IMAMAT 18 - Allah Wene Fano Wene Hupla Inane

Afuni pailak hilingiti'lek tegelek logogun wene

^1-2 Tuhan nen Musa mimingiti logolik, wene melalek yi it afuni Israel mene yagaisoageluk oba fesikhe, ”An hineisena Tuhan Allah nebe An aro.

³ Hiren afuni Mesir hit o attak welagagip oba omanogo mene ogo re afuni o Kanaan mene An nen yogondak woginarek lagain oba omanogo mene ogo it inobabut waganogo hilingisu fuk. Andi nen he nawene werek mene wokhisasigi mene andi nek fifurogo hilingiti logoino o.

⁴ An hineisena Tuhan Allah Nebe re An aro. Andi halok he nawene lisu palek werek mene melalogo wokhisasigi mene andi nek fifurogo hilingiti logoino.

⁵ Hineisena Tuhan nebere Anat. Nen, hiren An nawene lisu palogo wokhisigi mene andi inom wene melalek yagahisigi mene andi inom tiphogo nek hilingiti logogun. A'nogo hilingiti logogun halok he hineluk hinagap telek mondok logogun,” o iluk isikhe.

⁶ Tuhan nen awene melalek yi yagaisasikhe. ”Hit hinonggwarek hinerugwi mene misik ekhe hinom misi'mo seberogo nogou fuk.

⁷ Heisena agwe andi re at heisena mene, nen haren he hagaisa hilingi'mo heisena agwe hinom seberogo nogou fuk.

⁸ Hat heisena agagwi amu mene misik ekhe hinom seberogo nogogun halok, hat heisena enggali asinogo nen he hinom seberogo nogo u fuk.

⁹ Hat herei hele yenggerek mene hinom ogo, nen at ekhe agaisa amu meneba nen hineisena misik mene hat haiba nen hinom misi'mo kulhinafa mene halok ogo, nen ale'ma nen kulha mene halok ogo, hinom sebesu fuk.

¹⁰ Hombawi inom ogo, hombalolak inom ogo, sebetu halok he hat honggwaregen henggaliaphogo fakhagain enggere inom seberogo nogou fuk.

¹¹ Haren herei hele yenggerek hineisena misik oba nen hinagaisa amu-amu mene halok ogo, hinagaisa misik oba nen hineisena amu-amu mene ogore at andi re hat herei hilingi'mo hinom sebe su fuk.

^12-13 Haren heisena erei hinom ogo nen hagaisa ege hinom ogo nagaisa, noan hilingi'mo iluk hinom sebe su fuk.

¹⁴ Haren heisena are agwe andi hagaisahe hilingi'mo hinom sebe su fuk.

¹⁵ Haren hamlogo agwe ogo agun ogo hoe agwe hinom ogo sebe su fuk.

^16-17 He haren attak wanigin mene a'nogo eak inom ogo ombalo inom iluk ogore it andi re hat ero mene hilingi'mo hinom sebe su fuk. Nen, a'nogo hilingitu mene andi re mondok kwanirek mene hilingi'mo ariginu fuk.

¹⁸ Hat honggwarek hagwe eluk werek kwelek at agot mene hat hela fuk.

¹⁹ He misik amep lagu sambul andi re at ebe mondok emerek were'ma at ariginik kwelek hinom sebe su fuk.

²⁰ Haren ap amu mene inagagwi inom sebesigin halok he, a'nogo hilingisigin andiba hebe emerogo fakhegen hanogo.

²¹ Haren homalik misik ekhe kembu molokh fogeratuba warogo saluak iluk wogisa fuk. A'nogo hilingisugun oba heisena Tuhan Allah a'nogo enu sebelogo fegen hanogo.

²² It ap-ap inom sebetu aple andi re Allah nen mondok abit se'ma re, it ap-ap hinom sebe su fuk.

²³ Aben ogo hemi nen ogo wam, mene, yi mene ti meneba hinom sebe su fuk. A'nogo hilingisugun halok he hit hinebe emerogo fakhegep hanogo.

²⁴ It afuni o Kanaan oba hit logou lek oba welagaikharek mene andoma mene nen a'nogo inebe emerogo fakhikhi lagaukwama, hit o kweang andomaba logoubagaigiluk it mugusogo wilak fisasugu.

^25-27 Hit afuni Israel mene halok inom nen it pok mene oba nen hit hinanggelek kwe femhogo welagaikharek mene inomen he wene melalek yi'nogo hilingi'no ti'nogo hilingi'no iluk yagaisugu mene andi re fi-furogo tiphogo nek hilingiti logogun. It andi re inobabut mondok weak mene hilingiti lagaukwaba inanggweang emerogo fesukwama, Tuhan nen wene inoba fesikhesik hit yoma logogun lek iluk yagaisasigi. Oba nen he hit he obabut mondogat weak mene andi re hilingisu fuk.

²⁸ Hit o andoma oan kwi lagi'le'ma, afuni Tuhan inonggot mene o andoma werek mene Tuhan nen mugisogo wilak fisagain andi hak, hirogo Aren wene hinoba fuluk kweang andomaba nen mugusogo wilakhinabi nogo.

²⁹ Ap ekhe nen weak mondok inali'lip mene hilingitu halok he, at ebe Allah againafuri mene werek anggogoin lek a'nogo hinelu o.

³⁰ Arigini'mo Tuhan nen ikhi logolik, ”Afuni Kanaan mene nen hit o andoma oan kwigi'le'ma hilingiti lagaukwa hakhogo hilingiti logogun lek. Hit he hinonggwaregen hinobabut ariginik mene andi hilingisugun oba emerogo fakhegep hanogore, An nen wene melalek yagahisikhi lagi mene yi fifurogo hilingiti logoni, iluk An hineisena Tuhan Allah nen igi o, iluk ikhe yagaisan,” iluk yagatikhe.