IMAMAT 17 - Allah Wene Fano Wene Hupla Inane

Yi mene ti mene amep faget hilingiti logouwageluk yagaisasikhe wene

^1-2 Tuhan nen wene melalek yi Harun inom at againafuri inom afuni Israel mene mondogat inom inoba yagaisoageluk Musa oba wene fikhi logolik,

^3-4 ”Ap Israel mene ekhe nen An nobaget wam sapi inom, domba inom, kambing inom warogo wo'nesi waga logolik halok, wam andi re o Tuhan Awi Sabu salek oba solombonma omanogo nen wati logogun. Nen, aren obalik ale'ma nen watu halok he ap andi wam amep ale'ma nen pelafemo wene sagalogo fikhe, iluk at andi ebe Allah amlogo mene logogin lek.

⁵ A'nogo hilingitunogo iluk wene melalek yagaisasikhe andi re iren wam Tuhan obaget warogo fei logoin iluk we yabumo nen hesangge warogo waluk fei wagu aple andi faget, it afuni Israel mene nen halok he Tuhan Awi Sabu sale'ma nek waluk waga logouwak, waluk wagunem, iren wam oba lambulogo ninobagauwageluk inetokhogo waluk it imam inambit o Tuhan Awi Sabu Sale'ma solombonma andoma fei wagunem wati logogun.

⁶ Wat fuluk it imam en wam amep a'nogo waganogo mezbah a'nogo esanggokwe kweisal isikhi logogun. kweisal isaluk asei a'nogo nolhunem amben nen Tuhan endawimo agaiyek aga logogin.

⁷ It afuni Israel mene halok he hundik-handik Tuhan oba himbirik logolik enek logogun. Nen, hiren we misigam iluk ogo ekhe yi wam ti wam nen yi mene ti mene yabumo warek mene munggwat jin-jin inafe hebelek logolik inanini mondok weak mene iluk inobaget wam warogo fisa fuk. Wene melalek yire fanorogo holfuluk higithogo hilingiti logolik enek logogun.

⁸ Afuni Israel mene ekhe nen ogo nen it pok mene oba nen hinom femhogo hinanggele'ma werek mene nen ogo wam warogo nolengge noletu mene iluk ogo nen wam amu mene faget iluk ogo,

⁹ Tuhan obaget warogo fei lagain iluk anggugu halok he aren Tuhan Awi Sabu salek mene solombonma nek fei waga logogin. Nen, aren ambi obalik amumu nen warogo fugu halok he at andi re Allah amlogo mene werek luk he anggogoin lek.

¹⁰ Nen, afuni Israel mene ogo, it pok meneba nen afuni Israel mene inanggelekwe femhoho werek mene nen ogo wam kurik meberengge nunggu halok he Tuhan nen wene oba fagain, nen at ebe faget An namlogo mene werek he anggagain lek.

¹¹ Yi mene ti mene eluk werek mene oma re amep oba nek eluk welagarek. Andi nen he, Tuhan nen ikhi logolik he amep mondogat he, At againafuri inaweak leget fisouwageluk mezbah amboloba omanogo nek kweisalisikhi logogun. Nen, mep andi re ebe eluk oba Aren inaweak lek hilingisogo fisikhi logogin.

¹² Andi faget it afuni Israel mene ogo, nen it pok mene oba nen it Israel mene inanggelekwe werek mene ogo, mep nafuk iluk ane huli palfesikhe andi.

¹³ Afuni Israel mene nen ogo, nen it pok meneba nen it Israel mene inanggelekwe femhogo werek mene nen ogo, sue paik yi mene ti mene amu meneba nen nenggarek mene senerik laga logolik halok he, aren amep wulak fuluk he amep andi kweang oba salhi logogin.

¹⁴ Yi mene ti mene mondogat eluk werek mene andi re ebe eluk mondogat he amep oba nek werek. Andiba re, Tuhan nen ikhi logolik it afuni Israel mene halok he mep andi mondagat ninggi logogun mondok lek. Ap sa nen wene hilingisu fuk iluk, ikhe mene yi, ane oak sagalogo hilingite halok he, at andi Allah againafuri mene werek he anggogoin lek.

¹⁵ Afuni Israel mene ogo, it pok mene ogo, misik ekhe nen yi mene ti mene amu waregengge a, mene olomene nen senggelek mene a, eino ekhe nunggu halok he, at andi asu sobalaluk ebe inom kume warogo nenangorogo werek kwelek mo ubuk ugunem enek he, ap a'nogo ebe horek mene aga logogin.

¹⁶ Nen, aren ambi a'nogo hilingite lek halok he at hilingitu mene onggo ambisangma saburikhi logogin, ikhe iluk yaga'no,” iluk yagatikhe.