluk enekhogo re tepung omanogo inenggi misigen wanu hakhogo waluk zaitun amusu a'nogo inom, kemenyan amben fano mene a'nogo inom, yugulogo amboloba omanogo nolhi logogun. A'nogo nol fugunem amben nen he Tuhan endawimo agaiyeget fikhi logogin.

³ Enu warogo fei wagu mene omanogo re, fena minggilogo it imam nunggu mene faget. Nen nunggu mene andi ebe re Tuhan faget fugu mene hilingi'mo re mondok fano horek mene logogin.

⁴ Nen enu warek fei wagu mene andi re roti weratuba nen weragongge waluk we'luk fei wagu halok he, roti andi ambumhogo tepung al mene inom zaitun amusu inom mulelogo fiterek mene ragi ba werago lek mene halok enek. Nen, zaitun amusuba yugulik mene halok ogo fanoat.

⁵ Nen, fei wagu mene andi re roti kerogo weratuba nen weragongge halok he roti ragi legengge tepung al meneba inom zaitun amusu inom oba werago mene halok fei waga logolun.

⁶ Roti fei wagu mene a'nogo kut-kut hilingfuluk he zaitun amusu a'nogo pelak fikhi logogun.

⁷ Nen waluk fei wagu mene andi re roti kuali ba isago mene halok, roti andi re tepung al mene inom zaitun amusu inom mulelek mene halok.

⁸ Roti a'nogo weragongge andi re Tuhan obaget fuluk it ap imam omanogo nen mezbah a'nogoba waluk loageluk wogisikhi logoino.

⁹ Roti Enu warogo fei wagu mene andi re it ap imam omanogo nen minggilogo waluk he, abirengge andi Tuhan obaget wogosugun iluk mezbah amboloba enekhogo iluk nol fei waga logogun. A'nogo hilingitunem amben he Tuhan endawimo healhi logogin.

¹⁰ Tindel agu mene re, it ap imam mene aga logogun. Roti andi re Tuhan faget fei wagu mene hilingi'mo mondok horek mene logogin.

¹¹ Kin amusu inom, fiterek mene inom he Tuhan obaget noletu legengge hilingi'mo re, Tuhan obaget enu warek mene halok he kin amusu inom fiterek mene inom he mangot fikhi logogun lek.

¹² Yi mene ti mene kweangma yatunem tahun hundik-handik enggen palhi logogun mene nen attak-attak palhu mene halok Tuhan obaget tak fei waga logogun oba nen he, warogo nolhuba omanogo nolhi logogun lek.

¹³ Eluge andi re hit hinom Allah inom wene katokhogo warek werek iluk enekhogo hilingi'more enu warek mene andi re hundik-handik fei waga logolik he eluge fologo fei wagunogo. Nen yi mene ti mene abirengge fei wagu mene andi re eluge folhigik enek fei waga logogun.

¹⁴ Nen, hiren he gandum enggen attak-attak mene palogo Tuhan faget fei wesuogeluk halok he, gandum ket sagalhu mene inom, iringitu mene inom halok fei waga logogun.

¹⁵ Gandum andi re zaitun amusuba pelagaisogo kemenyan amben fano mene a'nogo ambolebene tamulogo waluk waga logogun.

¹⁶ A'nogo waluk wagunem it imam omanogo nen abirengge Tuhan faget mondogat fogo iluk enegenggerogo gandum aremnogo mene minggilogo inom, amusu a'nogo inom, kemenyan a'nogo abirengge inom nolhi logoino,” iluk yagaisasikhe.