IMAMAT 19 - Allah Wene Fano Wene Hupla Inane

Allah nen he, ”Hinebe an nonggwarek faget tegelek logolik higithogo hilingiti logoino,” iluk yagaisasikhe wene

¹ Tuhan nen Musa mel yagatikhe:

² ”Afuni Israel mene Allah nen mel ikhe, iluk yagaisano: An hineisena Tuhan Allah nebe horek welagirek andi hak, hirogo An nobaget horegat logoni o.

³ Hineisena Tuhan Allah, An Nebeat welagimo re, An nen, yi'nogo hilingiti logoino, iluk yagahisasigi andi hak, hinebe lombok hineisugwi hinagaisawi agaugwerinafi logolik, linggene Sabat oba re, An nobaget weat logoino o.

⁴ Hineisena Tuhan Allah re, Anat andi nen he, An heraknobagaluk hinendawinggen tugwi kembu oba himbiret fouwogeluk wulibugun mondok lego. Emas mene inom, perak mene inom, posie mene inom, tugwi kembu wurogo fuluk fogerati logou fuk.

⁵ Hiren An ninom lambuluogeluk, wam An nobaget warogo fugunem, An wanigen he, An nen, yi'nogo hilingiti logoino, iluk yagahisasigi mene andi higithogoat hilingiti logoino o.

⁶ Wam ebe warogo senggelugun sambul andi inom, ohealekwe inom, kurik higit nogoin. Meneat he, ohealek logombik age hak wam kurik andi fena werek halok he, felelenghogo endu nolino o.

⁷ Wam kurik nuggu aple elo'lek aga mene andi nogoin halok, wam An faget warogo wo'nesugun mene andi Anen wanigin lego.

⁸ Sa nen, wam andi Allah fisogo mene, iluk futfigi'lek, kurik na lek hak aga mene andi nagain halok, weak hilingisigin mene andi wene onggwarek oba fakhamo re, An nen, at andi ebe An nagainafuri mene iluk anggagain lego.

⁹ Nen hit hineabumo gandum yago mene enggen palhi logolik, esanggokwe fuleligin mene halok, enggen palugun mondok lego. Nen, gandum enggen arat palimbigen, fena herakfogoin mene andi hobuk palugun mondok legaro.

¹⁰ Andi hagat, hineisena Tuhan Allah Anat andi nen, hineabu anggur yabumo, enggen attak palimbigen, fena herakfogoin mene paluogeluk hobuk hinambotkwe logoin mondok lego. Nen, enggen amu palogo pigin mene wanugun mondok legaro. We, andi mondogat afuni ap pok mene inom, inangge lek mene inom, heloagaluk herakfisano o.

¹¹ Yogot wanhik, lalinafik, hineranen wene yagaisigik, ikhi logogun lego.

¹² Hineisena Tuhan Allah re, An nebe aro. Ma re An nenu weagasu hak andi nen he, hiren afuni yi mene ti mene abok yagaisikhi logolik, hinendawimo nen, Wogosigin lek, iluk anggikhi logolik halok, An nenu hombuk palogo abok yagaisogoin lego.

¹³ Hiren afuni hinom welagep mene, hinane ninghogo wo'nom, iluk lalinafik, inangge telogo heligik, ugun mondok lego. Ap ekhe nen onggo wo'nesuageluk yabu hilinghinobagagun mene andi, inenggi onggo wogisigi'lek sebelogo fuluk hinenggi hup misigat halok ekhe nogo ugun mondok lego.

¹⁴ Hineisena Tuhan Allah re, Anat andi nen he, An noba hinailorogo fogetnafi logolik he, afuni inesanggo tagum mene homan fisigik, ineilenggen mum mene ineisok temukhogo waroageluk helep oba inanggwe palogo figik, ugun mondok lego.

¹⁵ Hiren, it ekhe unggum inoba figik, kotik, ikhi logolik he, wene higithogo halogo nen ikhi logoino o. Afuni inangge lek inelagaik mene inebikhit agik, inangge hokhorogo logolik, ineilmo wulalhak werek mene hinailo welagik, ikhi logogun mondok lego.

¹⁶ Hineisena Tuhan he, Anat andi nen, hit hinobabut hilingisugun oba nen afuni hinom welagep mene ekhe wa'lasinogo iluk, afuni hit mene ineilhanem at ekhe abok weak ilik-ilik wialogo fogoin mondok lego.

¹⁷ It afuni ekhe faget hit weak hilingitep hanogo nen he, it ekhe hinom weim palek hangge welagep mene andi, inoba ambumet fuluk logogun mondok lego. We, sagalogo legetfikhi logogun o.

¹⁸ Hineisena Tuhan Anat andi nen he, afuni nen hinoba ambumet fuluk werek halok, hiren onggo figik, hinapsiri watfisigik, ugun mondok lego. We, hinonggwarek hinebe hinendawinggen hundik welagep andi hak, it afuni ekhe mene ogo inebe hinendawinggen hundik logoino o.

¹⁹ An nen, yi'nogo hilingiti logoino, ti'nogo hilingiti logoino, iluk yagahisigi mene andi hologo hilingiti logoino o. Wam unggulenu hunogo meneba ai huniti logogun lego. Nen, yabu wen misigat meneba awi hunogo tomok yasugun lego. Nen, yo eil pire meneba ugu menere labesugun lego.

²⁰ Ap ekhe aminggmingengge hele silerik mene ap ekhe agwe logouwagaluk oba onggo wanigiluk abok enek yaga'luk, at ap onggo paligin mene andi nen onggo oan figi'lek werek kwelek, at hele andi oe manggusa mene andi emberek nogo agama halok, emberegat wene inoba fogoin o. Meneat he, hele andi ap andi amingmingenggeat oanat werek andi nen he, inebe mondok inoasugun lego.

²¹ At ap hele andi emberek nogo aga mene andi nen, an weak hilingiti, iluk wam domba ai mene An faget nawi wuri'mo kweba fei wesigin o.

²² Fei wagunem, ap weak hilingite mene andi, an nen horogo legetfisoageluk, ap imam mene nen afuni weak hilingita mene horinabuageluk An nobaget hilingiti logolik, wam domba andi wa'nesugun o. A'nogo hilingitunem An nen at aweak hilingite mene andi horogo legetfisagain o.

²³ Hit o Kanaan arat kwi lagep halok, yi agayo, ti agayo, enggen nenggarek mene awi yakfembik, tahun henagan wela'lugen enggen attak-attak isigin mene andi re, nogoin lek iluk futfembik ninggi'lek logoino o.

²⁴ Tahun enggaminogo meneba enggen ite halok, An hineisena Tuhan hai warogo re, An faget nobagagun o.

²⁵ Tahun fuap meneba re, enggen hit elok ninggi logogun o. Hineisena Tuhan he, Anat andi nen, An nen, yi'nogo hilingiti logoino, iluk yagahisigi mene andi higithogo hilingitep halok he, e andoma enggen hokhorogo iti logogin o.

²⁶ Mep ninggik, yi hat ti hat elalin hilingitarek mene ekhe hilingitik, ikhi logogun lego.

²⁷ Hinesi hinungguloak hogologo palhik, hinomboro palhik, ugun legaro.

²⁸ Hineisena Tuhan he, Anat andi nen he, afuni wa'lagunem, hinendawimo ouen hinagap paligik ugun lego, lisuba hinebene enegengge palhik, ugun mondok lego.

²⁹ Hina'logomi hinendawimo seramet fisaluk he, o su tugwi awi wuri'mo andoma yanani hilingiti logouwagaluk hilingisogo fisagubo. Hiren a'nogo hilingitep halok, hinaiba weak hilingisogo fakhigik, o hit were'ma andoma weak andiat hilingitu mondok welagik, ikhi logogun o.

³⁰ Hineisena Tuhan he, Anat andi nen he, linggene Sabat oba An faget weat welagik, o An fogetnafi logogun oba andoma enekhogo hilingitik, ikhi logoino o.

³¹ Hineisena Tuhan he, Anat andi nen, heinogengge afuni warek mene inareagun inambotma logolik wene yagaisagarek mene andi nen komothinabuageluk inoba logoin lego. Inoba lagep halok, hinebe weak hilingisogo fakhogoin o.

³² Hineisena Tuhan he, Anat andi nen he, inaluendek helel wulibik mene agaugwerinafik, An nebe hinailorogo welagik, ikhi logoino o.

³³ Ap pok hit hinaiba welagaikharek mene andi weak hilingisogo fisagubo.

³⁴ Hineisena Tuhan Anat andi nen he, afuni hit mene faget hilinginafi lagep andi hak, hiren ap pok mene andi faget a'nogoat hilinginafik, hit hinonggwarek hinebe hinendawinggen hundik welagep andi hak, it andi a'nogoat inebe hinendawinggen hundik welagik, ikhi logoino o. It ap pok mene andi werek andi hak, hit ogo re, a'nogoat o Mesir attak welagagip a'nogo hinendawimo ebe'ni o.

³⁵ Hiren yi mene ti mene afuni ekhe inoba onggo wanuogeluk, ilirengge meter mene inom, kilo mene inom, liter mene inom, walhaluk wogisagarek higithogo wogisigi'lek, hineranen lalinabugun lego.

³⁶ Hineisena Tuhan he An aro, An nenat hit o Mesir en wokhinarek wulibi wagagi andi nen, ilirengge meter mene inom, kilo mene inom, liter mene inom, ebe meneba higithogo walhikhi logoino o.

³⁷ Hineisena Tuhan, Anat andi nen he, An nen, yi'nogo hilingiti logoino, ti'nogo hilingiti logoino, iluk yagahisigi mene andi mondogat higithogo hilingiti logoino o, iluk ikhe yagaisano o,” iluk yagatikhe.